Psalms 149 - Die Bybel 2020-vertaling Die Bybel 2020-vertaling
Psalms 149

¹ Halleluja! Sing vir die Here 'n nuwe lied – sy lof in die byeenkoms van getroue volgelinge!

² Laat Israel hom verheug in sy Maker, laat die kinders van Sion juig oor hulle Koning.

³ Laat hulle sy Naam loof met koordans, met begeleiding van tamboeryne en liere Hom besing.

⁴ Want die Here is sy volk goedgesind; Hy vereer verdruktes met oorwinning.

⁵ Laat getroue volgelinge juig in eerbetoon; laat hulle jubel op hulle beddens –

⁶ met verheerliking van God uit hulle kele, en tweesnydende swaarde in hulle hande,

⁷ om vergelding te voltrek onder die nasies, straf onder die volke,

⁸ om hulle konings in kettings te slaan en hulle geëerdes in ysterboeie,

⁹ om die vonnis wat opgeteken is, oor hulle te voltrek. Dit sal luister verleen aan al sy getroue volgelinge. Halleluja!