Éxodo 6:7 - Tayta Diospa Wilakuynin

⁷ Noqami shuntashayki kuyashqä runakuna kapäkunaykipaq. Qamkunapa Diosnikimi kashaq. Tsaynöpami musyapäkunkipaq Egipto runakuna nakatsishushqaykipita jorqamushuqniki Tayta Dios kashqäta.

Éxodo 6:7 Tukuy Ñawiqkunapa Wiñay Tupunakuy

Génesis 26:3

jäpa runano täkuykay. Noqaqa imaypis qamwanmi kaykäshaq. Tsaynöpis qamta bendicionnïta qoshpämi qampita miraqkunata kay intëru jalqakunata y raqrakunata qoykushaqpaq. Tsaynöpami cumplishaq papäniki Abrahamta promitishqäta.

Génesis 28:13

Tsaynöpis Tayta Diosta rikarqan escalëra puntancho ichiraykaqta. Paymi kayno nirqan: <<Noqami kaykä awkiluyki Abraham y papäniki Isaac yärakushqan Tayta Dios. Kanan punuykashqayki pampataqa qamta y qampita miraqkunatami qoykushaykipaq.

1 Reyes 20:28

Manaraq pelyaptinmi rey Acabman chayaykur profëta kayno nirqan: <<Tayta Diosmi kayno nin: <Siria soldädukunaqa yarpapäkun jalqakunalacho qamkunata yanapashqätami. Tsayno yarpaykaptinmi kananqa pampachöpis paykunata vincinaykipaq yanapashayki. Tsaynöpami tantiyankipaq noqa Tayta Dios kashqäta> >>.

1 Reyes 8:60

Tsayno yanapamaptintsimi maytsay nacioncho taq runakuna musyapäkunqa Tayta Dios japalan lapanpaq munayniyuq kashqanta y paypita mas juk dios mana kashqanta.

Nehemías 1:10

<<Noqakunaqa sirvishuqniki y kuyashqayki runakunami karkaykä. Munaynikiwanmi unay aylükunata Egiptupita jorqamurqayki.

Salmo 100:3

Tantiyakäriy Tayta Dios japalan Dios kashqanta. Paymi kamamashqantsi. Noqantsiqa kuyashqan runakunami kaykantsi. Majädancho kaykaq uyshanmi kaykantsi.

Salmo 81:6

6 (7) <<Pasaypa nakaykätsishuptikimi qamkunata jorqamurqä. Roqu bürruntano aruykätsishuptikimi qamkunata jorqamurqä.

Éxodo 13:14

<<Waray warantin tsuriki <¿imanirtaq kay fiestata ruraykantsi?> nir tapushuptiki kayno ninki: <Egiptucho noqakuna ashmay kashqäpitami munayninwan Tayta Dios jorqamarqan.

Éxodo 13:3

Tsawraqa lapan runakunata Moisés kayno nirqan: <<Egiptupita kanan junaq munayninwan Tayta Dios jorqamashqantsita ama qonqapäkunkitsu. Kanan junaqmi ashmay kaykashqantsipita jorqaykämantsi. Cada wata kay junaqta yarpar levadürayuq tantata ama mikupäkunkitsu.

Éxodo 14:18

Carrëtantinta y cawalluntinta Faraónta ushakätsiptïmi Egipto runakunapis musyapäkunqapaq munayniyuq Tayta Dios kashqäta>>.

Éxodo 14:4

Noqami Faraónpa shonqunta chukruyätsishaq qepaykita qatipäshunaykipaq. Tsayno qatipäshuptikimi podernïwan soldädunkunata ushakätsishaqpaq. Tsaynöpami Egipto runakuna musyanqa munayniyuq Tayta Dios kashqäta>>. Tsayno niptinmi Israel runakunaqa yätsishqannöla rurapäkurqan.

Éxodo 15:16

Paykuna pasaypa mantsakutsun. Munayniyuq kashqaykita rikar äyakashqa rikakutsun. Tsayno kaykulätsun salvashqayki runakuna pasashqanyaq.

Éxodo 15:2

Tayta Diosmi imaypis valorta qoman. Paytami imaypis alabä. Diosnï kaptinmi payta alabashaq. Paymi awkilükunapa Diosnin. Imaypis paylatami adorashaq.

Éxodo 16:12

<<Mayashqämi Israel runakuna conträ rimarkaykaqta. Kanan paykunata kayno wilay: <Tardipami aytsata mikupäkunkipaq. Tutapanami saksashqaykiyaq mikuyta mikupäkunkipaq. Tsaynöpami musyapäkunkipaq Tayta Diosniki kashqäta> >>.

Éxodo 16:6

Tsawraqa Moisés y Aarón Israel runakunata kayno nipäkurqan: <<Kanan tardimi musyapäkunkipaq Egiptupita kikin Tayta Dios jorqamushushqaykita.

Éxodo 2:11

Tsaypita Moisés mözuyarkurnami juk junaqcho aywarqan hebreo mayinkunaman watukuq. Tsaychömi rikarqan paykuna fiyupa nakar arurkaykashqanta. Tsaynöpis rikarqan juk Egipto runa hebreo runata maqaykaqta.

Éxodo 6:6

<<Tsayno kaptinqa aywarkur Israel mayikikunata kayno wilanki: <Tayta Diosmi kayno nin: Noqaqa Tayta Diosmi kä. Egipto runakuna fiyupa nakatsir arutsishushqaykipitami qamkunata jorqushayki. Podernïwanmi Egipto runakunata mantsakuypaq castïgukunawan castigashaq.

Éxodo 7:17

Kananmi musyanki Tayta Dios pï kashqantapis. Tayta Dios nimashqannölami kay aptaraykashqä tukruwan mayuta wiruptï yawarman tikranqapaq.

Isaías 41:20

Tsayta rikashpanmi pïmaypis noqa rurashqäta tantiyakunqa. Tsaynöpis tantiyakunqa Israel runakunapa santu Diosnin kashqätami>>.

Isaías 49:23

Tsay wawaykikunatami reykuna wamranpaq legitimakunqa. Reypa jipash tsurinkunami ashmanqa. Paykunami respitashushpayki qonqurpakamunqa. Tsaymi musyankipaq noqa Tayta Dios kashqäta. Noqaman yärakamaqkunaqa manami penqakärinqatsu>>.

Isaías 49:26

<<Nakatsishuqnikikuna kikinpura wanutsinakunanpaqmi kamakätsishaq. Aläpa wanutsinakuy kaptinmi runa mayinpa aytsanta mikuqno kanqa. Mayunöraq yawar aywaptinmi runa mayinpa yawarninta upuqno kanqa. Tsaynöpami lapan runakuna musyanqa noqa Tayta Dios salvashuqniki kashqäta. Tsaynöpis musyanqa Jacobpa munayniyuq Diosnin kar qamkunata tsapashqäta>>.

Isaías 51:15

<<Noqami Tayta Diosniki kaykä. Lapanta mandaq Yahwehmi jutïpis kaykan. Lamarpis pulchaqyänanpaq niptïqa qapararmi pulchaqyan.

Isaías 60:16

Lapan nistashqaykikunatami maytsay nacionkunapita apapämushunkipaq. Reykunapis lapan munashqaykitami kamaripäshunkipaq. Tsaynöpami tantiyakunkipaq noqa Tayta Diosniki salvakuq kashqäta. Tsaynöpis musyankipaq Jacob yärakushqan munayniyuq Dios kar qamta imapitapis tsapaykashqäta.

Isaías 63:8

Unay ayluntsikunapaqmi Tayta Dios kayno nirqan: <<Paykunaqa kaykan kuyashqä runakunami. Wamräkuna kashpanmi imaypis cäsukamanqa>>. Tsayno nishpanmi imaykapitapis salvarqan.

Jeremías 30:22

Qamkunami kuyashqä runakuna kankipaq. Noqanami qamkunapa Diosniki kashaq>>.

Jeremías 31:33

<<Tsay junaqkuna pasarkuptinmi Israel runakunawan pactuta rurashaq. Tsayno rurarmi leynïkunata yarpayninkunaman churashaq. Shonqunkunamanmi leynïkunata qelqashaq. Paykunapa Diosninmi kashaq. Paykunanami kuyashqä runakuna kanqa. Noqa Tayta Diosmi tsayno nï.

Ezequiel 20:19

Noqaqa Tayta Diosnikimi kaykä. Estatütükunata y leynïkunata cumplipäkuy.

Oseas 1:10

10 (2.1) <<Tsaypitami Israel runakunata yanapashaq tsaytsikaman mirananpaq. Lamar kuchuncho aquyshanöraqmi yupaytapis mana atipaypaq atska kanqapaq. <Paykunaqa manami noqapanatsu> nishqä partichöpis runakuna kaynömi nipäkunqa: <Paykunaqa imayyaqpis kawaq Tayta Diospa wamrankunami karkaykan>.

Levítico 11:44

Noqaqa Tayta Diosnikimi kaykä. Noqaqa santumi kaykä. Tsayno kaykaptinqa nishqäkunata cäsukur santu kapäkuy. Tsayno kaptinqa pachalanpa y lätaypa puriqkunata ama mikupäkunkitsu.

Levítico 11:45

Tayta Diosniki kanäpaqmi Egiptupita qamkunata jorqamushqä. Noqaqa santumi kaykä. Tsayno kaykaptïqa qamkunapis santu kapäkuy.

Zacarías 13:9

Kawaykar quëdaqkunataqa jutsaynaq kananpaqmi purificatsishaq. Qellayta ninawan fundiqno y qorita ninawan qanranta jorquqnömi paykunata purificashaq. Paykuna manakamaptinqa mayashaqmi. Tsaymi kayno nishaq: <Qamkunaqa kuyashqä wamräkunami karkaykanki>. Paykunanami kayno nipäkamanqa: <Noqakunapa Diosnïqa qammi kanki> >>.

Números 15:41

Noqami Egiptupita qamkunata jorqamushqä Tayta Diosniki kanäpaq. Noqaqa Tayta Diosnikimi kaykä>>.

Mateo 22:32

<Noqaqa Abrahampa, Isaacpa y Jacobpa Diosninmi kaykä>. Tayta Diosqa manami wanushkunapa Diosnintsu kaykan, sinöqa kawaykaqkunapa Diosninmi>>.

Romanos 8:31

Tsayno kaykaptinqa ¿imatanataq munashun? Tayta Dios favornintsi kaykaptinqa ¿pitaq contrantsi sharkunqa?

Deuteronomio 14:2

Qamkunaqa Tayta Dios kuyashqan santu runakunami karkaykanki. Paymi lapan nación runakunapitapis akrashushqanki paylapana kapäkunaykipaq.

Deuteronomio 26:18

Tayta Dios promitishushqaykinölami kuyashqan runakuna kapäkushqaykita kanan junaq nishushqanki. Tsayno kaykaptinqa lapan mandamientunkunata cumplipäkuy.

Deuteronomio 29:12

12 (11) Lapaykimi kaycho karkaykanki Tayta Dios rurashqan pactuta chaskipäkunaykipaq. Imayyaqpis cumplinanpaq jurarmi tsay pactuta Tayta Dios kanan junaq noqantsiwan ruraykan.

Deuteronomio 29:13

13 (12) Tsaymi unay ayluntsikunata Tayta Dios promitishqannöla kuyashqan runakuna karkaykanki. Tsaynöpis qamkunapa Diosnikiqa kikin Tayta Diosmi kaykan.

Deuteronomio 29:5

5 (4) <<Chusku chunka (40) watami chunyaq jirkapa qamkunata pushamushqä. Tsay watakunacho manami mayqanintsipapis röpantsi ni lanqintsipis ushakarqantsu.

Deuteronomio 4:20

Egiptucho pasaypa nakapäkushqaykipitami Tayta Dios jorqamushurqayki paypa herencian kapäkunaykipaq. Tsaynölami kanan herencian karkaykanki.

Deuteronomio 7:6

Qamkunaqa karkaykanki Tayta Dios akrashqan santu runakunami. Maytsay nación runakunapitami akrashushqanki kuyashqan runakuna kapäkunaykipaq>>.

Hebreos 11:16

Markanpaq lakikärinanpa trukanqa jana patsacho kaykaq mas ali kaq markapaqmi yarpararqan. Tsaymi paykunapa Diosnin kashqanta Tayta Dios mana penqakuntsu. Tsay markataqa kamarishqalatanami paykunata shuyaraykätsin.

1 Pedro 2:10

Nawpataqa manami Diospa wamrantsu kapäkurqayki. Kananmi itsanqa wamrankunana karkaykanki. Nawpataqa manami kuyapäshurqaykitsu. Kananmi itsanqa kuyapäshushqankina.

Apocalípsis 21:3

Tsay hörami mayarqä Tayta Diospa trönunpita kayno nir qayakamuqta: <<¡Kananqa runakunawan juntumi Tayta Dios tanqa! Paykunami kuyashqan runakuna kanqa. Kikin Tayta Diosmi paykunawan kaykanqa.

Apocalípsis 21:7

Imano nakarpis mana ajayaypa yärakamaqkunaqa lapan herenciantami chaskipäkunqa. Noqami paykunapa Diosnin kashaq. Paykunami wamräkuna kanqa.