ဆာ​လံ 27 - မြန်​​​မာ့​​​စံ​​​မီ​​​သမ္မာ​​​ကျမ်း​​ မြန်​​​မာ့​​​စံ​​​မီ​​​သမ္မာ​​​ကျမ်း​​
ဆာ​လံ 27

¹ ထာဝရဘုရား​သည် ငါ​၏​အလင်း​၊ ငါ့​ကို​ကယ်တင်​သော​အရှင်​ဖြစ်​တော်မူ​၏​။ ငါ​သည် မည်သူ့​ကို​ကြောက်​ရ​မည်နည်း​။ ထာဝရဘုရား​သည် ငါ့​အသက်​၏ မှီခို​ရာ​ဖြစ်​တော်မူ​၏​။ ငါ​သည် မည်သူ့​ကို​ကြောက်ရွံ့​ရ​မည်နည်း​။

² ငါ့​ကို​ရန်ဖက်ပြု​သော​သူ​များ​နှင့် ငါ​၏​ရန်သူ​များ​ဖြစ်​ကြ​သည့် ဆိုးညစ်​သော​အမှု​ကို​ပြု​သော​သူ​တို့​သည် ငါ့​အသား​ကို​ကိုက်စား​ရန် ငါ့​ထံသို့​ချဉ်းကပ်​လာ​ကြ​သောအခါ ခလုတ်တိုက်​၍​လဲကျ​ကြ​လိမ့်မည်​။

³ တပ်​တစ်​တပ်​သည် ငါ့​တစ်ဖက်​၌​စခန်းချ​ထား​လျှင်လည်း ငါ့​စိတ်နှလုံး​သည်​ကြောက်​လိမ့်မည်​မ​ဟုတ်​။ ငါ့​ကို​တိုက်ခိုက်​သည့်​စစ်ပွဲ​ဖြစ်ပွား​လျှင်လည်း ထို​စစ်ပွဲ​တွင် ငါ​ရဲရင့်တည်ကြည်​လိမ့်မည်​။

⁴ ထာဝရဘုရား​၏​ခန့်ညား​တင့်တယ်​ခြင်း​ကို ဖူးမြော်​ရန်​နှင့် ကိုယ်တော်​၏​ဗိမာန်တော်​၌ စူးစမ်းဆင်ခြင်​လျက်​နေ​ရန် ငါ​အသက်ရှင်​သမျှ​ကာလ​ပတ်လုံး ထာဝရဘုရား​၏​အိမ်​တော်​၌​နေ​ရ​မည့်​အကြောင်း တစ်ခုတည်း​ကို ထာဝရဘုရား​ထံ​၌ ငါ​တောင်းလျှောက်​ပြီ​။ ထို​အခွင့်​ကို ငါ​ရှာ​မည်​။

⁵ အကြောင်းမူကား ဒုက္ခ​ရောက်​သော​နေ့​၌ ကိုယ်တော်​သည် မိမိ​၏​ကိန်းအောင်း​ရာ​အရပ်​၌ ငါ့​ကို​ဝှက်​ထား​တော်မူ​လိမ့်မည်​။ ကိုယ်တော်​၏​တဲ​တော်​၌​ရှိ​သည့် ကွယ်ကာ​ရာ​အရပ်​၌ ငါ့​ကို​ဖုံးကွယ်​ထား​၍ ကျောက်ဆောင်​ပေါ်၌ ငါ့​ကို​ဆွဲတင်​တော်မူ​လိမ့်မည်​။

⁶ ယခုအခါ ငါ​၏​ဦးခေါင်း​သည် ငါ့​ပတ်လည်​ရှိ ငါ့​ရန်သူ​တို့​အထက်၌ ချီးမြှောက်​ခြင်း​ခံရ​လိမ့်မည်​။ ထို့ကြောင့် ငါ​သည် ကိုယ်တော်​၏​တဲ​တော်​၌ ဝမ်းမြောက်​စွာ​ကြွေးကြော်​သော​အသံ​တည်းဟူသော ယဇ်​များ​ကို​ပူဇော်​ပါ​မည်​။ ငါ​သည် သီချင်းဆို​လျက် ထာဝရဘုရား​ကို သီဆိုချီးမွမ်း​ပါ​မည်​။

⁷ အို ထာဝရဘုရား​၊ အကျွန်ုပ်​ခေါ်​သော​အသံ​ကို နားညောင်း​တော်မူ​ပါ​။ အကျွန်ုပ်​ကို သနား​၍​ထူး​တော်မူ​ပါ​။

⁸ အကျွန်ုပ်​စိတ်နှလုံး​က “​ငါ​၏​မျက်နှာ​ကို​ရှာ​ကြ​လော့​”​ဟု ကိုယ်တော်​ကိုယ်စား​ဆို​သောအခါ အို ထာဝရဘုရား​၊ ကိုယ်တော်​၏​မျက်နှာ​တော်​ကို အကျွန်ုပ်​ရှာ​ပါ​မည်​။

⁹ အကျွန်ုပ်​ထံမှ မျက်နှာ​လွှဲ​တော်​မ​မူ​ပါ​နှင့်​။ အမျက်​တော်​ထွက်​၍ ကိုယ်တော်​၏​အစေအပါး​ကို ငြင်းပယ်​တော်​မ​မူ​ပါ​နှင့်​။ ကိုယ်တော်​သည် အကျွန်ုပ်​ကို​ကူညီမစ​သော​အရှင် ဖြစ်​ပါ​၏​။ အကျွန်ုပ်​ကို​ကယ်တင်​တော်မူ​သော​ဘုရားသခင်​၊ အကျွန်ုပ်​ကို​ပစ်ပယ်​တော်​မ​မူ​ပါ​နှင့်​။ အကျွန်ုပ်​ကို​စွန့်ပစ်​တော်​မ​မူ​ပါ​နှင့်​။

¹⁰ ငါ​၏​မိဘ​တို့​သည် ငါ့​ကို​စွန့်ပစ်​ကြ​လျှင်​လည်း ထာဝရဘုရား​သည် ငါ့​ကို​ခေါ်ထား​တော်မူ​လိမ့်မည်​။

¹¹ အို ထာဝရဘုရား​၊ ကိုယ်တော်​၏​လမ်း​ကို အကျွန်ုပ်​အား​သွန်သင်ပြသ​တော်မူ​ပါ​။ အကျွန်ုပ်​၏​ရန်သူ​တို့​ကြောင့် အကျွန်ုပ်​ကို​ညီညာ​သော​လမ်း​၌​ပို့ဆောင်​တော်မူ​ပါ​။

¹² အကျွန်ုပ်​၏​ရန်သူ​တို့​အလို​အတိုင်း​ပြု​ကြ​စေရန် အကျွန်ုပ်​ကို​အပ်​တော်​မ​မူ​ပါ​နှင့်​။ အကြောင်းမူကား မုသား​သက်သေ​တို့​သည် အကျွန်ုပ်​တစ်ဖက်​၌​ထ​ကြ​လျက် ရက်စက်ကြမ်းကြုတ်​သော​စကား​ကို တရစပ်​ပြောဆို​ကြ​ပါ​၏​။

¹³ အကယ်စင်စစ် အသက်ရှင်​သော​သူ​တို့​၏​ပြည်​၌ ထာဝရဘုရား​၏​ကောင်းမြတ်​ခြင်း​ကို တွေ့မြင်​ရ​မည်​ဟု ငါ​ယုံကြည်​စိတ်ချ​၏​။

¹⁴ ထာဝရဘုရား​ကို စောင့်မျှော်​လော့​။ အားယူ​၍ သင်​၏​စိတ်နှလုံး​ကို​ရဲရင့်​စေ​လော့​။ ထာဝရဘုရား​ကို စောင့်မျှော်​လော့​။