Nehemia 10 - DIEM PROTESTANTA

Manome toky ny vahoaka fa hitandrina ny lalàna

¹ Noho izany rehetra nanjo anay izany, dia fanomezan-toky mafy no nataonay sy naraikitray an-tsoratra. Taratasy nasiana tombokase izy io sady nosoniavin’ny mpanapaka anay sy ny levitanay ary ny mpisoronay.

² Ireto avy ny mpanao sonia: –I Nehemià governora, zanakalahin’i Hakalià. –Ny mpisorona kosa dia ry i Tsedekià,

³ i Seraià sy i Hazarià ary i Jeremià,

⁴ i Pasehora sy i Amarià ary i Malkià,

⁵ i Hatosy sy i Sebanià ary i Malòka,

⁶ i Harima sy i Meremôta ary i Hôbadià,

⁷ i Daniela sy i Ginetôna ary i Baròka,

⁸ i Mesolama sy i Abià ary i Miamîna,

⁹ i Mahazià sy i Bilgay ary i Semahià.

¹⁰ –Ny levita kosa dia i Jesoa zanakalahin’i Azanià, i Binoy isan’ny zanakalahin’i Henadada, i Kadmiela,

¹¹ ary koa ny naman’ireo: dia ry i Sekanià sy i Hôdoià, i Kelità sy i Pelaià ary i Hanàna,

¹² i Mikà sy i Rehoba ary i Hasabià,

¹³ i Zakora sy i Serebià, ary i Sebanià,

¹⁴ i Hôdià sy i Banỳ ary i Kenany.

¹⁵ –Ary ny loholona kosa dia ry i Parehôsy sy i Pahata-Môaba, i Helama sy i Zatò ary i Banỳ,

¹⁶ i Bony sy i Hazdaga ary i Belay,

¹⁷ i Adônià sy i Bigvay ary i Hadîna,

¹⁸ i Atera sy i Hezekià ary i Hazora,

¹⁹ i Hôdià sy i Hasoma ary i Betsay,

²⁰ i Harifa sy i Hanatôta ary i Nebay,

²¹ i Magpihasy sy i Mesolama ary i Hezira,

²² i Mesezabela sy i Tsadôka ary i Jadoa,

²³ i Pelatià sy i Hanàna ary i Hanaià,

²⁴ i Hôsea sy i Hananià ary i Hasoba,

²⁵ i Lôhesy sy i Pilehà ary i Sôbèka,

²⁶ i Rehoma sy i Hasabnà ary i Mahaseià,

²⁷ i Ahià sy i Hanany ary i Hanàna,

²⁸ i Malòka sy i Harima ary i Bahanà.

²⁹ Ny olona sisa, na mpisorona, na levita, na mpiandry varavarana, na mpihira, na mpanampy ny levita, na izay rehetra efa niavaka tamin’ny valovotaka mba hanaraka ny lalànan’Andriamanitra, na ny vadin’ireo, na ny zanany lahy sy vavy, izany hoe izay rehetra efa mahahaino tsara,

³⁰ eny, ny olona sisa dia samy nikambana tsara tamin’ireo Israelita manan-kaja ireo; ka nianiana mafy izy rehetra hanaraka ny lalàna izay nampitain’Andriamanitra tamin’ny alalan’i Mosesy mpanompony, ary hitandrina sy hanatanteraka ny didy sy fitsipika aman-dalàna rehetra izay nataon’ny TOMPO Andriamanitray.

³¹ Tsy homenay ho vadin’ny valovotaka ny zanakavavinay; ary tsy halainay ho vadin’ny zanakalahinay ny zanakavavin’ireo valovotaka.

³² Raha misy vary na entana hafa amidin’ny valovotaka amin’ny andro sabata na amin’ny andro fety, dia tsy hovidinay; ary, isaky ny taona fahafito, dia tsy hambolenay ny tany sady hafoinay ny trosa rehetra.

³³ Nataonay lalàna koa ny handoavana ny ampahatelon-tsekela isan-taona hanaovana ny fanompoana momba ny tranon’Andriamanitray:

³⁴ io rehetra io dia hahazoana ny mofo atolotra ho an’Andriamanitra, ny sorona dorana manontolo sy fanatitra vokatry ny tany fanao isan’andro, ny sorona fanolotra isaky ny sabata sy voaloham-bolana ary andro fety, ny fanatitra hafa voatokana ho zava-masina dia masina, ary ny sorona fanalana ny ota mba handraisan’ny vahoaka Israely famelan-keloka; farany, io hetra io dia hanatontosana ny raharaha rehetra fikarakarana ny tranon’Andriamanitray.

³⁵ Nanao antsapaka izahay mpisorona sy levita ary sarambabem-bahoaka ny amin’ny hifandimbiasana hanatitra kitay hazo ho ao an-tranon’Andriamanitray, isam-pianakaviana amin’ny fotoanandro manandrify; isan-taona, araka izay voasoratra ao amin’ny lalàna, no hitondranay an’izany kitay izany mba handorana ny sorona eo ambonin’ny alitaran’ny TOMPO Andriamanitray.

³⁶ Isan-taona koa no hanateranay ao an-tranon’ny TOMPO ireo voaloham-bokatry ny taninay sy ireo voaloham-bokatry ny hazo rehetra fihinam-boa;

³⁷ nekenay hoentina ny lahimatoanay sy ny voalohan-teraky ny biby fiompinay ka harosonay amin’ny mpisorona izay manao ny fanompoana.

³⁸ Ampahany voafantinay amin’ny koba sy voankazo ary divay sy menaka no hatolotray ho an’ny mpisorona ka hapetrakay ao an-tranon’Andriamanitray, ao amin’ny efitrano voatokana ho an’izany; hatolotray ho an’ny levita ny ampahafolon’ny vokatry ny taninay, ka ny levita mihitsy no handray io fahafolon-karena io eny an-tanàna rehetra akaikin’ny fambolenay.

³⁹ Rehefa mandray ny fahafolon-karena kosa ny levita, dia hisy mpisorona anankiray taranak’i Aharôna hiaraka aminy; ary ny ampahafolon’ny fahafolon-karena dia hoentin’ny levita ao an-tranon’Andriamanitra, ao amin’ny efitrano fitehirizan-drakitra.

⁴⁰ Ao amin’ireo efitrano ireo no hanateran’ny Israelita sy ny levita ny ampahany voafantiny amin’ny vary sy divay ary menaka; ao amin’ireo efitrano ireo mantsy no misy ny fanaky ny Toeramasina sady itoeran’ny mpisorona manao fanompoana sy ny mpiandry varavarana ary ny mpihira. Amin’izany no tsy hanaovanay tsirambina ny tranon’Andriamanitray.