2Tantara 27 - DIEM PROTESTANTA

Ny nanjakàn’i Jôtama

¹ Feno 25 taona i Jôtama fony izy tonga mpanjaka; ary naharitra 16 taona no nanjakany toa Jerosalema. Ny anaran-dreniny dia i Jerosà zanakavavin’i Tsadôka.

² Nanao izay mahitsy eo imason’ny TOMPO i Jôtama, tahaka izay nataon’i Hozià rainy, kanefa tsy mba niditra tao amin’ny Toeramasin’ny TOMPO. Saingy mbola niharatsy toetra ihany ny vahoaka.

³ I Jôtama no nanamboatra ny vavahady ambony tamin’ny tranon’ny TOMPO sady nanatontosa rafitra be tamin’ny mandan’i Hôfela.

⁴ Nanorenany tanàna teny amin’ny havoan’i Joda ary nanaovany trano fiarovana sy tilikambo tany an’ala.

⁵ Niadian’i Jôtama ny mpanjakan’ny Hamônita ka resiny. Tamin’io taona io no nanomezan’ny Hamônita azy volafotsy telo taonina sy varimbazaha telo taonina ary vary ôrza telo taonina; dia mbola izany ihany koa no naloan’izy ireo tamin’ny taona roa manaraka.

⁶ Nitombo hery hatrany i Jôtama noho izy tsara fitondrantena teo anatrehan’ny TOMPO Andriamaniny.

⁷ Ny sisa amin’ny tantaran’i Jôtama mbamin’ny adiny rehetra sy ny zava-bitany dia indreo efa voasoratra ao amin’ny bokin’ny mpanjakan’i Israely sy i Joda izany.

⁸ Feno 25 taona izy fony tonga mpanjaka; ary naharitra 16 taona no nanjakany tao Jerosalema.

⁹ Rehefa lasa nodimandry any amin’ny razany kosa i Jôtama, dia nalevina tao an-Tanànan’i Davida; ary i Ahaza zanany lahy no nanjaka nandimby azy.