Salamo 66 - Baiboly Katolika

SALAMO 66 (Volgata 65) Fisaorana ampahibemaso

¹ Ho an’ny mpampianatra hira. Fihirana . Salamo.

² Manaova hobin-kafaliana mankamin’Andriamanitra, ry tany rehetra; hirao ny voninahitry ny Anarany, ataovy manetriketrika ny fankalazana Azy.

³ Lazao amin’Andriamanitra hoe: «Endrey, mahatahotra ny asanao! Mikoy Anao ny fahavalonao, noho ny fahefanao tsitoha.

⁴ Ny tany rehetra anie hiankohoka eo anatrehanao, hihira ho an’ny voninahitrao, hankalaza ny Anaranao!»

⁵ Avia ka banjino ny asan’Andriamanitra! Fa mahatahotra ny hevitra kasainy amin’ny zanak’olombelona.

⁶ Nampodiny ho tany maina ny ranomasina, ka nandeha tongotra namaky ny ony ny olona, dia faly taminy izahay.

⁷ Manjaka mandrakizay amin’ny fahefany Izy, mitsinjo ny firenena ny masony; aoka tsy hanandra-tena ny mpikomy. - Selà

⁸ Misaora an’Andriamanitra, ry vahoaka, ataovy manakoako ny fiderana Azy.

⁹ Nitahiry ny fanahintsika amin’ny fiainana Izy ary tsy namela ny tongotsika hangozohozo.

¹⁰ Fa Ianao, ry Andriamanitra, efa nizaha toetra anay; nandatsaka anay tamin’ny memy toy ny volafotsy;

¹¹ nampiditra anay tamin’ny fandrika harato; nanisy enta-mavesatra teo am-balahanay.

¹² Nampandeha olona hanosy ny lohanay namaky ny afo sy ny rano izahay; kanjo nesorinao tamin’izany izahay, dia nototofanao soa.

¹³ Tonga ato an-tranonao mitondra sorona dorana aho, hanefa aminao ny voadiko,

¹⁴ izay efa notononin’ny molotro, sy naloaky ny vavako, fony aho azom-pahoriana.

¹⁵ Manatitra ondry matavy aminao aho, ho sorona dorana, mbamin’ny fanetonan’ny ondralahy; mamono ny vantotr’ombalahy amam-bantotr’osy lahy ho sorona dorana aho. - Selà

¹⁶ Avia, mihainoa fa holazaiko aminareo, ianareo rehetra matahotra an’Andriamanitra, izay nataony ho an’ny fanahiko

¹⁷ Niloa-bava nitaraina taminy aho, ary teo ambony lelako ny fiderana Azy.

¹⁸ Raha nahita ota tao am-poko aho, dia tsy ho nihaino ahy ny Tompo.

¹⁹ Nefa efa nohenoin’Andriamanitra aho, efa nihaino tsara ny feon’ny fivavahako Izy.

²⁰ Hisaorana anie Andriamanitra, izay tsy nandà ny fivavahako, na nanaisotra ny fahasoavany tamiko!