Salamo 51 - Baiboly Katolika

SALAMO 51 (Volgata 50) Fifonana

¹ Ho an’ny mpampianatra hira. Salamo nataon’i Davida,

² fony i Natàna mpaminany nankao aminy, nony efa nandeha tamin’i Betsabea izy.

³ Andriamanitra ô, mamindrà fo amiko, araka ny fiantranao; vonoy ny hadisoako, araka ny haben’ny famindram-ponao.

⁴ Sasao tanteraka aho amin’ny heloko, ary diovy aho amin’ny fahotako.

⁵ Fa miaiky ny hadisoako aho, ary eo anatrehako mandrakariva ny fahotako.

⁶ Taminao irery ihany no nanotako; nanao izay ratsy eo imasonao aho, mba ho hitan’ny olona fa marina Ianao amin’ny teny fitsaranao.

⁷ Indro izaho teraka tamin’ny heloka; ineny koa torontoronina ahy tamin’ny fahotana.

⁸ Indro anefa tianao mba ho ao anatin’ny fo ny fahitsiana; dia ampahafantaro ahy, ato anatiko, ny fahendrena.

⁹ Diovy amin’ny hisopa aho, dia hadio; sasao aho, dia ho fotsy noho ny oram-panala.

¹⁰ Ampandreneso fifaliana amam-piravoravoana aho, dia hifaly ny taolako izay efa novakivakinao.

¹¹ Afeno ny tavanao ny fahotako, ary vonoy avokoa ny heloko.

¹² Ry Andriamanitra ô, amorony fo madio aho; ary fanahy mihenjana no havaozy ato anatiko,

¹³ aza ariana lavitra ny Tavanao aho; aza esorina amiko ny Fanahinao Masina.

¹⁴ Ampodio ny fifaliana amin’ny famonjenao, ary tohany amin’ny fananana fo mazoto aho.

¹⁵ Hampianariko ny lalànao, ry zareo mandika azy, ka hiverina aminao indray ny mpanota.

¹⁶ Andriamanitra ô, ry Andriamanitry ny famonjena ahy, afaho amin’ny ra nalatsaka aho, dia hidera ny fahamarinanao ny vavako.

¹⁷ Tompo ô, sokafy ny molotro, dia hidera ny fiderana Anao ny vavako.

¹⁸ Tsy sitrakao ny sorona, - fa homeko raha tianao izany; tsy mahafaly Anao ny sorona dorana.

¹⁹ Fa fanahy torotoro no sorona ho an’Andriamanitra; aza tebahinao, ry Andriamanitra, ny fo torotoro sy malahelo.

²⁰ Manaova soa be ho an’i Siôna, araka ny hatsaram-ponao, atsangano ny mandan’i Jerosalema.

²¹ Dia hankasitrahinao ny sorom-pahamarinana, ny sorona dorana ary ny fanatitra lavorary; ka dia hanaterana ombalahy eo ambonin’ny ôtelinao.