Salamo 31 - Baiboly Katolika

SALAMO 31 (Volgata 30) Vavaky ny tra-pahoriana

¹ Ho an’ny mpampianatra hira. Salamon’i Davida.

² Iaveh ô, Ianao no nataoko fialofako; aoka tsy ho menatra aho na oviana na oviana! vonjeo amin’ny fahamarinanao aho.

³ Atongilano amiko ny sofinao; faingàna hamonjy ahy. Aoka ho vatolampy fiarovana ahy Ianao, ho trano mimanda hahitako famonjena.

⁴ Fa Ianao no vatolampy sy trano mimandako; ary noho ny Anaranao dia hitondra sy hitarika ahy Ianao.

⁵ Hanafaka ahy amin’ny fandrika harato novelariny Ianao; fa Ianao no fiarovana ahy.

⁶ Apetrako eo am-pelatananao ny fanahiko, dia hanafaka ahy Ianao, ry Iaveh Andriamanitry ny fahamarinana.

⁷ Hàlako izay manaja sampy foana: fa raha izaho dia i Iaveh no itokiako.

⁸ Hientan-kafaliana sy haravoana noho ny hatsaram-ponao aho; fa nijery ny fahantrako Ianao, nahita ny fahorian’ny fanahiko Ianao,

⁹ ary tsy nanolotra ahy teo am-pelatanan’ny fahavaloko Ianao; fa nampitoetra ny tongotro teo amin’ny malalaka.

¹⁰ Mamindrà fo amiko, ry Iaveh, fa tra-pahoriana aho: simban’alahelo ny masoko, mbamin’ny fanahiko sy ny kiboko.

¹¹ Ny aiko lanin’alahelo; ny taonako difotry ny sento; ny heriko levona noho ny fahotako; ary ny taolako fohatra.

¹² Nataon’ny fahavaloko rehetra izay hahatonga ahy ho fanalam-baràka, ho enta-mavesatra ho an’ny mifanolo-bodirindrina amiko, ary ho tahotra ho an’ny sakaizako. Izay mahita ahy any ivelany mandositra ahy,

¹³ zavatra fanadino aho, toy ny maty, lavitra ny fon’ny olona; mova tsy ny kapoaka vaky iny aho.

¹⁴ Reko avokoa ny vava ratsin’ny be sy ny maro, ny fangorohoroana mahazo ny manodidina, raha ilay miara-mioko hamely ahy iny izy ireo, fa miray tetika hamono ny aiko.

¹⁵ Nefa matoky Anao aho, ry Iaveh, hoy aho hoe: Andriamanitro Ianao.

¹⁶ Eo an-tananao ny anjarako, afaho amin’ny tanan’ny fahavaloko ama-mpanenjika ahy aho!

¹⁷ Ampamirapirato amin’ny mpanomponao ny Tavanao; vonjeo amin’ny fahasoavanao aho!

¹⁸ Ry Iaveh ô, aoka tsy ho menatra aho, raha miantso Anao; fa aoka ho an’ny ratsy fanahy ny henatra. Aoka izy hidina mangina any amin’ny Seoly.

¹⁹ Aoka hanjary moana ny molotra mandainga, izay miteny amin’avonavona hanohitra ny marina amim-piavonavonana amam-paniratsirana.

²⁰ Akory ny haben’ny hatsaram-ponao, izay tahirizinao ho an’ireo matahotra Anao, izay asehonao amin’ireo manao Anao ho fialofany, eo imason’ny zanak’olombelona!

²¹ Alofanao eo amin’ny aloky ny Tavanao izy; mba tsy ho tratry ny teti-dratsy ataon’ny olona izy; mpampiery azy ao an-dainao Ianao, mba tsy ho azon’ny lela mamely azy izy.

²² Hisaorana anie i Iaveh! fa nasehony miharihary ny famindram-pony tamiko, tamin’ny nametrahany ahy tao an-tanàna mimanda.

²³ Hoy aho tamin’ny fahatairako: «Nariana lavitra ny fijerinao aho!» Kanjo nihaino ny feon’ny fifonako Ianao, nony nitaraina taminao aho.

²⁴ Tiava an’i Iaveh ianareo rehetra mazoto mivavaka aminy; Miaro ny olona miraikitra aminy i Iaveh, fa faiziny mafy kosa ny mpiavonavona.

²⁵ Matokia ary mahereza fo, ianareo rehetra manantena an’i Iaveh!