Salamo 115 - Baiboly Katolika

SALAMO 115 (Volgata 113 B) Ilay hany tena Andriamanitra

¹ Tsy izahay, ry Iaveh, tsy izahay, fa ny Anaranao no omeo ny voninahitra noho ny famindram-ponao, sy noho ny fahamarinanao.

² Ahoana no ilazan’ny firenena hoe: «Aiza àry ny Andriamanitr’izy ireo?»

³ Any an-danitra ny Andriamanitsika; izay tiany hatao, vitany avokoa.

⁴ Ny sampin’izy ireo dia volafotsy sy volamena, asan-tanan’olombelona.

⁵ Manam-bava fa tsy miteny izy, mana-maso fa tsy mahita izy,

⁶ manan-tsofina fa tsy mahare, manana orona fa tsy manimbolo,

⁷ manan-tanana fa tsy mandray, manan-tongotra fa tsy mamindra. Ny tendany tsy amoahany feo akory.

⁸ Hanahaka azy anie izay nanao azy mbamin’izay rehetra mitoky aminy!

⁹ Ry Israely ô, apetraho amin’i Iaveh ny fitokianao! Izy no vonjiny sy ampingan’izy ireo.

¹⁰ Ry taranak’i Aarôna, apetraho amin’i Iaveh ny fitokianao! Izy no vonjiny sy fitokian’izy ireo.

¹¹ Ianareo matahotra an’i Iaveh, apetraho amin’i Iaveh ny fitokianareo! Izy no vonjiny sy ampingan’izy ireo.

¹² Efa nahatsiaro antsika i Iaveh, ka hitahy! Hitahy ny taranak’i Israely Izy hitahy ny taranak’i Aarôna Izy,

¹³ hitahy izay matahotra an’i Iaveh Izy, na ny kely, na ny lehibe.

¹⁴ Hampitomboin’i Iaveh anie ny fanambinany anareo, dia ianareo sy ny zanakareo!

¹⁵ Hitahy anareo anie i Iaveh, izay nanao ny lanitra sy ny tany!

¹⁶ Ny lanitra dia ny lanitr’i Iaveh, fa ny tany kosa nomeny ny zanak’olombelona.

¹⁷ Tsy ny maty no midera an’i Iaveh dia ireo midina ho any amin’ny toerana fanginana,

¹⁸ fa isika, dia isika no hisaotra an’i Iaveh hatramin’izao ka ho mandrakizay. Aleloia!