Ohabolana 9 - Baiboly Katolika

Fanasana iantsoan’ny Fahendrena

¹ Ny Fahendrena efa nanorina ny tranony, efa nipaika ny andriny fito,

² efa namono ny bibiny, nampifangaro ny divainy, ary efa nanamboatra ny latabany.

³ Naniraka ny ankizy vaviny izy, dia miantso eo an-tampon’ny havoan’ny tanàna:

⁴ Aoka hiditra atỳ izay kely saina! Ary hoy izy amin’izay tsy manan-tsaina:

⁵ «Avia, hano ny mofoko, ary sotroy ny divay nampifangaroiko.

⁶ Ilaozy ny tsy fahalalana, dia ho velona ianareo; ary mizora amin’ny lalan’ny fahazavan-tsaina.»

Hanoherana ny mpanaraby

⁷ Araby no azon’izay mananatra ny mpananihany, ary ala baraka no hitan’izay mandevilevy ny ratsy fanahy.

⁸ Aza mananatra ny mpananihany fandrao dia hàlany ianao; fa ny hendry no anaro, dia ho tiany ianao.

⁹ Omeo hevitra ny hendry, hihahendry kokoa; toroy saina ny marina, hitombo fahalalana.

¹⁰ Ny fahatahorana an’i Iaveh no fiandohan’ny fahendrena; ary ny fahazavan-tsaina no fahalalana an’ilay Masina.

¹¹ Fa izaho no hihamaroan’ny andronao, sy hitomboan’ny taona iainanao.

¹² Raha hendry ianao, dia soa ho anao ny hendry; fa raha mpamazivazy kosa, ianao ihany no hivesatra ny sazin’izany.

¹³ Ny fahadalana dia vehivavy vavàna, donto saina, ary tsy mahalala na inona na inona.

¹⁴ Mipetraka eo am-baravaran’ny tranony izy, mitaingin-tseza eo an-tampon’ny havoan’ny tanàna,

¹⁵ mba hiantso ny mpandalo, izay mizotra amin’ny lalan-kalehany.

¹⁶ Aoka hiditra atỳ, izay kely saina! Ary hoy izy amin’izay tsy manan-tsaina:

¹⁷ Mamy ny rano angalarina, ary fy ny mofo hanina am-piafenana!

¹⁸ Tsy fantany fa misy ambiroa ao, ary efa any amin’ny fanambanin’ny Seoly sahady ny nasainy.