Ohabolana 1 - Baiboly Katolika

Lohateny ankapobeny

¹ Ohabolan’i Salômôna, zanak’i Davida mpanjakan’i Israely:

² hahalalana ny fahendrena amam-pahaizana, hahafantarana ny lahateny misy saina;

³ hahazoana fampianarana mazava, ny fahamarinana, ny rariny, ary ny hitsiny;

⁴ hanomezam-pahafantarana ny kely saina, ary fahalalana sy fandinihana ho an’ny tanora.

⁵ Aoka hihaino ny hendry, dia hitombo fahalalana izy; ary ny manan-tsaina, hahalala torohevitra feno fahamalinana,

⁶ dia ho fantany ny ohabolana aman-teny saro-pantarina, ny oha-teny sy ny ankamantatry ny olon-kendry.

⁷ Ny fahatahorana an’i Iaveh no fiandohan’ny fahendrena; fa ny adala manamavo ny fahendrena amam-pianarana.

1. TENY MIALOHA FANANARAN’NY FAHENDRENA Ny hendry: Aza miaraka amin’ny olon-dratsy

⁸ Anaka, henoy ny fampianaran-drainao, ary aza arianao ny fanoroan-dreninao,

⁹ fa fehiloha tsara tarehy amin’ny lohanao izany, ary ravaka ho an’ny vozonao.

¹⁰ Anaka, raha misy mpanota mitady hanambosy anao, aza mety mankasitraka ianao.

¹¹ Raha izy ireo manao hoe: «Avia hiaraka aminay; aoka hanotrika handatsa-dra isika; aoka isika hamela-pandrika fotsiny izao amin’ny tsy manan-tsiny.

¹² Aoka hitelina azy velona isika, hoatra ny Seoly; hanao azy telomoka, toy ireo midina any an-davaka.

¹³ Fa hahazo fananana sarobidy isan-karazany isika, hofenointsika babo ny tranontsika;

¹⁴ hahazo ny anjaranao miaraka aminay ianao amin’ny filokana; kitapo iray ihany no hiombonantsika rehetra.»

¹⁵ Aza mandeha miaraka aminy eny an-dalana, anaka, avilio ny tongotrao tsy ho amin’ny sakeli-dalany;

¹⁶ fa mihazakazaka ho amin’ny ratsy ny tongony; ary midodododo handatsa-dra izy ireo.

¹⁷ Velarim-poana anefa ny fandrika harato, raha eo imason’ny zava-manana elatra;

¹⁸ izy ireo koa dia ny rany ihany no anaovany otrika, ny ainy ihany no hamelarany fandrika.

¹⁹ Izany no lalan’ny olona rehetra fatra-pila harena; fa ny tombom-pihariana maharesy an’izay mitana azy.

Ny fahendrena: Teny ho an’ny tsy miraharaha

²⁰ Miantso mafy eny an-dalam-be ny fahendrena; manandra-peo any amin’ny kianja izy.

²¹ Mitory eo am-pihaonan-dalana maresaka izy; milaza ny teniny izy eo am-bavahady sy eny an-tanàna manao hoe:

²² «Mandra-pahoviana, ry kely saina, no hitiavanareo ny fahakelezan-tsaina? Mandra-pahoviana no hifalian’ny mpananihany amin’ny fananihaniana, ary hankahalan’ny adala ny fahaizana?

²³ Mitodiha ianareo hihaino ny fananarako, dia indro haidiko ao aminareo ny fanahiko, hampahafantariko anareo ny teniko.

²⁴ Noho izaho miantso anefa, fa lavinareo, noho izaho mamela-tanana, fa tsy misy mitandrina,

²⁵ noho ianareo tsy manahy ny saina atolotro rehetra, ary tsy tianareo akory ny fananarako:

²⁶ dia izaho kosa hihomehy anareo tra-pahoriana, hananihany anareo raha avy izay zava-mahatahotra anareo,

²⁷ raha avy hamely anareo, toy ny rivo-doza, ny zava-mahatahotra, raha hanarona anareo, toy ny tafio-drivotra ny loza, raha hianjeràm-pahoriana amin’ahiahy ianareo.

²⁸ Amin’izay izy ireo hiantso ahy fa tsy hovaliako, hitady ahy fa tsy hahita ahy,

²⁹ satria izy ireo nankahala ny fahaizana, ka tsy naniry ny fahatahorana an’i Iaveh;

³⁰ satria tsy nandray ny saina natolotro, ary tsy nanao ho zavatra ny fananarako rehetra,

³¹ dia hihinana ny vokatry ny lalany izy, sy hivoky ny saim-pantatry ny tenany.

³² Fa ny faniasiavan’ny tsy mahalala no mamono azy, ary ny tokin’ny tsy misy saina no mahavery azy.

³³ Fa izay mihaino ahy kosa handry feizay; ho velona amim-piadanana izy fa tsy hatahotra ny loza.»