Nehemia 12 - Baiboly Katolika

Ny Jody nonina tany amin’ny vohitra hafa

¹ Izao no mpisorona sy Levita niara-niverina tamin’i Zôrôbabela zanak’i Salatiela, sy i Josoe: I Saraiasa, i Jeremia, i Esdrasa,

² i Amariasa, i Melòka, i Hatosa,

³ i Sebeniasa, i Rehoma, i Merimota,

⁴ i Adô, i Gentona, i Abiasa,

⁵ i Miamìna, i Maadiasa, i Belgà,

⁶ i Semeiàsa, i Joiariba, i Idaiasa,

⁷ i Seloma, i Amôka, i Helkiasa, i Adaiasa. Ireo no lehiben’ny mpisorona mbamin’ireo rahalahiny, tamin’ny andron’i Josoe.

⁸ Levita: i Josoe, i Benoy, i Kedmiela, i Sarebiasa, i Jodà, i Mataniasa, izay nitarika ny hira fiderana, niaraka tamin’ireo rahalahiny;

⁹ i Bekbekiasa sy i Anì, rahalahin’ireo kosa no antoko-mpihira nifamaly tamin’ireo, tamin’ny fanompoana.

Ireo mpisorom-be niteraka mpisorom-be nifanesy

¹⁰ I Josoe niteraka an’i Jôakima, i Jôakima niteraka an’i Eliasiba, i Eliasiba niteraka an’i Joiadà,

¹¹ i Joiadà niteraka an’i Jonatàna, ary i Jonatàna niteraka an’i Jedoà.

Ireo mpisorona sy Levita tamin’ny andron’i Jôakima mpisorom-be

¹² Izao no mpisorona loham-pianakaviana, tamin’ny andron’i Jôakima: i Maraiasa avy amin’i Saraiasa: i Anania avy amin’i Jeremia,

¹³ i Mosolama avy amin’i Esdrasa, i Johanàna avy amin’i Amariasa,

¹⁴ i Jonatàna avy amin’i Melòka, i Josefa avy amin’i Sebeniasa,

¹⁵ i Ednà avy amin’i Heràma, i Helky avy amin’i Maraiôta,

¹⁶ i Zakaria avy amin’i Adô, i Mosolama avy amin’i Gentona,

¹⁷ i Zekri avy amin’i Abiasa, i Felty avy amin’i Miamìna sy i Moadiasa,

¹⁸ i Samoà avy amin’i Belgà, i Jonatàna avy amin’i Semeiàsa,

¹⁹ i Matanay avy amin’i Joiariba, i Ajỳ avy amin’i Jodaiasa,

²⁰ i Kelay avy amin’i Selay, i Hebera avy amin’i Amòka,

²¹ i Hasabiasa, avy amin’i Helkiasa, i Natanaely avy amin’i Idaiasa.

²² Tamin’ny andron’i Eliasiba, i Jôiadà, i Johanàna, ary i Jedoà, dia voasoratra avokoa ny Levita loham-pianakaviana sy ny mpisorona, tamin’ny nanjakan’i Dariosa ilay Persa.

²³ Voasoratra ao amin’ny boky tantara, ny tantaran’i Levì, loham-pianakaviana, hatramin’ny andron’i Johanàna, zanak’i Eliasiba.

²⁴ Lohan’ny Levita: i Hasebiasa, i Serebiasa, ary i Jôsoe, zanak’i Kedmiela, niandraikitra niaraka tamin’ireo rahalahiny nifanandrify aminy, ny fankalazana sy ny fiderana an’Andriamanitra; araka ny nandaharan’i Davida olon’Andriamanitra an’izany: nanao antokony roa mifamaly.

²⁵ Ny mpiandry varavarana, niambina teo amin’ny tokonam-bavahady kosa, dia i Mataniasa, i Bekbekiasa, i Abdiasa, i Mosolama, i Telmôna, ary i Akoba.

²⁶ Ireo izy no tamin’ny andron’i Jôakima, zanak’i Josedeka sy i Nehemia governora, ary i Esdrasa mpisorona sy mpanora-dalàna.

Ny nitokanana ny mandan’i Jerosalema

²⁷ Nony nitokanana ny mandan’i Jerosalema dia nantsoina tany amin’izay fitoerana nonenany rehetra tany, ny Levita, nasaina tonga any Jerosalema hanao ny fitokanana amin-kafaliana, amin’ny hira amam-piderana, amin’ny feon-kipantsona sy valiha ary harpa.

²⁸ Nivory ny zanaky ny mpihira, avy eny ambanivohitra manodidina an’i Jerosalema, avy any an-tanànan’ny Netôfatianina,

²⁹ sy Bety-Galgalà, ary ny faritanin’i Gebà sy i Azmaveta; fa nanao vohitra ho azy teny amin’ny manodidina an’i Jerosalema ny mpihira.

³⁰ Rehefa avy nanadio ny tenany, ny mpisorona sy ny Levita, dia nanadio ny vahoaka sy ny vavahady ary ny manda koa.

³¹ Nasaiko niakatra teny ambonin’ny manda ireo mpanapaka an’i Jodà, ary nalahatro ho antokony roa lehibe ny mpihira manao prôsesiôna. Ny antokony voalohany, nandeha teny ambonin’ny manda, amin’ny ilany havanana, ho eo amin’ny vavahadin’ny Zezika.

³² Ka ireto no nandeha teo aorian’ireo: i Ozaiasa, sy ny antsasaky ny andriandahin’i Jodà,

³³ i Azariasa, i Esdrasa, i Mosolama, i Jodà, i Benjamina, i Semeiàsa, ary i Jeremia;

³⁴ ny sasany amin’ny taranaky ny mpisorona, nitondra trômpetra: i Zakaria zanak’i Jonatàna zanak’i Semeiàsa zanak’i Mataniasa zanak’i Mikea zanak’i Zekora zanak’i Asafa,

³⁵ mbamin’ny rahalahiny, Semeiàsa, Azareela, Malalay, Galalay, Maay, Natanaely, Jodà, ary Hananỳ, nitondra ny zava-manenon’i Davida, olon’Andriamanitra. I Esdrasa mpanora-dalàna no nialoha an’ireo.

³⁶ Tao amin’ny vavahadin’ny Loharano izy ireo, dia niakatra ny ambaratongan’ny tanànan’i Davida, teo an-tandrifiny, nihazo ny fiakarana amin’ny manda, eo ambonin’ny manda, eo ambonin’ny tranon’i Davida hatreo amin’ny vavahadin’ny Rano, eo atsinanana.

³⁷ Ny antoko-mpihira faharoa kosa, nandeha tamin’ny ilany iray, ka izaho sy ny antsasaky ny vahoaka no teo aorian’io, teny ambony manda. Avy eo amin’ny tilikambon’ny fatana fandoroana, dia nandroso hatreo amin’ny manda malalaka,

³⁸ dia avy teo ambony vavahadin’i Efraima, teo amin’ny vavahady Goga, teo am-bavahadin’ny Hazandrano, teo amin’ny tilikambon’i Hananeela, sy ny tilikambon’i Meà, hatreo amin’ny vavahadin’ny Ondry; ary teo amin’ny vavahadin’ny Tranomaizina no nijanona.

³⁹ Dia samy nijanona tao an-tranon’Andriamanitra ny antoko-mpihira roa tonta, mbamin’izaho sy ny antsasaky ny andriambaventy niaraka tamiko,

⁴⁰ ary koa ireo mpisorona: Eliasima, Maasiasa, Miamima, Mikea, Eliôenaì, Zakaria, Anania, nitondra trômpetra,

⁴¹ sy Maasiasa, Semeiàsa, Ajì, Johanàna, Melkiasa, Elama ary Ezera. Dia injay niredona ny mpihira mbamin’i Jezraiasa mpifehy azy.

⁴² Sorona maro no naterin’izy ireo, tamin’izay andro izay, ary fifaliana no nimasoany fa antom-pifaliana lehibe no nomen’Andriamanitra azy ireo. Nifaly mbamin’ny zaza amam-behivavy, ka re lavitra ny hobin-kafaliana tao Jerosalema.

Andro nilamina

⁴³ Tamin’izany andro izany, dia notendrena ny olona hitandrina ny efitrano fitahirizana, hasiana ny fanatitra voatokana, ny voaloham-bokatra, ny fahafolon-karena; ary nasaina nangonin’izy ireo, avy any amin’ny faritanin’ny isan-tanàna, ny anjaran’ny mpisorona sy ny Levita voadidin’ny lalàna, fa nahafaly an’i Jodà ny nahita ireo mpisorona sy Levita, samy eo amin’ny anjara toerany avy,

⁴⁴ nitandrina ny zavatra rehetra momba ny fanompoana ny Andriamaniny sy ny momba ny fanadiovana; torak’izany koa ireo mpihira sy mpiandry varavarana, araka ny nandaharan’i Davida sy i Salômôna zanany.

⁴⁵ Fa fahiny, tamin’ny andron’i Davida sy i Asafa, lehiben’ny mpihira, dia fanao ny manao hira fiderana amam-pisaorana ho fankalazana an’Andriamanitra.

⁴⁶ Tamin’ny andron’i Zôrôbabela sy i Nehemia, i Israely rehetra dia nanome isan’andro ny anjaran’ny mpihira sy ny mpiandry varavarana. Nomena ny Levita ny fanatitra masina, dia ny Levita kosa indray no nanome ny anjaran’ny taranak’i Aarôna.