Lioka 1 - Baiboly Katolika

I

¹ Noho ny maro efa nanoratra ny tantaran’ny zavatra inoana tokoa amintsika

² sy noraisintsika tamin’ny vavolombelona sady nahita maso no mpitory teny hatramin’ny voalohany,

³ dia nataoko fa mety koa, rehefa niala nenina aho hahalala tsara ny zavatra rehetra hatramin’ny niandohany, ny hanoratra azy milamina tsara ho anao, ry Teôfily manan-kaja,

⁴ mba ho fantatrao fa marina tokoa izay nampianarina anao.

NY NAHATERAHAN’I JOANY BATISTA SY I JESOA ARY NY FIAINANY MIAFINA Ny nanambaràna ny hahaterahan’i Joany Batista

⁵ Tamin’ny andron’i Herôda mpanjakan’i Jodea, nisy mpisorona anankiray atao hoe Zakaria isan’ny fianakavian’i Abià, ary ny vadiny dia taranak’i Aarôna sy natao hoe Elizabeta.

⁶ Samy marina teo imason’Andriamanitra izy mivady, sady nitondra tena tsy nanan-tsiny tamin’ny didy sy ny tenin’ny Tompo rehetra.

⁷ Tsy nanan-janaka izy, fa momba i Elizabeta, ary efa samy zokiolona ihany izy mivady.

⁸ Indray andro, nony nanao ny raharahan’ny mpisorona teo anatrehan’Andriamanitra i Zakaria araka ny anjaran’ny antokony,

⁹ dia voatendrin’ny loka araka ny fanaon’ny mpisorona hiditra ao amin’ny Tempolin’ny Tompo, hanolotra ny emboka,

¹⁰ ary ny vahoaka rehetra dia tao alatrano no nivavaka, tamin’ny ora fanolorana ny emboka.

¹¹ Fa nisy Anjelin’ny Tompo niseho taminy, nitsangana teo ankavanan’ny ôtely fanolorana ny emboka.

¹² Taitra i Zakaria nony nahita azy ka raiki-tahotra.

¹³ Fa hoy ny Anjely taminy. «Aza matahotra, ry Zakaria, fa efa nohenoina ny fangatahanao, ka i Elizabeta vadinao dia hiteraka zazalahy aminao, ary Joany no hataonao anarany:

¹⁴ dia ho faly sy ho ravo ianao, ary maro koa no ho faly amin’ny hahaterahany.

¹⁵ Fa ho lehibe eo imason’ny Tompo izy: tsy hisotro divay na zava-mahamamo izy, sady ho fenon’ny Fanahy Masina hatrany an-kibon-dreniny;

¹⁶ maro amin’ny zanak’i Israely no hampodiny amin’ny Tompo Andriamanitra,

¹⁷ dia hialoha azy amin’ny fanahy sy ny herin’i Elia izy hampody ny fon’ny ray ho amin’ny zanaka ary ny tsy manoa ho amin’ny fahendren’ny olo-marina, hamboatra firenena voavonona ho an’ny Tompo.»

¹⁸ Dia hoy i Zakaria tamin’ny Anjely: «Inona no hahafantarako izany fa izaho efa antitra, ary koa efa zokiolona ny vadiko?».

¹⁹ Namaly ny Anjely nanao taminy hoe: «Izaho no Gabriely, ilay mitsangana eo anatrehan’Andriamanitra, ary nirahina aho hiteny aminao hampandre anao izany teny mahafaly izany;

²⁰ fa indro ho moana ianao ka tsy hahay miteny ambara-pahatongan’izany, noho ianao tsy nino ny teniko, izay ho tanteraka amin’ny fotoan’androny.»

²¹ Niandry an’i Zakaria anefa ny olona ka gaga noho izy naharitra ela tao amin’ny Tempoly;

²² kanjo nony nivoaka izy, dia tsy nahay niteny taminy, ka fantatry ny olona fa nahita fahitana tao anatin’ny Tempoly izy: dia baikon’ny moana no nitenenany taminy, fa moana tokoa izy.

²³ Ary nony tapitra ny anjara androny amin’ny raharahany, dia nody tany an-tranony izy.

²⁴ Ary taorian’izany andro izany dia nitoe-jaza i Elizabeta vadiny, ary niery dimy volana ka nanao hoe:

²⁵ «Izao no nataon’ny Tompo tamiko, tamin’ny andro nitsinjovany ahy hahafa-tondro-maso ahy amin’ny olona.»

Ny Filazana

²⁶ Ary rehefa nandray enina izy, dia nirahin’Andriamanitra ny Anjely Gabriely ho any amin’ny tanàna anankiray any Galilea atao hoe Nazareta,

²⁷ ho any amin’ny Virjiny anankiray fofom-badin’ilay lehilahy atao hoe Josefa, taranak’i Davida, ary ny anaran’ilay Virjiny dia Maria.

²⁸ Ary nony niditra tao aminy ilay Anjely dia nanao hoe: «Arahaba, ry ilay feno hasoavana; ny Tompo ao aminao; nosoavina noho ny vehivavy ianao.»

²⁹ Taitra izy nahare izany, ka nieritreritra izay tokony ho hevitr’izany fiarahabana izany.

³⁰ Fa hoy ny Anjely taminy: «Aza matahotra, ry Maria, fa sitrak’Andriamanitra ianao.

³¹ Ary indro, hitoe-jaza ianao, ka hiteraka zazalahy, ary Jesoa no hataonao Anarany.

³² Ho lehibe Izy ka hatao hoe Zanaky ny Avo indrindra; dia homen’Andriamanitra ny fiketrahan’i Davida rainy Izy, ka hanjaka mandrakizay amin’ny taranak’i Jakôba,

³³ ary tsy hanam-pahataperana ny fanjakany.»

³⁴ Fa hoy i Maria tamin’ilay Anjely: «Ahoana no hahatongavan’izany, fa tsy mahalala lahy aho?»

³⁵ «Ny Fanahy Masina, hoy ny Anjely namaly azy, no ho tonga ao aminao, ary ny herin’ny Avo indrindra hanaloka anao; noho izany dia hatao hoe Zanak’Andriamanitra ny Masina haterakao.

³⁶ Ary indro, i Elizabeta rahavavinao dia efa mitoe-jaza koa na dia efa antitra aza, ary efa mandray enina izy izao ilay natao hoe momba,

³⁷ fa tsy hisy tsy ho hain’Andriamanitra atao.»

³⁸ Dia hoy i Maria: «Inty aho ankizivavin’ny Tompo, aoka anie ho tanteraka amiko araka ny teninao.» Dia niala teo aminy ny Anjely.

Ny Famangiana

³⁹ Niainga i Maria tamin’izany andro izany, ka nandeha haingana ho any amin’ny tany be tendrombohitra, ho any an-tanàna anankiray any Jodà,

⁴⁰ ary niditra tao an-tranon’i Zakaria ka niarahaba an’i Elizabeta.

⁴¹ Nony vao ren’i Elizabeta ny fiarahaban’i Maria azy, dia nientana ny zaza tao an-kibony, ary feno ny Fanahy Masina i Elizabeta,

⁴² ka nanandra-peo niantso mafy hoe: «Nosoavina noho ny vehivavy rehetra ianao, ary nosoavina ny hateraky ny kibonao.

⁴³ Ary avy aiza amiko izao no mba vangian’ny Renin’ny Tompoko aho?

⁴⁴ Fa indro raha vao ren’ny sofiko ny feonao niarahaba ahy, dia nientan-kafaliana ny zaza tato an-kiboko.

⁴⁵ Ary sambatra ilay nino fa ho tanteraka izay nampilazain’ny Tompo taminy!»

⁴⁶ Ary hoy i Maria: «Mankalaza ny Tompo ny fanahiko,

Ny «Magnificat»

⁴⁷ ary faly sy ravo amin’Andriamanitra Mpamonjy ahy ny foko,

⁴⁸ fa notsinjoviny ny fiambanian’ny ankizy vaviny. Fa indro, hatramin’izao, dia hataon’ny taranaka rehetra hoe sambatra aho,

⁴⁹ satria efa nanao zavatra lehibe tamiko ilay Mahefa. Ary masina ny Anarany,

⁵⁰ sady amin’izay matahotra Azy hatramin’ny taranaka fara mandimby ny famindram-pony.

⁵¹ Nahefa asa mahery tamin’ny sandriny Izy: dia nampihàfiny izay niavonavona tamin’ny fisainan’ny fony;

⁵² Naongany hiala tamin’ny fiketrahany ny mpanapaka, fa ny ambany kosa nasandrany;

⁵³ ary ny noana novokisany soa, fa ny mpanan-karena kosa dia nampodiny mitondra tanam-polo.

⁵⁴ Niahy an’i Israely mpanompony Izy, fa tsy hadinony ny famindram-pony

⁵⁵ tamin’i Abrahama sy ny taranany mandrakizay, araka ny efa voalazany tamin’ny razantsika.»

⁵⁶ Nitoetra tokony ho telo volana tao amin’i Elizabeta i Maria vao nody tany an-tranony.

Ny nahaterahan’i Joany Batista sy ny famangian’ny mpiara-monina

⁵⁷ Ary nony tonga ny andro hiterahan’i Elizabeta dia tera-dahy izy.

⁵⁸ Ary nahare ny mpiara-monina aminy sy ny havany fa efa nankalazain’ny Tompo ny famindram-pony taminy, ka dia niara-nifaly taminy.

Ny namoràna an’i Joany Batista

⁵⁹ Nony afaka havaloana, dia tonga izy hamora ny zaza, ary Zakaria, araka ny anaran-drainy no ndeha hataony anarany.

⁶⁰ Fa niteny reniny nanao hoe: «Tsia, tsy izany, fa hatao hoe Joany izy.»

⁶¹ Fa hoy izy ireo taminy: «Tsy misy na dia iray aza amin’ny havanao manana izany anarana izany.»

⁶² Ary nanao baikon’ny moana tamin’ny rainy izy ireo nanontany izay tiany hatao anarany.

⁶³ Dia nangataka fàfana izy, ary nanoratra hoe: «Joany no anarany»; ka gaga daholo izy rehetra.

⁶⁴ Niaraka tamin’izay dia nisokatra ny vavany, ary nivaha ny lelany, dia niteny izy ka nisaotra an’Andriamanitra.

⁶⁵ Azon’ny tahotra avokoa ny mponina rehetra teny manodidina, ary niely hatraiza hatraiza tany amin’ny tendrombohitr’i Jodea izany zava-mahatalanjona rehetra izany.

⁶⁶ Ary izay rehetra nahare dia nandatsaka izany tao am-pony ka nanao hoe: «Ho inona re ity zaza ity? Fa nomba azy ny tanan’ny Tompo.»

Ny «Benedictus»

⁶⁷ Ary dia feno ny Fanahy Masina i Zakaria rainy, ka naminany hoe:

⁶⁸ «Hisaorana anie ny Tompo Andriamanitr’i Israely, noho Izy namangy sy nanavotra ny olony,

⁶⁹ ary nanangana tandro-pamonjena ho antsika tao amin’ny fokon’i Davida mpanompony,

⁷⁰ araka ny nolazainy tamin’ny vavan’ireo mpaminaniny masina hatramin’ny andro tany aloha,

⁷¹ mba hamonjy antsika amin’ny fahavalontsika sy amin’ny tanan’izay rehetra mankahala antsika.

⁷² He izany nanaovany famindram-po tamin’ny razantsika sy nahatsiarovany ny fanekeny masina,

⁷³ dia ilay fianianana nataony tamin’i Abrahama razantsika hanome antsika

⁷⁴ fahafahana amin’ny tanan’ny fahavalontsika, mba hanompoantsika Azy tsy aman-tahotra,

⁷⁵ amim-pahamasinana sy fahamarinana, eo anatrehany amin’ny andro rehetra hiainantsika.

⁷⁶ Ary ianao kosa, ry zaza, dia hatao hoe mpaminanin’ny Avo indrindra, fa hialoha ny Tompo ianao hamboatra ny halehany,

⁷⁷ mba hanome ny olony ny fahalalàm-pamonjena amin’ny famelana ny helony.

⁷⁸ Noho ny halehiben’ny famindram-pon’ny Andriamanitsika nampiposaka ny Masoandro hamangy antsika avy any ambony,

⁷⁹ mba hanilo izay rehetra mipetraka ao amin’ny maizina sy amin’ny aloky ny fahafatesana, ka hitarika ny diantsika ho amin’ny làlam-piadanana.»

Ny fiainana miafin’i Joany Batista

⁸⁰ Dia nitombo sy nihanahery fanahy ny zaza, ary nitoetra tany an’efitra, ambara-pahatongan’ny andro hisehoany amin’i Israely.