Josoa 16 - Baiboly Katolika

Ny fokon’i Efraîma

¹ Ny an’ny taranak’i Josefa araka ny filokana: Ny any atsinanana dia niantomboka avy eo amin’i Jordany ao Jerikô; avy eo dia tonga amin’ny efitra izay miakatra avy any Jerikô hatramin’i Betela mihazo ny tendrombohitra.

² Avy ao Betela ny faritry ny tany nihatra tamin’ny Lozy, ary nihazo tamin’ny faritry ny tanin’ny Arkeanina ao Atarôta,

³ dia nidina ao andrefana mankany amin’ny tanin’ny Jefletianina, hatramin’ny tanin’ny Betôrôna ambany ka hatrany Gazera, dia nihatra amin’ny ranomasina.

⁴ Izany no lova noraisin’ny taranak’i Josefa, dia i Manase sy i Efraima.

⁵ Izao no faritry ny tanin’ny taranak’i Efraima araka ny fianakaviany: ny faritry ny lovany dia izao: amin’ny atsinanana, Ataret-Adara hatrany Betôrôna ambony.

⁶ Amin’ny lafiny andrefana ny faritry ny tany dia nipaka tamin’i Makmetata any avaratra, ary miolaka ny faritry ny tany atsinanana mankany Tanata-Selao, dia nihazo teo anoloany mankamin’ny atsinanan’i Janôe.

⁷ Avy eo Janôe dia nidina nankany Atarôta sy Naaratà, nikasika an’i Jerikô, ka nihatra an’i Jordany.

⁸ Avy eo Tafohà dia nandroso any amin’ny lafiny andrefana ho any amin’ny ranomasina. Izany no lovan’ny taranak’i Efraima araka ny fianakaviany.

⁹ Nisy tanàna koa samy omban’ny zana-bohiny avy nitokana teo afovoan’ny lovan’ny taranak’i Manase, ka an’ny taranak’i Efraima.

¹⁰ Tsy nandroaka ny Kananeanina nonina teo Gazera izy ireo, ka niara-nonina tamin’i Efraima mandraka androany ny Kananeanina, nefa ampanaoviny fanompoana kosa.