Jaona 13 - Baiboly Katolika

B. Ny Sakafo farany

¹ Talohan’ny fetin’ny Paka, fantatr’i Jesoa fa tonga ny fotoana hialany amin’izao tontolo izao ho any amin’ny Ray, ka rehefa notiaviny tokoa ny Azy izay amin’izao tontolo izao, dia fara fitiavana no nataony taminy.

² Ary raha mbola teo amin’ny fisakafoana hariva, i Jodasy IsKariota zanak’i Simôna moa efa nomen’ny devoly hevitra hamadika Azy,

³ i Jesoa kosa nahalala fa efa napetraky ny Ray eo an-tanany ny zavatra rehetra, ary Andriamanitra no niaviany sady Andriamanitra koa no hiverenany,

⁴ dia nitsangana teo am-pihinanana Izy: napetrany ny lambany, nalainy ny lamba famaohana ka nisikinany;

⁵ raha efa izany, nampidina rano tamin’ny tavy Izy dia nanomboka nanasa ny tongotry ny mpianatra, sy namaoka azy tamin’ny lamba nisikinany.

⁶ Ary nanatona an’i Simôna Piera Izy; fa hoy i Piera taminy: «Adre! Ianao ve, Tompoko, no hanasa ny tongotro?»

⁷ Dia namaly i Jesoa ka nanao taminy hoe: «Tsy fantatrao izao izay ataoko, fa ho fantatrao aoriana.»

⁸ Fa hoy i Piera taminy: «Sanatria, tsy hanasa ny tongotro na oviana na oviana Ianao.» Ka hoy i Jesoa namaly azy: «Raha tsy sasako ianao, dia tsy hanana anjara amiko.»

⁹ Dia hoy i Simôna Piera taminy: «Tsy ny tongotro ihany àry, Tompoko, fa ny tanako sy ny lohako koa.»

¹⁰ Fa hoy i Jesoa taminy: «Izay efa nandro, tsy mila hosasana afa-tsy ny tongotra, fa efa madio avokoa ny tenany manontolo. Ary ianareo koa dia madio, nefa tsy ianareo rehetra.»

¹¹ Izy no nanao hoe: Tsy ianareo rehetra no madio, dia satria fantany ilay hamadika Azy.

¹² Nony efa voasasany ny tongotr’izy ireo, dia nandray ny lamba Izy, ka nipetraka indray, ary nanao taminy hoe: Moa fantatrareo va izay nataoko taminareo?

¹³ Ianareo manao Ahy hoe Mpampianatra sy Tompo, ary marina ny filazanareo; fa izany tokoa Aho.

¹⁴ Ka raha Izaho Tompo sy Mpampianatra aza nanasa ny tongotrareo, ianareo samy ianareo koa dia tsy maintsy mifanasa tongotra;

¹⁵ satria nomeko fianarana ianareo mba hanaovanareo toy ny nataoko taminareo.

¹⁶ Lazaiko marina dia marina aminareo: Ny mpanompo tsy ambony noho ny tompony; na ny iraka tsy ambony noho izay naniraka azy.

¹⁷ Raha fantatrareo izany, dia ho sambatra ianareo raha manao izany.

¹⁸ Tsy ianareo rehetra no antsoiko (fantatro izay nofidiko); fa mba ho tanteraka ny Soratra Masina manao hoe: Izay miara-mihina-mofo amiko no nanainga ny ombalahin-tongony hamely Ahy.

¹⁹ Ilazako izany ianareo ankehitriny dieny mbola tsy tanteraka izany, mba hinoanareo rehefa tanteraka fa Izaho Aho.

²⁰ Lazaiko marina dia marina aminareo: Izay mandray izay irahiko, dia mandray Ahy; ary izay mandray Ahy, dia mandray Izay naniraka Ahy.

Fanambaràna ny hamadihan’i Jodasy

²¹ Rehefa nilaza izany i Jesoa, nangorohoro ny fony, ka nanambara mazava Izy nanao hoe: «Lazaiko marina dia marina aminareo, fa hamadika Ahy ny anankiray aminareo.»

²² Dia nifampijery ny mpianatra, fa tsy nahalala izay iray nolazainy.

²³ Ary ny anankiray tamin’izy ireo, ilay tian’i Jesoa no teo anilany niankina tamin’ny tratrany,

²⁴ ka nanàtsika azy i Piera nanao taminy hoe: «Iza ilay lazainy izay?»

²⁵ Dia naraikany tamin’ny tratran’i Jesoa ny lohany, ka hoy izy taminy: «Iza moa izany, Tompoko?»

²⁶ Ary hoy i Jesoa hoe: «Izay hotolorako sombi-mofo natsoboka tamin’ny ro no izy.» Dia natsobony ny mofo ka natolony an’i Jodasy IsKariota zanak’i Simôna.

²⁷ Vantany vao nihinana ilay sombi-mofo i Jodasy dia nidiran’ny demony, ka hoy i Jesoa taminy: «Ataovy haingana izay hataonao.»

²⁸ Tsy nisy nahalala izay anton’ny nilazany izany taminy anefa ry zareo izay nipetraka nihinana;

²⁹ fa noho i Jodasy nitahiry ny kitapom-bola, dia nataon’ny sasany fa izao no nolazain’i Jesoa taminy: Vidio ny zavatra ilaintsika amin’ny fety, na mba omeo zavatra ny mahantra.

³⁰ Vao nandray ilay sombi-mofo i Jodasy dia nivoaka niaraka tamin’izay. Efa alina ny andro tamin’izany.

³¹ Nony efa nivoaka izy, dia hoy i Jesoa: «Nomem-boninahitra izao ny Zanak’olona, ary Andriamanitra kosa no nomena voninahitra eo aminy.

³² Ary raha Andriamanitra no nomem-boninahitra eo aminy, dia Andriamanitra kosa no hanome voninahitra Azy eo amin’ny Tenany sy hanome voninahitra Azy faingana.»

Ny veloma farany

³³ «Anaka, kely foana sisa hitoerako aminareo. Hitady Ahy ianareo, ary toy ny voalazako tamin’ny Jody hoe: Izay alehako tsy azonareo aleha no lazaiko aminareo koa ankehitriny.

³⁴ Didy vaovao no omeko anareo, dia izao: Mifankatiava ary aoka ho toy ny nitiavako anareo no hifankatiavanareo.

³⁵ Izany no hahafantaran’ny olona rehetra fa mpianatro ianareo, raha mifankatia.»

³⁶ Hoy i Simôna Piera taminy: «Ho aiza Ianao, Tompoko?» Dia hoy i Jesoa: «Ankehitriny tsy azonao aleha izay alehako, fa any aoriana mbola hanaraka Ahy ianao.»

³⁷ Ary hoy i Piera taminy: «Ahoana, Tompoko, no tsy ahazoako manaraka Anao ankehitriny? Hafoiko ho Anao hatramin’ny aiko aza.»

³⁸ Fa hoy i Jesoa: «Hafoinao ho Ahy ny ainao? Lazaiko marina dia marina aminao: Alohan’ny maneno akoho, dia handà Ahy intelo ianao.»