Genesisy 48 - Baiboly Katolika

Raisin’i Jakôba sy tsofiny rano ireo zanak’i Josefa roa lahy

¹ Taorian’izany nisy tonga nilaza tamin’i Josefa hoe: «Indro marary i rainao.» Nentiny niaraka taminy i Manase sy i Efraima zanany mirahalahy.

² Dia nilazana i Jakôba natao hoe: «Indro tamy i Josefa zanakao, ho aty aminao.» Ka naka hery i Israely niarina teo ambony farafarany.

³ Ary hoy i Jakôba tamin’i Josefa:

⁴ «Andriamanitra mahefa ny zavatra rehetra dia efa niseho tamiko tany Loza, any amin’ny tany Kanaana ary nitso-drano ahy, nanao hoe: ‹Hahamaro anaka anao, hampitombo anao Aho, hahatonga anao ho firenena maro Aho, ary homeko ny taranakao mandimby anao ity tany ity, hananany azy mandrakizay.›

⁵ Koa ankehitriny, ny zanakao roa lahy izay naterakao tatỳ Ejipta, talohan’ny nahatongavako aty aminao teto Ejipta, dia ho ahy; ho ahy, tahaka an-dRobena sy i Simeôna koa i Efraima sy i Manase,

⁶ fa ny zanakao izay naterakao taorian’ireo dia ho anao; ary amin’ny anaran’ireo rahalahiny ihany no hiantsoana azy raha ny amin’ny anjara lovany.

⁷ Ary izaho fony niverina avy any Padàna dia maty teo anatrehako teny an-dalana i Rasela tany amin’ny tany Kanaana, efa mby lavitra akaiky an’i Efratà, ka dia naleviko teo, amin’ny lalana mankany Efratà, dia Betlehema izany.»

⁸ Nony nahita iretsy zanak’i Josefa i Israely dia nanontany hoe: «Iza moa ireto?»

⁹ Ka hoy i Josefa tamin-drainy: «Ireo no zanako nomen’Andriamanitra ahy tatỳ» Ary hoy izy: «Mba ampandrosoy kely ho eto anilako izy, hotsofiko rano.»

¹⁰ Fa efa nanjavona ny mason’i Israely noho ny fahanterana, ka tsy nahita. Dia nampandrosoin’i Josefa nankeo anilany ireo, ka sady nanoroka no namihina azy i Israely.

¹¹ Ary hoy i Israely tamin’i Josefa hoe: «Tsy nanampò hahita tava anao intsony aho, kanjo indro ataon’Andriamanitra mahita ny taranakao aza.»

¹² Nesorin’i Josefa hiala teo anelanelan’ny lohali-drainy aloha izy mirahalahy, dia niankohoka tamin’ny tany teo anatrehany izy;

¹³ dia noraisin’i Josefa izy mirahalahy, i Efraima tamin’ny ankavanany, ho eo ankavian’i Israely; ary i Manase tamin’ny ankaviany, ho eo ankavanan’i Israely, dia nampandrosoiny izy ireo.

¹⁴ Natsotran’i Israely ny tanany havanana, ka napetrany tamin’ny lohan’i Efraima izay zandriny; ary ny tanany havia tamin’ny lohan’i Manase; niniany natao toy izany ny tanany, fa i Manase no zokiny.

¹⁵ Dia nitso-drano an’i Josefa izy, ka nanao hoe: «Enga anie ka ilay Andriamanitra izay teo anatrehany no nandehanan’i Abrahama sy i Isaaka razako, ilay Andriamanitra izay namelona ahy hatrizay niainako ka mandrak’ankehitriny,

¹⁶ ary ilay anjely namonjy ahy ho afaka tamin’ny loza rehetra, hitso-drano an’ireto zaza ireto. Aoka hantsoina amin’ny anarako, sy amin’ny anaran’i Abrahama sy i Isaaka razako izy; ary hitombo ho maro dia maro, eo amin’ny tany.»

¹⁷ Nony hitan’i Josefa fa napetra-drainy tamin’ny lohan’i Efraima ny tanany havanana, dia tsy sitrany izany, ka nalainy ny tanan-drainy hesoriny eo ambonin’ny lohan’i Efraima hatao eo amin’ny an’i Manase.

¹⁸ Ary hoy i Josefa tamin-drainy: «Tsy izao no izy, ry ikaky, fa ity no lahy matoa ka apetraho eo amin’ny lohany ny tananao havanana.»

¹⁹ Tsy nety anefa i rainy fa hoy izy: «Fantatro ihany anaka. Ho tonga firenena koa izy, ho tonga lehibe koa izy, kanefa ho lehibe noho izy ny zandriny, ary ho tonga firenena maro ny taranany.»

²⁰ Dia nitso-drano azy ireo izy, tamin’izany andro izany, ka nanao hoe: «Aminao no hitsofan’i Israely rano, hoe: ‹Hataon’Andriamanitra tahaka an’i Efraima sy i Manase anie ianao.› » Toy izany no nanaovany an’i Efraima ho alohan’i Manase.

²¹ Ary hoy i Israely tamin’i Josefa: «Indro aho efa ho faty. Kanefa Andriamanitra homba anareo ka hampody anareo ho any amin’ny tanindrazanareo indray.

²² Ary omeko ho tombon-dahinao amin’ireo rahalahinao ny zaratany anankiray, izay nalaiko tamin’ny sabatro sy ny tsipìkako, teo an-tanan’ny Amôreana.»