1Mpanjaka 21 - Baiboly Katolika

4. NY TANIMBOALOBOK’I NABOTA Tsy nanaiky hivarotra ny tanimboalobony i Nabôta

¹ Taorian’izany zavatra izany, tao Jezrahela kosa, dia nanana tanimboaloboka anankiray i Nabôta avy ao Jezrahela, ary teo akaikin’ny lapan’i Akaba mpanjakan’i Samaria izany.

² Ka niteny tamin’i Nabôta i Akaba nanao hoe: «Avelao mba ho ahy ny tanimboalobokao, hataoko fambolena anana, fa akaiky dia akaiky ny tranoko; tanimboaloboka tsara noho izy no homeko ho takalony, na vola araka izay vidiny, raha izany no sitrakao.»

³ Fa hoy i Nabôta namaly an’i Akaba: «Hampanalavirin’i Iaveh ahy anie ny hanome ny lova avy amin’ny razako!»

I Akaba sy i Jezrahela

⁴ Nody tany an-tranony i Akaba, nanjombona sy sosotra noho ity teny nolazain’i Nabôta avy any Jezrahela taminy hoe: «Tsy omeko ny lovako avy amin’ny razako.» Dia nandry teo am-parafara izy, nampiamboho ny tavany ary tsy nihinan-kanina.

⁵ Fa nankeo aminy kosa i Jezabela vadiny, ka nanao taminy hoe: «Nahoana no manjombona ny fanahinao ary tsy homan-kanina ianao?»

⁶ Ary hoy ny navaliny azy: «Niteny tamin’i Nabôta avy any Jezrahela aho, nanao taminy hoe: Avelao hovidiko vola ny tanimboalobokao, na hotakalozako tanimboaloboka hafa, raha aleonao izany. Fa hoy izy hoe: Tsy omeko anao ny tanimboaloboko.»

⁷ Dia hoy i Jezabela vadiny taminy: «Moa ianao va no tompon’ny fanjakana amin’i Israely ankehitriny? Koa miarena, hano ny hanina, ary aoka hifaly ny fonao, fa tenako no hanome anao ny tanimboalobok’i Nabôta avy ao Jezrahela.»

Ny namonoana an’i Nabôta

⁸ Dia nanoratra taratasy tamin’ny anaran’i Akaba izy, nasiany tombokasen’ny mpanjaka, nalefany ho any amin’ny loholona sy ny andriambaventy ao an-tanàna miara-monina amin’i Nabôta.

⁹ Ary izao no nosoratany ao amin’ny taratasy: «Miantsoa andro fifandian-kanina ka apetraho eo alohan’ny vahoaka i Nabôta;

¹⁰ ary manangàna olon’i Beliala roa lahy eo anatrehany, hiampanga azy toy izao: Nanozona an’Andriamanitra sy ny mpanjaka ialahy! Dia ento mankany ivelany izy, ka torahy vato ho faty.»

¹¹ Nanao araka izay nanirahan’i Jezabela holazaina aminy araka izay voasoratra amin’ny taratasy nampitondrainy azy, ny olona tao an-tanànan’i Nabôta, ny loholona sy andriambaventy nonina tao an-tanànany.

¹² Niantso andro fifadian-kanina izy, napetrany teo alohan’ny vahoaka i Nabôta,

¹³ ary nandroso ho eo anatrehany ny olona roa lahy zanak’i Beliala. Ary niampanga an’i Nabôta teo anatrehan’ny vahoaka ireo olon’i Beliala nanao hoe: «Nanozona an’Andriamanitra sy ny mpanjaka i Nabôta!» Dia nentin’izy ireo nankany ivelan-tanàna izy, notoraham-bato ka maty.

¹⁴ Dia naniraka tany amin’i Jezabela izy ireo, nilaza hoe: «Notoraham-bato i Nabôta ka maty.»

¹⁵ Nony ren’i Jezabela fa notoraham-bato i Nabôta ka maty, dia hoy izy tamin’i Akaba: «Mitsangana ka alao ho anao ny tanimboalobok’i Nabôta avy any Jezrahela izay nolaviny tsy hamidy vola taminao, fa efa tsy velona intsony i Nabôta, fa efa maty izy.»

¹⁶ Rehefa ren’i Akaba fa hoe maty i Nabôta, dia niainga izy, nidina nankany amin’ny tanimboalobok’i Nabôta avy ao Jezraela haka izany ho azy.

Ambaran’i Elia ny fanamelohan’Andriamanitra

¹⁷ Fa tonga tamin’i Elia Tesbita kosa ny tenin’i Iaveh nanao hoe:

¹⁸ «Mitsangàna ianao, ka midìna hihaona amin’i Akaba mpanjakan’i Israely, manjaka ao Samaria. Ao an-tanimboalobok’i Nabôta ao izy izao, fa nidina nankany haka izany ho azy.

¹⁹ Ka mitenena aminy hoe: Izao no lazain’i Iaveh: Moa tsy namono va ianao sy naka lovan’olona koa? Dia hiteny aminy ianao hoe: Izao no lazain’i Iaveh: Eo amin’ny toerana nilelafan’ny alika ny ran’i Nabôta ihany no hilelafan’ny alika ny ran’ny tenanao koa.»

²⁰ Ary hoy i Akaba tamin’i Elia: «Azonao va aho, ry ilay fahavaloko?» Ka hoy ny navaliny: «Azoko ianao, satria nivaro-tena hanao izay ratsy eo imason’i Iaveh ianao.

²¹ Indro aho hahatonga loza aminao: hataoko mafana ianao, haringako ny lehilahy rehetra an’i Akaba na ny andevo, na ny olona afaka, amin’i Israely,

²² ka dia hampanahafiko ny tranon’i Jerôbôama zanak’i Nabata sy ny tranon’i Ahiasa, ny tranonao, satria mihaika Ahy hitezitra ianao, sady nampanota an’i Israely.»

²³ I Jezabela koa, nasian’i Iaveh teny hoe: «Hohanin’ny alika eny akaikin’ny hadin’i Jezrahela i Jezabela.»

²⁴ Izay an’ny tranon’i Akaba ka maty an-tanàna dia hohanin’ny alika, ary ny maty an-tsaha kosa, hohanin’ny voromanidina.

²⁵ Fa tena tsy nisy nivaro-tena toa an’i Akaba hanao izay ratsy eo imason’i Iaveh, satria i Jezabela vadiny no namporisika azy.

²⁶ Nanao toe-pitondran-tena vetaveta indrindra izy tamin’ny nandehanany amin’ny sampy, araka ny fomba rehetra fanaon’ny Amôreana, izay noroahin’i Iaveh teo anoloan’ny zanak’i Israely.

Fanenenan’i Akaba

²⁷ Kanjo nony nandre ny tenin’i Elia i Akaba dia norovitiny ny fitafiany, lasàka no natafiny ny tenany, nifady hanina izy, nentiny nandry ny lasàka, ary nitsilasilasy fandeha izy.

²⁸ Ka dia tonga tamin’i Elia Tesbita ny tenin’i Iaveh nanao hoe:

²⁹ «Efa hitanao va ny nanetren’i Akaba ny tenany teo anatrehako? Ka noho izy nanetry tena teo anatrehako, dia tsy hahatonga loza amin’ny androny kosa aho fa amin’ny andron-janany vao hahatonga loza amin’ny tranony aho.»