NEHEMIA 4 - ASII LAKDAP Bible (BSI)

Nehemia Raq Jaqsham Tiibanbiti Tangto

¹ Riita Sanballat raq naishiq Jehudinok raq ruk khetuk tiihea hai jaqsham ka aheawiq miishe hai wan kai nguta tsütsa ka taito. Kra tai raüta, apaiq ka pinthum amok dung dung she khiqriq wanto. Kiimaq atsan khiqtsi ma, naishiq ka thophi riiqphi, abom namtoktok shummii saisi wanto.

² Apaiq kongtibi nai Samarianok man na, akha saisito. “Liirong laq! Ara manghü rahü Jehudinok ara! Tsangshiq ka jamlai tsangkati nguto tiimawi tla? Ngohea dea, ara ashthen arbaiq Jerusalem chela ruk ka, tsangshiq raq thongshi mitiihea hai wan lot rong i ngutiidea shea tankhan tla? Tsangshiq raq nyamse honglu, takuq raüta, ruk ka ranaiqshi niili tlothit mihai lot rong i ngutiisha tiimawi tla? Tsangshiq raq wakhiimbung sinchiitsap ikha long riiphongrong tlaq ka riichom raüta, ruk ka thongshiri mitiichap lot rong i ngutiisha tiimawi tla?”

³ Kiitiikaq, Tobia kiimin apaiq tho na chapshat riito. Kiimaq apaiq riimin arewe bom jai na, rongsaqsaq akha hali slai liito. “Ara tsangshiq raq jamkhiinok ruk haitiikai ngutiiwa tiima tla nya? Arka miikakoi kaü düwa raü min thamsaqli mithamki?”

⁴ Ara tailata ngi raq akha achu jaükang. “O, Shiikeawe lei, tsangshiq raq naishiq shummii tlaq kra tai liilii! Tsangshiq raq maiq slailii tlaq kra, tsangshiq maiqmii khuthaq niitiq mitiinikhi wan laq. Tsangshiq jaq na jamlai phan wa sitlaq kra maiq raq minyea wan laq, kiimaq chiqse rewe raq ka, pongmung na, munglu shumwi ma mitsuq wan laq.

⁵ Tsangshiq raq abi kiimung tlaq mra ka naqdii kuqkiq. Kiimaq tsangshiq ngarai ka naqlaq kiqlii. Jamkhano ngukla, tsangshiq raq naishiq ruk tiihea jaqsham kra shummii tlo.”

⁶ Krai mren naishiq ka nungpaq mai maq ruk tiihea jaqsham kli shiikut wankai. Kiimaq, jaqlo liipan niilishe naishiq raq ruk ka rajam niishe saüli hailot kai. Jamkhano ngukla, mungmaiqse ka tiima tsantsii ashii maq chap shat jaqsham wankai.

⁷ Shatmaq, Sanballat, Tobia, kiimaq Arabia hong na siti nok raq, Ammon hong na sitinok raq, kiimaq Ashdod hong na sitinok raq, naishiq raq Jerusalem chela ruk tiihea ka lot wan kai she nguta taito. Ruk heawea wa apu thun ka kunkun she tiitang wanto nguta taito. Kriikha na tsangshiq ka kai khiqriq wanto.

⁸ Kra ningkhan she, tsangshiq wiita ka kiqshi maq ri raüta Jerusalem khat wa miitu, reshe shunto. Raüta naishiq ka tiimrurang lai nguta mat kha tanto.

⁹ Shatmaq naishiq riika, Shiikeawe jaq wa achuli jaükai. Laita tsangshiq saüwa raüjaq akhat ma nguta, rewe sreabi tsea laita, sontri tsongshat maq ranaiq rawa khekham maq siwan kai.

¹⁰ Juda wang na siti nokmaiqse raq akha tiimangchan shingeto: “Longmaq aruk khetuk atiibunbaiq; Longrong pahea ahobaiq lotmai; Akhiiwiqwiq ruk ka jamriim mo mihai rong i?”

¹¹ Naishiq jaqtibi raq akha riichongto, “Nashiq ka ahukse maq kilaita, tsangshiq phong na phongtsok laita, tsangshiq ka mikhat baiq rong i. Laita mijiipbaiq rong i. Tsangshiq raq nashiq saükai tho ka hemak miraq. Laita jaqsham ka mibon baiq rong i.”

¹² Shatmaq, naishiq jaqtibi raq, naishiq khatkai ma rechap sürii tlaq akhingtek na, rewenok rai hiqshong shi na siti Jehudinok ka, naishiq phana kilili raüta, kra tsütsa ka naishiq ma tiitai kilili riitlo.

¹³ Arkha niishe, ngi raq jaqshamti maiq loweatek raq nepjasai hi wiraq, piq kii shamraq, kiimaq kali liq wiraq chhaq miishe tiichap wan kang. Latiishe, ruk pu mitiihea lot shaq baba thun kiijaq, maiqweraü aweatek maq ruk jai ba kiina sontri tsong shat maq tiikhe kang.

¹⁴ Ngi raq mungmaiqse ka, tsan na chapa asi chhikang. Kra ningkhan, ngi raq tsangshiq ma, kiimaq tsangshiq khuthaq na ashun sheati welabi ma, kiimaq siihiipbi ma, “Nashiq jaqtibi ma naqhai rongkiq. Tsan na tiitsang rong laq; Tatiwe ka phiiptsi jiiptsi. Apaiq ka nammung miitu, namsetiim miitu, nam chaktiim miitu, kiimaq namshiq jamkun miitu re mikhat.”

¹⁵ Kiijiishe, nai jaqtibi raq, tsangshiq raq jamlai wa thiikho thutlaq kra, naishiq raq sapto she nguta tsütsa ka taito. Kiimaq, tsangshiq raq rewa mat raü shun wantaq kra, Shiikeawe raq chumbaiqto she nguta takto. Kiijiishe, naishiq tarü maiqmiimii jaqthiq kiijaq jang rang laitiishe, ruk tiihea jaqsham ka, shamrang she sham nongkai.

¹⁶ Kriimiiphat she, isengi wa khoko riika, ruk tiihea hai jaqsham, kiimaq khoko riika, rekhat miirii samtong theapak samraq, kiimaq jaq na piqjong doraq, kiimaq liiqjong wiraq, kiimaq wuchi liq wiraq miishe, sontri tsongti ka rekhe, kiimaq mungmaiqse khoko riika, ruk tiihea hai she shiikut wan kai. Kiimaq naishiqnok welabi riimin

¹⁷ ruk tiihea hai wandamti rai kiqshi miishe chap wan damto. Kiimaq ruk hai chang, phanrap hupsam raa tlaq kra chomke wanti thun raq dongdii min, jaqko maq jaqsham, kiimaq jaqko niika ja, riimak la piqkii sham raq miili she, ruk ka hai wan damto.

¹⁸ Kiimaq, ruk hai wanti riimin, maiqmii chhii na nepja hi wiraq chhaq miili, jaq ka shamto. Kiimaq chiq are dong raüjaq boli tsütiwe ka ngi rai, ngi tho na tiinap shat maq sito.

¹⁹ Ngi raq mungmaiqse ma nai siihiipbi ma, kiimaq welabi ma, akha chongkuq kang, “Nashiq raq ruk pu tiihea wantiikai arka, pongba riiba na, aluluwiq na riinyin laita jaqsham chang riikito. Nashiq nai nashiq heawea na alulu wiq traikikai.

²⁰ Arningkhan, namshiq raq boli tsü taihan jiila, namshiq ka ngi tro na riitam wan rong laq. Nashiq Shiikeawe raq nashiq re ka mikhat kuq.”

²¹ Krai mren, wranaiqtek ranap chu maq chap wan laita, raji ranyaq na, raiqsaiq dong wantlaq akhing na saülili, naishiq phong wa maiq khoko riika, ruk tiihea hai jaqsham, kiimaq khoko riika, sontri tsong, piq doraq maq kongti jaqshamti kra khe chap wan tiikai.

²² Kra akhing na, ngi raq tsangshiq sheati welabi khumtek ma, ruk tiihea hai tiikai bala niika, tsangshiq welabi nai tsangshiq jaqkhong na siti jaqshamti kiimin, Jerusalem niili sichang miraq; laita rawa niimin Jerusalem chela ka sontri tsong laita kheshat riichang miraq; kiimaq ranaiq niika ruk tiihea hai chang miraq, nguta tsii chongkuq kang.

²³ Krai mren, ngi riika idü wa ikhu ikhea ka rawa na min chhut mang, dü na samshat miili kon tiikang. Kiimaq ikongtibi maiqlare wa, kiimaq i luqkhapsetiim raq lo, kiimaq i khum kheti sontri tsongti raq min, jurmin maiqmii khum wa miirii ka songhii miili, rawa niimin kiikhiili kon tiikai. Kiimaq naishiq tarü raq, maiqmii ja nai apiq ka, dü na napshat miili sikai.