Mikha 6 - ASII LAKDAP Bible (BSI)

Tatiwe Raq Israilnok Shratlo

¹ Taironglaq! Tatiwe raq Israil shra tlo, tiidolaq, Tatiwe lei, laüta ümkha raü pot thun ka che laq, pum nai kin thun raq, ümniiraq nyan tlaü kha ka mitai laq!

² Rakaü hiqwe chap chang pumjong lei, Tatiwe raq asenginok ma kha nyantlaq kra tairong laq. Tatiwe raq asengi Israilnok khuthaq na kha nyan chang asi, apaiq raq Israilnok ma akuq, shiila raü kriishe diitlo.

³ Tatiwe raq bom waitlo, “Isenginok lei, ngi raq namshiq ma jamlai wa riikang? Ngi raq namshiq ka jamkho süpsi wan kang? Chongrong liita!

⁴ Ngi raq namshiq ka Ejip mung wa tiidong wan kang. Maiqdi ma ajahan maiqjam mong wa, dokda wan kang! Ngi raq namshiq shea wanti, Mosheq, Aron, kiimaq Miriam ma tiishea wan kang.

⁵ Isenginok lei, tiitsang rong laq, Mob hokham Balak raq phaqchi toq raüta, Beor se Balaam ma namshiq tiison dan taq, kra tiima ronglaq. Kiimaq lamjap piitiip Akasia nai, Gilgal liipan na, mra ümchuwa pin wantaq kra tiima ronglaq. Hanla ngi riidea namshiq tiichhii wanto nguta misap han.”

Tatiwe Tiichochi Rilung Singa

⁶ Ngi raq ramungtan Tati Shiikeawe man na, jamlai wa mikuq wanha? apaiq shomnoq wa watiikang na? Ahea pinthum minsaüsetiim honglu wa na chaq ma, kuq wan latiishea miwaha?

⁷ Tatiwe ma skulise hingshi, riimakla, Olip tai ka khamkai ikha miishea mishreng? Ngi ngarai dokda miitu Ise chhikhuwe kriisha mikuqha?

⁸ Riimak, kiikhiika. Tatiwe raq nashiq ma, tingting tri lamphan kra chongkuq wanto. Tri kappe ka tingting maq shamlaita sichang. Nanok ka mangchan laita sichang. Shiikeawe wokhong na tsannin woknin maq siwan chang.

⁹ Tatiwe ma haisong tsü ka taksu phaqchi. Tatiwe raq chelati ma chongtlo! “Tairong laq! mungmaiqse chela na thungtlanti lei!

¹⁰ Ashut klowanti jamkun na, chaq asengtum raq ama. Kra piikii tum totlaq kriika, mungmaiqse laolii raüta alap. Tsangshiq raq tok ajiq maq, hupsam shin raüta, rithü tlo. Kra maiqmop chang tok ka, ngi raq pinthum shulii tiikang.

¹¹ Teng mak tok nai teng mak raü, langti mra ka ngi raq jamkho midiikuq?

¹² Nam mungti chiithe maiqse raq, miitsan maiqse ka, nanshanshan lao lü tlo. Namshiq tarü ajok aliiq siisaq.

¹³ Namshiq shutphit ngarai kha na, ümchaü ngi raq namshiq, shiithen baiq phawan kang she.

¹⁴ Ümniiraq dung siqhaü min, wok miphe riimak, ramtsi riili mihaü haü, ümniiraq hupsam lam wan laüta, apaü riihaü min, chiithe mijahaü riimak, ümniiraq jamlai wa rümtlaü, kra ngi raq redong na mitiithen baiqha.

¹⁵ Ümniiraq tsam ka mijang haü, shatmaq jutsiq lumaü mirhaü. Ümniiraq olip tsi tai mitiikit haü, shatmaq phaqsiq lumaü mirhaü. Ümniiraq spiqtsi tai misohaü, shatmaq nyanglu maü mirhaü.

¹⁶ Ara chongtiikang sumrum wan thun ümniiraq mirhum haü, jamkhano ngukla, ümniiraq, Hokham Omri nai ase Hokham Ahab, raq ashut tri langwantaq kra phan wan laü. Ümniiraq tsangshiq ashut tri lam ka lang wan laü, Kriikha na ngi raq ümniika mishthen baiqha. Krai mren maiq tarü raq ümniika mishummii. Maiq barapseti raq ümniika misaisi wan.”