JOSHUA 5 - ASII LAKDAP Bible (BSI)

¹ Jordan rai maq shenyap mung nü na siti kunli Amoraiqnok hokhambi raq kiimaq Mediterenian Khamjongkii binjü mung thun na siti Kanannok hokhambi thun kunli raq, Israilnok kunli raq Jordan rai ka mijin wan lot shaq wiiwii, Tatiwe raq, Jordan rai kham ka tiisiirai tiisüroq trübaiqto; raüta jükok ka phiisü shinriiqriiq ma tiija baiqto nguta tsütsa ka taito. Tsangshiq ka Israilnok ma pinthum haito kiimaq tsaihü jihü she riito.

Gilgal Chela Maq Athohanto

² Kiijiishe Tatiwe raq, “Longpen wa longniq jasai wiijam tiije hailaq. Laüta Israilnok atho ka hankuq laq,” nguta Joshua ma chongto.

³ Tatiwe raq chongtaq krai mren, Joshua raq jaqsham ka kloto. Apaiq raq Israilnok ma atho ka hankuqto. Kra tsangshiq ma atho hankuqtaq ba hiqshong mang ka Athohan Kin ngutlo.

^4-6 Israilnok raq Ejip mung maq laü wantaq akhing na, maiqwere thun ka tarü athohanje siisaq riito. Shatmaq tsangshiq ka kumtsaiphii mung na wiiroqblai manglaü wan lam na siwato. Kra liipan wa maiqwesere ümchuwa rawii chhi wantaq thun ka weshi min athohan mak dea riito. Kiimahali, kra akhing thum wan niika, Ejip mung maq srea nolabi rekhat atsinti, maiqwere awadam thun ka, wiita atsaikaiwi she riito. Jamkhano ngukla tsangshiq raq Tatiwe aming taimak shishe wanto. Apaiq raq tsangshiq ma tumkham tiinyang wantaq krai mren, tsangtitiim ma ara hiqpo hiqwin mung kra mikuq kang nguta kiqkham kuqtaq kiina, tiisaü wan mak dea riito.

⁷ Ara chongtiikai awetiim tsai wantaq setiim thun ka atho hankehü siisaq riito. Riita Joshua raq atho hankuqtaq kong ka are senye kong ma hankuqto.

⁸ Ara athohanke jaqsham kra kun raüta, tsangmitsi kra samhea tiiheali, Israilnok ka wiimungtam kra piitiip kiijiili sito.

⁹ Kra akhing na Tatiwe raq Joshua ma akha nguto, “Ümchaü ranaiq ngi raq namshiq khuthaq na Ejip mung na dise rilung siwan lan kharii mro thoda ka lambaiq kang she.” Kra ningkhan na, kra hiq ba mang ka Gilgal nguta mangto. Kra hiq mang ka ümchaü min kriili.

¹⁰ Israilnok ka Jeriko chela tho na Gilgal tan na lamjap piitiip sitlaq bala, kra jipi lü wa raroqshiri rablai raji na, Tiichhiiwan Poi kloto.

¹¹ Kra ranaiq maq naiqjai ranaiq miishe, tsangshiq raq Kanan mung na adong man, ako araq wong kiimaq pi maq shohü winsii ka apha shaqshaq phaqsiq wanto.

¹² Kra ranaiq miiphat she ra wa manna ka rok mak she tsaq kito. Kiimaq Israilnok jaq na manna ka ahü she riito. Kra akhing miiphat she tsangshiq raq Kanan mung na adong man tü atsam kriishe phaqsiq wanto.

Tatiwe Phentuwe Joshua Rai Riihumto

¹³ Joshua ka Jeriko chela tho na bala shon, tiihanghiiq miili apaiq raq maiqwe ashi ka apaiq khaki na chap raü chhito. Kriiwe ka ajaq na nepja shamraü chhito. Kra chhi raüta Joshua ka apaiq phana wato. Raüta, “Ümniika naishiqnok phenlabi shea? Shea naishiq ma wesang wa?” nguta waito.

¹⁴ “Ngi ka namshiq phenlawe min riimang, kiimaq namshiq ma wesang min riimang. Ngi ka Tatiwe phenlabi pengti Ajong Phentuwe,” nguta treto. Kra tai raüta, Joshua ka kriiwe khaki na hiq na bumkisaq shomnoqto, Kiimaq, “Chaü lei, ngi ka ümdise. Ngi raq jamlai riichang wa?” nguta apaiq ma waito.

¹⁵ Kiijiishe Tatiwe phentuwe raq, “Ümhokpa khorom ka achhut riilaq. Ümniika asii hiq ba na chap tlaü,” nguta chongto. Krai mren, Joshua riimin kra chongtaq kra phan phan kloto.