JEREMIA 52 - ASII LAKDAP Bible (BSI)

Jerusalem Ka Thento

¹ Jedekia ka wiiroqnai ri wiishi she angu na apaiq ka Juda mung na hokham ma shongto. Raüta apaiq raq Jerusalem maq nga raüta mung ka wiiroqshi ri wiishi langto. Anyung mang ka Hamutal. Apaiq ka Libna chela na siti Jeremia se.

² Hokhamwe Jehoiakim raq jamkho ngarai tangtaq kiikhiisii hali Hokhamwe Jedekia riimin Tatiwe man na ngarai tangto.

³ Tatiwe tsan ka Jerusalem chelati ma nai Juda mungti ma pinthum khiqto. Kra ningkhan amakki wa tsangshiq ka luhea na tiidoqra jobaiqto. Jedekia ka Bebilon mung Hokhamwe Nebukadnejar wokhong wa donghoto.

⁴ Kriikha niishe Nebukadnejar ka asengi phenlabi wiita sheaho raüta Jedekia ka hokham shong wanli maq wiitiikaü she angu na kra rawii wa jipi lüroqshi angu na kra jipi wa jiha raroqshi ranaiq na Jerusalem chela ka khat pha wanto. Tsangshiq raq chela kinphai tro kiijaq piitiip teito. Raüta chela ruk mong na düwan chang peruk hiqkhu thun ka trotam na haito.

⁵ Raüta kra chela ka kinphai tro maq komho raüta kheshat she khehoto. Kra komhotaq kriika Jedekia raq mung peng jaqsham wiiroqshi ri wiishi na saüli komto.

⁶ Kra rawii wa jipi lüblai angu na, jihea ratiikaü ranaiq niishe, ramdong raq mungmaiqse ma aphaqsea chang ka athum kai kun she, ram raq maiq ka ajiim wan nap nap she angu na,

⁷ chela tro ruk ka re raq tiibun buk baiqto. Bebilon mungti raq chela ka trotam maq akom wanwishe li jiimin, Israilnok phenlabi thun ka wiita rawa mong na kinphai na juhoto. Tsangshiq ka hokhamwe sonruk mong lam kriimaq lat-howito. Raüta chela tro na kiitelong ruk anai asi, kra ruk trechang ba apu kiimaq juhoto. Raüta tsangshiq ka Jordan rai tan nü nü niishe jutrangto.

⁸ Shatmaq Bebilon mungti phenlabi raq Hokhamwe Jedekia jai ka johoto. Raüta apaiq ka Jeriko chela tho na hiqthung tan binjü kiiwiishe loho raüta apaiq ka lapto. Kiimaq aphenlabi thun tlotli raq apaiq ka tiishaü baiq thüto.

⁹ Jedekia ka Hokhamwe Nebukadnejar phana hit wanto. Kiitiikaq Nebukadnejar ka Hamath wang na Ribla chela na riito. Kiijaq Nebukadnejar raq Jedekia kha ka photo. Raüta apaiq ka tiishut baiqto.

¹⁰ Ribla chela maq Nebukadnejar raq Jedekia setiim ka awe makki na tiisebaiqto. Kiimaq apaiq raq Jedekia sengi ajong alabi Juda mungti thun kriimin tiitsatbaiqto.

¹¹ Kra lot jai she, apaiq raq Jedekia makpo wiinai ka tlat thot baiqto. Raüta apaiq ka jinraü kharü maq kha raüta Bebilon mung niishe hit wanto. Raüta Jedekia ka Bebilon mung na apaiq atsai na saüli phaqtek mong na shaqto.

Shomjam Ka Tiithenbaiqto

¹² Bebilon mung Hokhamwe Nebukadnejar raq mung lang wan li maq wiiroqshi ri wiitiikaü she angu na, kra rawii wa jipi lübiingi na, jiha raroqshi ranaiq na, hokhamwe ma tsii chongketi ajongwe kiimaq phenlabi khuthaq na phentu ajong pinthumwe Nebujaradan ka Jerusalem chela mong niishe nyapto.

¹³ Raüta apaiq raq Shomjam nai hokhamwe jam, kiimaq Jerusalem chela wa ajong alabi jam thun kra wiita wa maq chaqbaiqto.

¹⁴ Kiimaq apaiq phenlabi raq Jerusalem chela tro ruk ka wiita tiibun buk baiqto.

¹⁵ Kra raütiishe Nebujaradan raq mungmaiqse chela na siti abung atiichong thun kra, tsiimwe khiiqwebi abung atiichong thun kra, kiimaq Bebilon mung puk na nyap wanti thun kra Bebilon mung na shumwi kong ma tsuq wanto.

¹⁶ Shatmaq apaiq raq Juda mungti miitsan maiqsetiim, maiqmii tachong hupsam jammin ahüti thun ka, spiqtsiro thun nai wak thun kra shamsiq ronglaq nguta Juda mung niilishe baiq thüto.

¹⁷ Bebilon mungti raq Shomjam mong wa miiki toqpum kham thun, kiimaq thuleng thun, kra rai miiki khamtum ajongwiq kaü krai nong maq wiita tiibun tiiqbaiqto. Raüta tsangshiq raq kra miiki thun kra wiita Bebilon mung na howanto.

¹⁸ Kiimaq tsangshiq raq berong-wacha wa wabun tsuqbaiq chang tsoqpen thun, kiimaq wabun tsobaiq chang hupsam thun, lem thun shiikum panchang hupsam thun, honglu na ataa kuq ngam tiijai chung chang pincho thun, honglu homseng chaq chang pinchosetiim thun, kiimaq noqku akhing na shamchang miiki maq alo hupsam ahin thun kra wiita howanto.

¹⁹ Tsangshiq raq chaq maq nai kampho maq alo hupsam thun ka wiita howanto: aransetiim pincho thun, wachan wiiwatam maq chaq chang winpin setiim, honglu ataakuq ngam tiijai satlaq kra chung chang pincho kaütiim, honglu wabun thüchang hupsam thun, lemtochang thun, homseng chaq chang pinchosetiim thun, spiqtai honglu kechang pincho thun kra wiita howanto.

²⁰ Hokhamwe Solomon raq miiki maq atiiq Shomjam mong na lang chang hupsam thun, toqpum kham wiinai, thuleng thun, khamtum ajong kaü, kiimaq khamtum kra tochang minsaü pongwetiim roqshiri anai kriithun ka tok na shin chang riimak laihea riito.

^21-22 Toqpum kham wiinai ka shamshi shi ikhli riito. Ashi ka adii lu nü na mitar 8 kiimaq ajong nü na atro na mitar 5.3. Kra toqpum kham wiinai ka mongrom. Kiimaq miiki ngam thea ka 75 milimitar. Kra toqpum kham khupo niika miiki maq ahai khamkhupo ka adii lu nü na mitar 2.2. Kiimaq kra akhupo trotam niika miiki maq atiiq pomegrenet petsipo ka trotam na kham kiijaq tiikoptlii tiitsomrom tiimiikhiiq rat asi.

²³ Kra atro na tiikoptlii triiwat hihi atiiq miiki pomegrenet petsipo thun kriika tlotli poshishi riito. Arwa hiq nü maq ra nü na liiraüla poroqtiikaü ri potrok kriika rashra tiichhitlo.

Juda Mungti Bebilon Mung Na Tsuq Wanto

²⁴ Arthaq niimin, phentu ajongwe Nebujaradan raq, munglu shumwi ma Ramwe Ajong Pinthumwe Seraia, apaiq jaithongti ramwe ajong Jephania, kiimaq shomjam liiti phongwa ajongbi wetsam tsuq wan damto.

²⁵ Kiimaq chela pengti phong wa ajongwe phenlabi pengti kra, kiimaq hokhamwe jaqthüti apaiq ma hon atsii chongketi welabi kiijaq chela na sishatliti wa wemiishi, kiimaq phentu jongwe kra jaqthüti phentuwe ashi, apaiq ka phenlabi thun raüpot waiqthüti cherewe, kiimaq arthaq niimin welabi maiq roqtrok thun kra tsuq wanto.

²⁶ Nebujaradan raq tsangshiq ka Bebilon hokhamwe phana shea wanto. Kiitiikaq apaiq ka Ribla chela na riito.

²⁷ Ribla chela ka Hamath wang na. Kiijaq hokhamwe raq tsangshiq ka atiibuk riito. Raütiishe tsangshiq ka tiijiipbaiqto. Akha Juda mungti ka Bebilon mung na munglu shumwi ma tsuq wanto.

²⁸ Riita kra chongtiikai munglu akhing na Nebukadnejar raq munglu shumwi ma atsuq wan maiq wea rikot ka akha: Apaiq ka hokham ma jawanli maq wiimiishi she angu na apaiq raq shumwikong maiq ka 3,023 tsuq wanto.

²⁹ Apaiq raq munglang li maq wiiroqshi ri wiitiichat she angu na, Jerusalem wa maiq shumwikong ka 832 tsuq wanto.

³⁰ Kiimaq apaiq ka hokham jawan li maq wiiroqnai ri wiitsam she angu na munglu shumwikong ka 745 tsuq wanto. Arka Nebujaradan wokhong maq tsuq wanto. Maiq atsuq wan thun tlotli ka 4,600 riito.

³¹ Ümra rawii wa Ewilmerodakh ka Bebilon mung na hokham ma shongtaq, kra rawii apaiq raq Juda mung Hokhamwe Jehoiachin ma mangchan tsii tiichhi kuqto. Raüta apaiq ka phaqtek mong wa tiidong baiqto. Arka Jehoiachin ka munglu shumwi ma shea wanli maq wiiroq tsam ri wiimiishi she angu na, kra rawii wa jipi lüroqshi ri lünai angu na, kra jipi wa raroqnai ri rabiingi ranaiq riito.

³² Ewilmerodakh raq apaiq ma lungwii tsii tiichhikuqto. Raüta apaiq ka pongmungti thun hokhambi Bebilon mung na munglu shumwi ma atsuq wan phong wa, anok khuthaq na apaiq miika shreng manto ajong lin ngachang kuqto.

³³ Krai mren, Jehoiachin miika adü na asam shumwi miirii kra tiichhutbaiq raüta kheahea miishe klaito. Raüta hokhamwe rai adam na chamrii ashi na nga raüta tiichongtlaq arilung ka adam phaqsiq wanto.

³⁴ Apaiq ma ranaiqtek chrit chhiikha rong ratlaq kra, apaiq atra sishat wiiwii khaqkhaq kuqto.