DUNGWVNC 8 - ASII LAKDAP Bible (BSI)

Makphang Thadong

¹ Kiijiishe Tatiwe raq Mosheq ma thaüto, “Hokhamwe phana walaq. Laüta apaiq ma Tatiwe raq ngutlo, ‘Isenginok ka tiiwalaq. Raüta tsangshiq raq Ngi mishomnoqlaq.

² Kiimaq ümniiraq ibom tlea haüla, Ngi raq ümmungtan ka makphang tiidong lata wiita mitiima baiqha.

³ Nail rai ka makphang long raq ama mirwan. Raüta makphang long raq ümhokham jam mong na, ümtap mong na, ümchangdü na, kiimaq ümsenginok ajong alabi jam thun na kiimaq ümsengi mungmaiqse jam thun na, kiimaq ümwinsii lumchang watum khok mong thun na kiimaq winsii lumchang pin thun na wiita milong wan.

⁴ Makphang phong ka ümkhu thaq na, ümsengi mungmaiqse thaq na, kiimaq ümsengi ajong alabi thun khuthaq na adoq aloq haha she mirphong wan.’”

⁵ Tatiwe raq Mosheq ma thaüto, “Aron ma chonglaq, apaiq raq anyeakii ka jürai thun thaq na, khamchelam thun thaq na, kiimaq thamchum thun thaq na tiinyi laüta ra na dolaq. Laüta makphang ka tlong laq. Raüta Ejip mung ka makphang raq rama hiq ma milong wan laq.”

⁶ Krai mren Aron raq anyeakii ka kham ümchuwa sitlaq kriithaq na ra na doto. Kiimaq makphang ka long wanto. Raüta hiq ma ra ma she mawanto.

⁷ Shatmaq mintin kloti nok riimin mintin klo raüta makphang ka tiidongto. Raüta mung na tlongto.

⁸ Kiijiishe hokhamwe raq Mosheq nai Aron ka tiiheakito. Raüta nguto, “Tatiwe jaq wa achu jaü ronglaq, apaiq raq makphang longtlaq kra wiita mitsuq wan laq. Kiimaq ngi raq namshiqnok ka mitiiwa kang. Krai mren tsangshiq raq Tatiwe ma honglu thun ka mitaa kuqlot.”

⁹ Mosheq raq treto, “Ngi ka khoqriiqkhiq maq ümnaq miitu achu mijaü kuqha. Ngi ma akhing kli chong liina, ümnaq, ümsengi ajong alabi, kiimaq ümsengi mungmaiqse miitu ümtiikaq achu jaüke chang wa kra chonglaq. Kiimaq ngi raq achu jaü hala, ara makphang longtlaq raüta ümnaq chamchao tlaü arka ahüshe miraq. Raüla makphang ka wiita she mimoki. Nai rai niili she mitiichongki.”

¹⁰ Kiijiishe hokhamwe raq treto, “Ngi miitu anap jaükuqlaq.” Mosheq raq treto, “Ümniiraq chongtlaü kra phan phan ngi raq achu mijaü kuq kang. Kiijiishetiq ümniiraq, Tatiwe, naishiq Shiikeawe khan ka shiikea ahin ahü nguta misap haü.

¹¹ Ümnaq, ümsengi ajong alabi thun, kiimaq ümsengi mungmaiqse ka makphang raq longliiq mak she miraq. Makphang ka tiisii rai she mitsuq baiq. Nail rai niili she mitiichong.”

¹² Raütiishe Mosheq nai Aron ka hokhamwe jam wa kihoto. Kiimaq Mosheq raq Tatiwe jaq wa apaiq raq hokhamwe ka makphang ma tlong phaqtaq kriiwa tiichhiikuq laq nguta achu jaüto.

¹³ Kiimaq Mosheq raq jaütaq kra phan phan Tatiwe raq jaq ka shamto, Kiimaq makphang phong jam thun na, rinkea thun na, kiimaq wak ram thun na longraitlaq kra wiita jiimto.

¹⁴ Ejip mungti raq makphang maa phong ka riichom raüta aphong jonghea hea phong baiqto. Raüta tsang mung ka makphang maa nam tsang raq nyam wanto.

¹⁵ Kiimaq hokhamwe raq makphang thun jiimtaq kra chhito. Kiimaq apaiq ka wanshak shak hali tsinki nongto. Arka Tatiwe raq chongtaq kra phan phan wankito. Kiimaq hokhamwe raq Mosheq nai Aron bom ka taimak hali lanki nongto.

Shecham Thadong

¹⁶ Tatiwe raq Mosheq ma nguto, “Aron ma chonglaq, anyeakii maq hiq na buklaq nguta. Raüla Ejip mung tlotli wa botkhulai ka shecham miishe mijaki.”

¹⁷ Kiimaq Aron raq anyeakii maq hiq na riihot bukto. Kiimaq Ejip mung tlotli wa botkhulai ka shecham ma jakito. Raüta maiqse nai nyamse thun khum na bok wanto.

¹⁸ Kiimaq mintin klotibi riimin tsangshiq mintin maq kiimut raüta shecham tiidonglai nguta shiikutto. Shatmaq tiidonglot mak riito. Barap binrii na shecham siisaq long wanto.

¹⁹ Kiimaq mintin klotibi raq hokhamwe ma nguto, “Arka Shiikea jaqsham!” Shatmaq hokhamwe ka wanshak shak. Tatiwe raq chongtaq kiikhiili riito. Krai mren Apaiq raq Mosheq nai Aron bom ka taimak lanlaqlaq li riito.

She Thadong

²⁰ Tatiwe raq Mosheq ma thaüto, “Anap ranap chu maq walaq laüta hokhamwe ka jürai na kitlaq kiijaq riihumlaq. Laüta apaiq ma Tatiwe raq akha ngutlo nguta chonglaq, ‘Isenginok ka tiiwa laq. Raüta tsangshiq raq Ngi mishomnoq laq.

²¹ Ngi raq ümniima honlam chongtiikang, ümniiraq ningtang haüla, Ngi raq she tlong lata ümnaq, ümsengi along alabi thun, ümsengi mungmaiqse ma mo mitiihoha. Ejip mungti jam thun ka she long raq ama miraq kiimaq hiq raikhü kiimin she long raq wiita mima wan.

²² Shatmaq Ngi raq isenginok shongchang Goshen wang ka atiiwong mirha, she ka tlong mang. Ngi raq akha klotiikang arka, ümniiraq, Ngi Tatiwe riidea armung na jaq shamtiikang arka nguta misap haü.

²³ Ngi raq isenginok nai ümsenginok liipan na atrai lata pong na mitsea tsiiqha. Ara awang chang jaqsham arka anap ranai midong.’”

²⁴ Kiimaq Tatiwe raq she long thadong henghea hokhamwe jam na kiimaq asengi ajong alabi thun jam na tiisaüto. Ejip mung tlotli ka she long thadong saü raüta wiita miqchup tiithen baiqto.

²⁵ Kiijiishe hokhamwe raq Mosheq nai Aron ka tiiheakito. Raüta nguto, “Kironglaq. Lanta namshiq Shiikeawe ma armung arjaq honglu thun ka takuqki rongkiq.”

²⁶ “Kriika tri na riikhaqli ang wa mak miraq,” nguta Mosheq raq treto. “Jamkhano ngukla naishiq raq nyamse thun Tatiwe naishiq Shiikeawe ma honglu na takuq tiikai kriika Ejip mungti makki na apii thuktsom mak miraq. Kiimaq naishiq raq ara nyamse thun ka Ejipnok makki na honglu kuqhai jiila, Ejipnok tsan ka akhiq miraq. Raüta tsangshiq raq naishiq ka long maq thong raüta mitsat baiq.

²⁷ Naishiq ka ranaiq tsam lam loq na kumtsaiphii rumnyangkhi wang kiina kaiho chang ratlo. Laitiitiq Tatiwe naishiq Shiikeawe raq naishiq ma aming kuqtaq kra phan phan honglu ka takekai chang dongdii rakito.”

²⁸ Kiijiishe hokhamwe raq nguto, “Namshiq ka luhea na kiho man jiila, ngi raq namshiq ka Tatiwe, namshiq Shiikeawe ma honglu takekai kumtsaiphii rumnyangkhi wang na mitiiki kang. Ngi miitu achu jaü kuqlaq.”

²⁹ Kiijiishe Mosheq raq treto, “Ngi ka ümniirai kiim riiphea wan ri li, ngi raq Tatiwe jaq wa, anap ranaiq niili she longtlaq arka ümnaq, ümsengi ajong alabi, kiimaq ümsengi mungmaiqse ka mibaiq thülaq nguta achu mijaü kang. Shatmaq ümniiraq naishiq ka alao nong mai mak. Kiimaq mungmaiqse ka Tatiwe ma honglu takekai chang kiiwa naq ningtang kiq she.”

³⁰ Kiimaq Mosheq raq hokhamwe ka baiqthüto raüta Tatiwe jaq wa achu jaüto.

³¹ Kiimaq Mosheq raq achu jaütaq kra phan phan Tatiwe raq jaq ka shamto. Shekong longtlaq kriika hokham phawa, asengi ajong alabi phawa, kiimaq asengi mungmaiqse phawa alaü she riiwanto. Shekaü kaüshi se dongdii min tiichong mak laü wanto.

³² Shatmaq arlak niimin hokhamwe ka wanshak shak hali ngiimkito. Kiimaq apaiq raq Israilnok ka tiiwa mak ningtangho nongto.