DUNGWVNC 39 - ASII LAKDAP Bible (BSI)

Ramwebi Rohun Kloto

¹ Bejalel nai akongtibi raq raiwai, mintiitii, kiimaq uniraishii maq pinthum athuk atsom rohun ramwebi raq Asii Khok na shiikumpan jaqsham tlaq akhing na samchang taqto. Tsangshiq raq ramwe rohun thun ka Aron miitu ka Mosheq lümaq Tatiwe raq aming kuqtaq kra phan phan kloto.

² Tsangshiq raq asii kheaphu ka müsaisai raihi-nairai, raiwai, mintiitii, kiimaq uniraishii maq kiimaq chaq rai shot raüta taqto.

³ Tsangshiq raq chaq ka pisaisai diimsetiim tiiqto. Raüta kiiwa pisaisai diim ransetiim hanto. Raüta kra diimsetiim maq müsaisai raihi-nairai krai, kiimaq raiwai, mintiitii, kiimaq uniraishii krai riishot raüta khea ka taqto.

⁴ Kiimaq tsangshiq raq asii kheaphu kra phaq lam na batsaq paqchang kheapen senai anai taqto. Raüta asii kheaphu krai asiim wiinai na tiikop chhangto. Krai mren kra dü na tiikopsaq sam chang tiihongto.

⁵ Kiimaq atsomwiq chhüshat chang shinket kheaphu kriimin arthun rai phan phan kra riishot raüta taqto. Raüta ara shinket ka asii kheaphu krai tiinapsaq na phushi ma tiija tlii tiikop chhangto. Arka Tatiwe raq Mosheq ma aming kuqtaq kra phan phan kloto.

⁶ Kiimaq tsangshiq raq karnelian longsengpo setiim ka kloto. Raüta chaq posetiim mong na akhok setiim hai raüta shaqto. Raüta arthun arka kai taksma jaqshamti raq Jakob setiim mang roqshi ri wenai mang krai adam na tiihong raüta shaqto.

⁷ Kiimaq tsangshiq raq ara tiihongtaq posetiim arka phaqlam na batsaq samtlaq asii kheaphu kriithaq na shaqto. Arka Tatiwe raq Mosheq ma aming kuqtaq kra phan phan maiq phan phan roqshi ri phan nai kra mang pon na tiihongto.

Khuk Na Samchang Kheaphu Kloto

⁸ Kiimaq tsangshiq raq khuk na samchang kheaphu kiimin arthun phan phan rai thun armaq asii kheaphu taqtaq kiikhiisii awaiq angon chhang raüta taqto.

⁹ Kra kheaphu ka tsingblai kiimaq riingea riingea wenai ma wetlii kloto. Alu nü na 22 sentimitar kiimaq ajong nü niimin 22 sentimitar.

¹⁰ Raüta tsangshiq raq ara kheaphu thaq na longseng athii tsinhea phan posetiim ka alen alen na tiichap raq raq len blai kloto. Apha lenti kiijaq tsangshiq raq rubi longseng po, topaj longseng po, kiimaq garnet longseng po thun kra tiihong shaqto.

¹¹ Kiimaq lennai ngojati na, emarel longseng po, saphir longseng po, kiimaq diamond longseng po thun kra tiihong shaqto.

¹² Kiimaq lemtsam ngojati na, turkuois longseng po, agat longseng po, kiimaq amethist longseng po thun kra tiihong shaqto.

¹³ Kiimaq lenblai ngojati na, beril longseng po, karnelian longseng po, kiimaq jaspar longseng po thun kra tiihong shaqto. Ara longseng po thun arka chaq riikom thun aklo mong na wat raüta tiihong shaqto.

¹⁴ Kra longsengpo thun loweatek roqshiri ponai kra mong niika Jakob setiim weroqshi ri wenai mang kra among na wat raüta waiq raq raq tiihongto. Kriika Israilnok maiq phan phan roqshiri phan nai kra mang pon na waiq thüto.

¹⁵ Kiimaq tsangshiq raq khuk na samchang kheaphu miitu ka chiisan chaq maq sairaü ka triiwat hi hi raüta sairaü ashi kloto.

¹⁶ Kiimaq tsangshiq raq chaq ngam mong na wat raüta atiihong ponai kloto. Kiimahali chaq maq sairaü anai kloto. Raüta kra sairaü wiinai ka khuk na samchang kheaphu akhupo siim nü ashok wiinai kiijaq tiikopto.

¹⁷ Raüta tsangshiq raq chaq sairaü wiinai ka awakom wiinai mong kiijaq tiipha shatto.

¹⁸ Kiimaq kra sairaü anai tho kriika chaq riikom tiihong wattaq kriijaq hali tiipha shatto. Akha raüta arka phaq lam na tiipha shattaq asii kheaphu khaki nü siim kriijaq tiipha shatto.

¹⁹ Kiimaq tsangshiq raq chaq maq awakom anai hali kloto. Raüta kra wiinai ka khuk na samchang kheaphu hiq nü nü siim wiinai kiijaq tiikopto. Arka kra kheaphu among nü nü siim kiijaq asii kheaphu krai tiinap saq na tiikopto.

²⁰ Kiimaq tsangshiq raq chaq maq awakom ka komnai hali kloto. Raüta kra komnai ka phaq lam maq paq samtlaq asii kheaphu kra paq chang kra kheaphu wiinai sup wan khaki nü siim hiq nü nü kiijaq, asii kheaphu hiq nü nü siim akii tho kiijaq atsomwiq kheaphu chhiishat chang shinket kra thaq na tiikopto.

²¹ Tatiwe raq Mosheq ma aming kuqtaq kra phan phan, tsangshiq raq khuk na samchang kheaphu awakom wiinai ka asii kheaphu na awakom wiinai kiijaq raiwai maq aklo raülo kriimaq tiipha shatto. Krai mren khuk na samchang kheaphu ka chhü na shattlaq shinket kra thaq na tiinap saq phataqtaq tiikopshat miraq. Krai mren khuk na somtlaq asii kheaphu ka wanli wiili tiipaq mak miraq.

Ramwebi Rohun Abi Min Kloto

²² Samtong jong asii kheaphu takiq na among na samchang ka unirai raiwai maq siisaq taqto.

²³ Raüta khupo na tlat saq dangkong na hongsam chang pu kriika akii tro na tiichaiki mak chang miitu rai maq ataq lam maq taq wantlii tiihongto.

^24-26 Raüta samtong hiq nü na akii tro trotam na pomegrenet petsi thun ka müsaisai raihi-nairai maq, kiimaq raiwai maq, mintiitii rai maq, kiimaq uniraishii maq ataq thun kra chiisan chaq maq alo konta posetiim rai tiihea raq raq raüta paqto. Arka Tatiwe raq Mosheq ma aming kuqtaq kra phan phan kloto.

²⁷ Tsangshiq raq samhong thun ka Aron nai asetiim miitu kloto.

²⁸ Kiimaq bannin khuphok, khuphok ransetiim, raihi-nairai maq ataq patulong setiim,

²⁹ kiimaq müsaisai raihi-nairai maq kiimaq raiwai rai, mintiitii rai, kiimaq uniraishii maq ataq khea shinket, raüta atsomwiq rai maq achhang khea thun ka Tatiwe raq Mosheq ma aming kuqtaq kra phan phan kloto.

³⁰ Kiimaq tsangshiq raq khum kiinongke saqse laktum ka chiisan chaq maq kloto. Raüta tsangshiq raq kra laktum mong na wat raüta, “Tatiwe Ma Akiinongke Wishe” nguta waiqto.

³¹ Tsangshiq raq laktum ka khu na bannin khuphok khaki na raiwai maq aklo raülo maq tiikop khatto. Arka Tatiwe Mosheq ma aming kuqtaq kra phan phan kloto.

Jaqsham Ka Lotto

³² Kiimaq Tatiwe asi Tombutiip miitu jaqsham chang ümchuwa sitlaq kriika kun kun she lotto. Tatiwe raq Mosheq ma aming tattaq kra phan phan Israilnok raq jaqsham ka phanrap phanrii kloto.

³³ Raütiishe tsangshiq raq Tombutiip nai amii akhiiq hupsam thun ka tlotli, khaiq thun, ariikom thun, riiqse pum thun, khamchong thun, kiimaq khamjichong diim thun kra;

³⁴ apangchang sku pongsetiim khü riiqshii maq alo diim thun; apangchang nintata ngamkhii maq aklo diim thun; achan chang kheathum thun;

³⁵ Tongshong Tek among na longpen wiinai asi kra, kra pichang pepum wiinai kra, kiimaq apang chang ahap kra;

³⁶ chamrii kiimaq kra miirii thun kra, kiimaq Shiikeawe honglu na akuq winsii thun kra;

³⁷ kiimaq lem-khamchong chiisan chaq maq aklo, lemsetiim thun, kiimaq lem rai langchang miirii thun kra, kiimaq lem na tiinyai chang tel;

³⁸ kiimaq chaq berong-wacha; ram ram chang tel; ahomwiq-homseng honglu kra; Tombutiip na wachang kilamchong na chantlaq kheathum kra;

³⁹ miiki maq aklo berong-wacha nai amiirii jinchiiq kaü kra, kra pichang pepum wiinai kra, kiimaq berong-wacha rai lang chang amiirii hupsam thun kra; ahechang-nüchhong winpin nai kra tiichap chang ahokphi diim kra;

⁴⁰ Tombutiip keathung tro na ruk chang kheathum thun kra kiimaq kra khamchong thun nai khamchong tiichap chang hokphi diim thun kra; keathung ruk kilamchong na chanchang kheathum thun kra kiimaq atiikha chan chang raü thun kra; Tombutiip tiikha chan chang khaiq thun kra; kiimaq Tombutiip mong na langchang hupsam thun kra;

⁴¹ kiimaq tsomhea rohun ramwebi raq Asii Khok na samchang rohun miirii thun kra: asii miirii thun ramwe Aron nai asetiim raq samchang thun kra Mosheq ma lamkuq wanto.

⁴² Israilnok raq jaqsham thun tlotli ka Tatiwe raq Mosheq ma aming kuqtaq kra phan phan kloto.

⁴³ Kiimaq Mosheq raq hupsam thun ka wiita shrira liito. Raüta tsangshiq raq jaqsham ka Tatiwe raq aming kuqtaq kra phan phan dea kloto nguta liito. Kiimaq Mosheq raq kra hupsam thun ka shiimanto.