DUNGWVNC 17 - ASII LAKDAP Bible (BSI)

Longraq Wa Kham Tiidongto

¹ Israilnok mung tlotli ka Sin kumtsaiphii wang maq tiido wanto, Tatiwe aming maq bashi maq riita bashi na wawan wan laü wanto. Raüta tsangshiq piitiip ka Rephidim hiq na teito. Shatmaq kiijaq kham anyang chang ahü riito.

² Kiimaq tsangshiq raq Mosheq ma bot tsaüto. Raüta akha nguto, “Naishiq ma kham anyang chang kuqlaq.” Mosheq raq treto, “Namshiq ka jam nguto bot tsaü tlan? Namshiq raq Tatiwe ka jam nguto maitai tlan?”

³ Shatmaq mungmaiqse ka khamnyang tsihea riito. Kiimaq tsangshiq raq Mosheq ma bot wan ruqli riito. Tsangshiq raq nguto, “Ümniiraq naishiq ka Ejip mung wa jam nguto tsuq wan laü? Naishiq ka kiimaq naisetiim ka kiimaq nai nyamse kong ka kham nyangtsi ma tiijiim baiq miitu sha tsuq wan laü?”

⁴ Kiijiishe Mosheq raq Tatiwe jaq wa kai tsan tiitsi raüta achu jaüto. Raüta akha nguto, “Ngi raq arnok ara jamkho mirha? Tsangshiq raq ngi ka long maq tiiq baiq she dantlo?”

⁵ Kiijiishe Tatiwe raq Mosheq ma nguto, “Ümniirai Israilnok welabi ka wiijam sheaholaq. Laüta ümniika mungmaiqse khaki na kongkhu walilaq. Ümniiraq Nail rai buk chang nyeakii ka ümjaq na shamho laüta walaq.

⁶ Ngi ka Sinai Pum na longkaü sitlaq kiijaq ümkhaki na michap kang. Ümniiraq longkaü ka riihot buklaq. Raüla longkaü kiiwa mungmaiqse raq nyang miitu kham ka midong.” Krai mren Mosheq raq Israilnok welabi makki na kra chong kuqtaq kra phan phan kloto.

⁷ Kra hiq ba mang ka Massa kiimaq Meriba nguta mangto. Jamkhano ngukla Israilnok bot nyanto. Raüta tsangshiq raq, “Riita Tatiwe ka nashiq rai asi dea sha ahü wa?” nguta bot trang raüta Tatiwe ka maitaito.

Amalakaiqnok Rai Riikhatto

⁸ Amalakaiqnok ka kito. Raüta Israilnok ka Rephidim hiq wa longkito.

⁹ Kiimaq Mosheq raq Joshua ma nguto, “Maiq wiijam ka tsea laq. Laüta Amalakaiqnok ka anap ranaiq khatkikiq. Ngi ka hiq lam thaq na michapha. Lata Shiikeawe raq chongtaq kra phan phan nyeakii kra sham lata ra na doshat maq michapha.”

¹⁰ Kiimaq Joshua riimin Mosheq raq apaiq ma chongtaq kra phan phan kloto. Raüta Amalakaiqnok khatkai kihoto. Kiimaq anü na Mosheq nai Aron kiimaq Hur tsangtsam ka hiq lam khupo kiina wawanto.

¹¹ Mosheq raq ajaq ka ra na doshat sitlaq wiiwii ka Israilnok raq rekhat ka tangtlo. Shatmaq ümtiikiiwa apaiq raq ajaq phum wiinai ka hiq na tiisat tlaq, Amalakaiqnok raq tang wantlo.

¹² Ümtiikiiwa Mosheq jaq phum ka athea she riiwantaq, Aron nai Hur raq apaiq tiinga miitu longkaü ashi dokuq wato. Raüta tsangnai ka apaiq ma siimko naita na chap raüta, ajaq phum wiinai ka ra na doshat tiime mak maq, rashe tiinyapli kamshat thüda kuqto.

¹³ Akha klo raüta Joshua raq Amalakaiqnok ka tiisiirai khatto.

¹⁴ Kiijiishe Tatiwe raq Mosheq ma nguto, “Ara re riikhat tang lan manphan raüpot ka ahea wiq waiq thülaq. Krai mren arka tsan na tiitsangshat mithülaq. Joshua ma chonglaq Ngi raq Amalakaiqnok ka miqchup mitiithen baiqha.”

¹⁵ Kiimaq Mosheq raq kiijaq berong-wacha ashi haito. Raüta kriika, “Tatiwe ka ngi Tanglap,” nguta mangto.

¹⁶ Apaiq raq nguto, “Tatiwe lan ka ra na diilu na doshat laüta thülaq! Tatiwe raq Amalakaiqnok ka pattup pat-sa khat wan ruqli miraq!”