DUNGWVNC 10 - ASII LAKDAP Bible (BSI)

Kupchilong Thadong

¹ Kiijiishe Tatiwe raq Mosheq ma chongto, “Walaq. Laüta hokhamwe rai riihum wakiq. Ngi raq apaiq nai asengi ajong alabi thun ka wanshak shak tiijabaiq kang. Arka Ngi raq ara awang chang thun ara tsangshiq phong na klo miitu.

² Kiimaq namshiq raq namsetiim nai namsaütiim ma, Ngi raq Ejip mungti ka awang chang jaqsham lata, tsangshiq ka jamkho angok anginok ma tiijabaiq kang kra manphan ka michong kuq han. Namshiq tarü raq Ngi ka Tatiwe dea nguta misap han.”

³ Krai mren Mosheq nai Aron ka hokhamwe phana wato. Raüta apaiq ma nguto, “Tatiwe, Hibrunok Shiikeawe raq ngutlo, ‘Ümniika ibom taimaü ikiq khiiruq ka ümtincho na saüli wa mikhiisiq haü? Isenginok ka tiiwalaq. Raüta tsangshiq raq Ngi mishomnoqlaq.

⁴ Kiimaq ümniiraq ikiq ka tlea rugli tlea haüla, Ngi raq anap ranaiq ümmung arjaq kupchi mitlongha.

⁵ Kupchi ka pahea ra ma hiq ma long wan raüta, hiqraikhü ka kunli mima wan. Tsak-hiiq raq tiithen mak atiichong abung atiichong thun ka tlotli tiisii rai mitiithenbaiq, pechong thun abung atiichong ka wiita tiisii rai mitiithen baiq.

⁶ Kupchi long raq ümhokham jam thun kra kiimaq ümsengi ajong alabi jam thun kra kiimaq ümsengi mungmaiqse jam thun kra wiita mima wan. Kupchi long ka ümtitiim riimin chhitai mak phan sawa saü henghea miraq.’” Kra ngu raüta Mosheq ka kihoto.

⁷ Kiimaq hokhamwe sengi ajong alabi raq apaiq ma nguto, “Riita arwe raq nashiq ka ümtincho na saüli wa mitiichamchao? Israilnok wa maiqwere kong riiwe ka mikiholaq. Raüta tsangshiq raq Tatiwe tsangshiq Shiikeawe ka mishomnoqki laq. Ejip mung ka wiita she then wanto kra sap maüli sha?”

⁸ Krai mren, Mosheq nai Aron ka hokhamwe phana tiijang sheaki nongto. Kiimaq apaiq raq tsangnai ma nguto, “Ahea. Namshiq raq Tatiwe namshiq Shiikeawe ka shomnoq kai mimai. Shatmaq riikhaqli ka juju wa miki han?”

⁹ Kiijiishe Mosheq raq treto, “Naishiq wiitarü mikihohai. Naisetiim nosere thun kiimaq nyungwere thun kunli hutjok. Naishiq raq naisetiim maiqwe sere kiimaq jechaksere thun, kiimaq naishiq skukong, kiimaq chhechhi kong, kiimaq naishiq minsaü kong thun wiita. Jamkhano ngukla naishiq raq Tatiwe shreng poi jonghea klo chang.”

¹⁰ Kiijiishe hokhamwe raq nguto, “Ngi raq Tatiwe mang chong lata tiitum tiikang, ngi raq namshiq ma jechakre nai nosere thun ka ümtiikiimin tiisheaho mang! Arka ra na tiiwe raü she ahata. Namshiq ka iwokhong wa adongho she dan tlan. Lanta pongwela shongho she dan tlan.

¹¹ Riimak! Kiikhla nguho lan jiila maiqwere kong kli kironglaq. Lanta Tatiwe ka shomnoqki rongkiq.” Kra nguraü tiishe Mosheq nai Aron ka hokhamwe rung kiiwa jobaiqto.

¹² Kiijiishe Tatiwe raq Mosheq ma nguto, “Ümjaq ka ra nü na Ejip mung thaq na dolaq. Laüta kupchi ka tlonglaq. Raüta kupchi raq jamlai phan wa hiq na chamtlaq phan thun ka, tsak-hiiq raq atiithen baiq jaqsong thun atiichong ka hutjok tiisiirai she miphaq baiq.”

¹³ Kiimaq Mosheq raq anyeakii ka ra nü na doto. Kiimaq Tatiwe raq shedong mung nü maq rahai tiisaü wanto. Raüta kra rahai ka kra mung na kra ranaiq minru kiimaq kra rawa minru tiihaito. Anap ranap niishe rahai raq kupchi kong ka tsuq wan raüta kra mung na phongto.

¹⁴ Kupchi kong ka ada ala ra ma hiq ma she kra mung tlotli na long wanto. Kra kupchi long ka pahea pinthum longbiti riito. Kiitinkhan kupchi long ka manphan niimin ahü riito. Kiimaq rawiichii niimin long mak she miraq.

¹⁵ Kupchi long raq hiq raikhü ka kunli, nyaqdok she phong wanto. Tsakhiiq raq atiiq abung atiichong ka wiita phaq baiqto, petsi chong wa atsi thun wiita phaq baiqto. Chhijaq nyiipji ka achong na apun min tiichong mak, riimakla Ejip mung tlot li wa pechong ka tlotli phaq baiqto.

¹⁶ Kiijiishe hokhamwe raq Mosheq nai Aron ka taülaükhiq tiiheaki nongto. Raüta nguto, “Ngi ka Tatiwe, namshiq Shiikeawe man na kiimaq namshiq man na shut kang.

¹⁷ Ümchaü min, ara ingarai ka lakshi ri diikuq ronglaq. Lanta Tatiwe namshiq Shiikeawe jaq wa ara ngi ma pinthum atsai chang mo tiihotlaq ara lambaiq miitu achu jaü kuq ronglaq.”

¹⁸ Kiimaq Mosheq ka hokhamwe man wa tiidohoto. Raüta Tatiwe jaq wa achu jaüto.

¹⁹ Kiimaq Tatiwe raq shedong mung nü wa rahai kitlaq kriika henghea shenyap nü mung wa rahai miishe tiija baiqto. Kra rahai raq kupchi longtlaq kra rahai raq pan wan raüta, Suej Khamjong chum nong kiiniishe tsuq baiq wanto. Kiimaq Ejip mung na kupchi ka kaüshi min ahü siirai tsuq baiqto.

²⁰ Shatmaq Tatiwe raq hokhamwe tsan ka wanshak shak li tiitsin baiqto. Kiimaq apaiq raq Israilnok ka tiiwa mak dea ningtang baiqto.

Ra Tiinyaqbaiqto

²¹ Kiijiishe Tatiwe raq Mosheq ma nguto, “Ümjaq ka ra nü na dolaq. Raüla Ejip mung tlotli na ranyaq tang tang she minyaq wan.”

²² Kiimaq Mosheq raq ajaq ka ra nü na tiinyi raüta ra na doto. Kiimaq Ejip mung tlotli na ranaiqtsam tinkhit ranyaq tangtang nyaq kito.

²³ Kiimaq Ejipnok liipan na weshi raq weshi ka chhilot mak riito. Kiimaq kra bala maiq jurmin maiqmii jam wa kinphai na dong mak riito. Shatmaq Israilnok shongchang wang niika rawüli ahea wiq riito.

²⁴ Kiijiishe hokhamwe raq Mosheq ka tiiheakito. Raüta nguto, “Namshiq ka akaiho mimai. Lanta Tatiwe ka shomnoqki rongkiq. Nam-nyungtiim jechakre nai namsetiim kiimin namshiq rai kaidam mimai. Shatmaq nam skukong, chhechhi kong, kiimaq minsaü kong kriika aniili baiq thü ratlo.”

²⁵ Kiijiishe Mosheq raq treto. “Ikhla ümniiraq naishiq ma Tatiwe, naishiq Shiikeawe ma honglu na take chang kiimaq wiipumtam-chaqtlii honglu kechang nyamse thun ka ümniiraq naishiq ma kuqlaq.

²⁶ Riimak. Naishiq raq naishiq nyamse kong kriimin naishiq rai nong nong lamho chang. Jai niika kaüshise dongdii min baiqthü mai. Naishiq raq maiqmii jaq maq nyamse thun kriiwa tsea laita, Tatiwe naishiq Shiikeawe ka shomnoq chang. Kiimaq naishiq ka kiijaq saüho hü miika, nyamse phong kiiwa jamlai phan honglu take chang wa kriika naishiq raq chonglot mai.”

²⁷ Tatiwe raq hokhamwe tsantsii ka wanshak shak tiijabaiqto. Kiimaq apaiq raq tsangshiq ka tiiwa mak ningtang baiqto.

²⁸ Kiimaq apaiq raq Mosheq ma nguto, “Imakki wa tiibintlo laq! Ngi ma ümsham ka ümtiikiimin tiichhi wa maimak she! Ümra ranaiq wa ümsham ka ngi ma mitiichhi haü, ümniika atsai mirhaü!”

²⁹ “Riikhaqli ngutlaü!” nguta Mosheq raq treto. “Ümniiraq isham ka ümtiikiimin chhi maü she.”