2 SAMUEL 23 - ASII LAKDAP Bible (BSI)

Dawit Raq Achongkuq Atiithum Riisham Bomtsi

¹ Dawit ka Jesi se, Shiikeawe raq amang chong ra tsa ikha tiijong wantiiwe, Jakob Shiikeawe raq Israil mung na hokhamwe ma ashong wanwe. Apaiq kata Israil mung na shammi shinge tsomhea waiq wantiwe. Arjaq ara Dawit raq atiithum riisham bomtsi achong kuq:

² Tatiwe wenyi raq ngi ka rom raüta chongtlo; apaiq bomchong ka inübok na.

³ Israilnok Shiikeawe raq chongto; Israilnok tiikhup wongketiwe raq, ngi ma akha chongto: “Tri kappe tingting shamti hokhamwe ka, Shiikeawe aming phanphan, mung peng wantiwe ka,

⁴ phumda ahü ranap chu rakhang ikha; ranap rashe dongchhai ikha, sangphii rü na rajun jai khamtsi chhairai tlaq ikha.”

⁵ Ara chongtaq akha Shiikeawe raq isaü ise pat na, achu mishmankuq. Jamkhano ngukla apaiq raq ngi rai, pattup pat-sa miitu tongshong wanto she. Kriika pattup pat-sa tongshong; kra kiq riikham ka pattup tiipan mak phan, kra kiqkham paqkuqtiika, klaiki mak phan she; kriika ngi raq tang wan she, kriika Shiikeawe raq, mitiihongkuq wan dongdii.

⁶ Shatmaq tiina raweahü maiqse thun ka, shukchong daqbaiq raüta, tsuqbaiq tlaq ikha mitsuq baiq; jurmin jaq maq shamki lot mak.

⁷ Maiqse raq jinkiip maq riimak la piq miitiq, tsuqbaiq wan phan. Raüta wa maq tiibun chaqbaiqtlo.

Dawit Sengi Srea Nolajongbi

⁸ Dawit sengi srea nolajong pinthumbi thun ka arthun ara riito: Josheb Basshebeth ka Takhemon hiqti. Apaiq ka “Ajong Wetsam” phong kriiwa apha lamsheati ajong pinthumwe. Apaiq raq apiq kii kriimiili lakshi rekhat kai akhing na rewe ka shitiichat jiipbaiqto.

⁹ Kriijai wiishe “Ajong Pinthum Wetsam” phong kriiwa nolajong wenai ngojawe kriika Ahoq weraü wa Dodo se Eleajar. Ranaiqshi Philistainnok ka arkhat ma nguta adam na thungto; Kriika apaiq nai Dawit raq khatto. Israilnok ka re raq jowan kiita jai niishe tiitong jangrai wanto.

¹⁰ Shatmaq apaiq ka akhiismin riilüp mak, Philistainnok ka jaimu mimu khatto. Rekhat tsi raq ajaq wa nepjasai kaü kriimin thaqbaiq lot mak she ajaq ka atsin she riikito. Tatiwe raq kra ranaiq akhing na rekhat jonghea tang kuqto. Kra rekhat thumjai she, Israilnok ka Eleajar chapchang ba kiiniishe jangki nongto. Raüta rewe maphong dü wa huk asam thun kra chhut wanto.

¹¹ Kiimahali, “Ajong Pinthum Wetsam” phong kriiwa nolajong pinthum wetsam ngojatiwe ka Hara hiqti Agee se Shamma. Philistainnok ka Lehi hiqshong kiijaq Israilnok khat wa thungto. Kiijiika wakram na cherongtsi rü asi riito. Israilnok ka Philistainnok ma hai ma apin ajin jutrangto.

¹² Shatmaq Shamma ka akhiismin haimak maq wakram kriijaq tro tri re ka khatto. Raüta tiiwongto. Raüta Philistainnok ka jiipbaiqto. Tatiwe raq kra ranaiq rekhat jonghea tang kuqto.

¹³ Bunwong tsamjut phaho choji na “Nolajongbi Weroqtsam” phong kriiwa nola wetsam ka Dawit tiipaü chang Adullam longsha kiina kihoto. Kra akhing bala Philistainnok ka Rephaim hiq na piitiip tei raüta sitlo.

¹⁴ Kra akhing bala Dawit ka hiqlam ashi na atiipaü ma aheawiq ba na sitlo. Kiimaq Philistainnok kongshi ka wa raüta Bethlehem chela kra khat raüta jiiwanto.

¹⁵ Dawit ka maiqmii hiqshong ro-tsi raq atsai riito. Kra ningkhan na apaiq raq nguto, “Maiq weshi ra raq ngi ma Bethlehem chela kilamchong tho na khappong kriiwa kham anyang ma khukuq wa raü jaq ahea riichang!”

¹⁶ Kra nolajong wetsam ka haimak maq ahukse maq Bethlehem chela kiina, rewe Philistainnok piitiip mong lam kriimaq wawan raüta, kham ka khappong kiiwa khuho raüta Dawit ma lamkuq hoto. Shatmaq apaiq raq kra kham ka nyang mak dea riito. Shatmaq apaiq raq kham ka Tatiwe ma honglu na khoti raükuqto.

¹⁷ Honglu na raüke lam maq, “Tatiwe lei, ngi raq ara kham arka jamkho minyangha! Kriika ara maiq wetsam ara tiijai nyang khan she miraq. Jamkhano ngukla tsangtsam raq maiqmii miisaq ka jaqphi na chiim raüta kham ka khuwato!” nguta bomto. Krai mren apaiq raq kra kham ka nyang mak dea riito. Kriithun ka nolajong pinthum wetsam raq shamto.

¹⁸ Joab ma ano ka Abishai. Tsangnai ma anyung mang ka Jeruia. Abishai ka “Nolajong Pinthum Roqtsam” kra pengti riito. Apaiq raq apiq kiishi miili rewebi kong shitsam khatto. Raüta rewe thun ka wiita jiipbaiqto. Raüta apaiq ka “Nolajong Pinthum Roqtsam” phong na ajong ma jawanto.

¹⁹ Apaiq ka kra “Nolajong Pinthum Roqtsam” thaq na ajong pinthumwe riito. Kiimaq tsangshiq pengtiwe ma jato. Shatmaq apaiq ka “Nolajong Pinthum Wetsam” kra khan ajong ka riimak.

²⁰ Kiimahali Kabjeel hiqshongti Jehoiada se Benaia ka nolajong srea weshi hali riito. Apaiq raq rekhat na nolajong jaqsham pahea shamto. Kiimaq apaiq raq Moabnok phan nolajong pinthum maiq wenai kriimin tsatbaiqto. Apaiq ka tsak-hiiq rokrai raüta hüma hiq ma liipan bala, ranaiqshi kiraüta hiqkho bok wa hangsi kaü ashi tsatto.

²¹ Apaiq raq Ejip mungti maiq ahü min jonghea luheawe kaü, ajaq na piqkaü ashi sham raüwe ka tsatto. Benaia raq kriiwe ka klata maq buk raüta, ajaq wa piqkaü kra nyeato. Raüta apaiq ka kriimaq tsatbaiqto.

²² Arthun arka nolawe Benaia raq shamto. Apaiq ka “Nolajong Pinthum Roqtsam” phong na weshi riito.

²³ Apaiq ka tsangshiq phong na ajong pinthumwe riito. Shatmiitiina “Nolajong Pinthum Wetsam” kra khan ka riimak. Dawit raq apaiq ka akhum kheti phenlabi kong thaq na phentuwe ma shongto.

^24-39 Kra, “Nolajong Pinthum Roqtsam” mang thun ka arthun ara: Joab ma ano ka Asahel, Bethlehem chelati Dodo se Elhanan, Harod chelati Shamma nai Elika Pelet chelati Helej Tekoa chelati Ikkosh se Ira Anathoth chelati Abiejar Hushah chelati Mebunnai Aho chelati Jalmon Netopha chelati Maharai Netopha chelati Baana se Heleb Benjamin wang wa Gibea chelati Ribai se Itai Pirithon chelati Benaia Gash chela tho na hiqthung tan na siti Hiddai Araba chelati Abialbon Bahurim chelati Ajmaweth Shaalbon chelati Eliahba Jashen setiim Jonathan Harar chelati Shamma Harar chelati Sharar se Ahiam Maaka chelati Ahasbai se Eliphelet Gilo chelati Ahithophel se Eliam Karmel chelati Hejro Arab mungtiwe Paarai Joba chelati Nathan se Igal Gad chelati Bani Ammon mungti Jelek Beeroth chelati Joab liiq nai piq wiketiwe Naharai Jattir chelati Ira nai Gareb Hitaiq phan Uria Tsangshiq tlotli nolajongbi thun ka roqtsam ri wemiishi riito.