Izaia 8 - Bibl Koad 21: Ar Bibl e Brezhoneg evit ar Vretoned

Pennad 8

¹ An AOTROU a lavaras din: Kemer un dablezenn vras ha skriv warni gant lizherennoù gwelus: Skrapadeg prest! Preizhadeg prim!

² Kemeret em eus ganin testoù feal, Uri an aberzhour ha Zakaria mab Jeberekia.

³ Tostaet em eus ouzh ar brofedez, hag e koñsevas hag e c'hanas ur mab. An AOTROU a lavaras din: Galv anezhañ Maher-Shalal-Hash-Baz.

⁴ Rak a-raok ma ouio ar bugel gervel: Va zad! Va mamm! e vo lamet a-zirak roue Asiria pinvidigezhioù Damask ha preizh Samaria.

⁵ An AOTROU a gomzas c'hoazh din o lavarout:

⁶ Peogwir he deus ar bobl-mañ disprizet doureier Siloa a red goustadik, peogwir he deus laouenaet diwar-benn Rezin ha mab Remalia,

⁷ en abeg da-se, setu, emañ an AOTROU o vont da lakaat da zont warno doureier bras ha kreñv ar stêr, roue Asiria hag e holl c'hloar. Sevel a raio dre holl dreist he naoz, hag en em ledo dreist he holl ribloù.

⁸ Tremen a raio war Juda, o tic'hlannañ hag o veuziñ, tapout a raio betek ar gouzoug. Hec'h eskell astennet a leunio da vro a-bezh, o Emanuel!

⁹ Gouzañvit, pobloù, ha bezit bruzunet! Roit ho skouarn, c'hwi holl eus broioù pell! Prientit ha bezit bruzunet, prientit ha bezit bruzunet!

¹⁰ Kemerit kuzul a-unan hag e vo kaset kuit, komzit hag ho komz a vo diefed, rak Doue a zo ganeomp.

¹¹ Evel-henn en deus komzet an AOTROU pa grogas gant e zorn ennon, ha pa alias ac'hanon da chom hep kerzhout en hent ar bobl-mañ:

¹² Na lavarit ket: Kavailh! bep gwech ma lavaro ar bobl-mañ: Kavailh! N'ho pet ket aon rak ar pezh o deus aon razañ ha na vezit ket spouronet.

¹³ Santelait AOTROU an armeoù, ra vo-eñ ho toujañs hag ho spouron.

¹⁴ Eñ a vo ur santual, met ivez ur maen-kouezh hag ur roc'h a wallskouer evit an daou di eus Israel, ur pech hag ur roued evit tud Jeruzalem.

¹⁵ Kalz anezho a streboto hag a gouezho, a vo bruzunet, a vo luziet ha paket.

¹⁶ Golo an testeni-se, siell al lezenn-se e-touez va diskibien.

¹⁷ Esperout a rin en AOTROU a guzh e zremm ouzh ti Jakob, hag e vin en gortoz anezhañ.

¹⁸ Setu-me amañ, me hag ar vugale a zo bet roet din gant an AOTROU; ni a zo sinoù ha diouganoù en Israel, a-berzh AOTROU an armeoù a zo o chom war Venez Sion.

¹⁹ Ma lavarer deoc'h: Goulennit kuzul digant ar speredoù hag ar sorserien, digant ar re a guzulik hag a grozmol, lavarit: Ur bobl, ha ned aio ket da gavout e Zoue? Hag eo digant ar re varv e c'houlenno evit ar re vev?

²⁰ D'al lezenn ha d'an testeni! Ma ne lavaront ket hervez ar gomz-se, gouloù-deiz ebet evito!

²¹ Kantren a raint er vro, bec'hiet ha marnaoniet. Ha p'o devo naon, e savo droug enno, e villigint o roue hag o Doue, e savint o daoulagad war-zu an nec'h,

²² ha goude e sellint etrezek an douar, ha setu, ne vo nemet tristidigezh, teñvalijenn, enkrezioù dic'houloù, hag e sankint en deñvalded.

²³ Met ne vo ket da viken an deñvalijenn, aze e-lec'h m'en doa renet an enkrez. Evel m'o deus bet izelaet en amzer gentañ douar Zabulon ha douar Neftali, evel-se, en amzer da zont, e vo goloet a c'hloar hent ar mor, en tu all d'ar Jordan, Galilea ar broadoù.