Adlezenn 26 - Bibl Koad 21: Ar Bibl e Brezhoneg evit ar Vretoned

Pennad 26 Frouezh kentañ ha deog. Mirout ar gourc'hemennoù

¹ Pa vi aet er vro a ro dit an AOTROU da Zoue evel hêrezh da berc'hennañ anezhi, hag e vi o chom enni,

² e kemeri ar re gentañ eus holl frouezh an douar a zastumi er vro a ro dit an AOTROU da Zoue, o lakai en ur baner, hag ez i el lec'h en devo dibabet an AOTROU da Zoue evit lakaat e anv da chom ennañ,

³ hag, o vezañ aet etrezek an aberzhour a vo en deizioù-se, e lavari: Disklêriañ a ran hiziv dirak an AOTROU hon Doue ez on deuet er vro en doa touet an AOTROU d'hon tadoù reiñ deomp.

⁴ An aberzhour a gemero ar baner eus da zorn, hag he lakaio dirak aoter an AOTROU da Zoue.

⁵ Komz a ri adarre hag e lavari dirak an AOTROU da Zoue: Va zad a oa un Aramean prest da vont da get, diskenn a reas d'an Ejipt gant un nebeud tud hag e chomas eno, hag e teuas da vezañ ur bobl vras, kreñv ha niverus.

⁶ An Ejipsianed a wallgasas hag a heskinas ac'hanomp, o lakaat warnomp ul labour kalet.

⁷ Kriet hon eus d'an AOTROU, Doue hon tadoù. An AOTROU a glevas hor mouezh hag a welas hor glac'har, hor poanioù hag hor gwask.

⁸ An AOTROU en deus tennet ac'hanomp eus an Ejipt dre un dorn kreñv hag ur vrec'h astennet, dre spontoù bras, dre sinoù ha mirakloù.

⁹ Kaset en deus ac'hanomp d'al lec'h-mañ, ha roet en deus deomp ar vro-mañ, a zever gant laezh ha mel.

¹⁰ Bremañ e tegasan frouezh kentañ an douar ac'h eus roet din, o AOTROU! Hag e lakai anezho dirak an AOTROU da Zoue, hag e stoui dirak an AOTROU da Zoue,

¹¹ hag e laouenai gant al Leviad ha gant an diavaeziad a vo ez touez, evit an holl vadoù roet dit ha da'z tiegezh gant an AOTROU da Zoue.

¹² Pa ez po echu da zastum an holl zeog eus da leve d'an trede bloaz, bloaz an deog, e roi anezhañ d'al Leviad, d'an diavaeziad, d'an emzivad ha d'an intañvez, hag e tebrint e-barzh da zorojoù hag o devo o gwalc'h.

¹³ Hag e lavari dirak an AOTROU da Zoue: Lamet em eus ar pezh a zo santelaet eus va zi, roet em eus anezhañ d'al Leviad, d'an diavaeziad, d'an emzivad ha d'an intañvez, hervez an holl c'hourc'hemennoù ac'h eus kemennet din, ne'm eus torret netra na ankounac'haet hini eus da c'hourc'hemennoù,

¹⁴ ne'm eus debret netra pa oan e kañv, ne'm eus lamet netra evit un implij dic'hlan, ne'm eus roet netra evit ur marv, sentet em eus ouzh mouezh an AOTROU va Doue, graet em eus hervez ar pezh ac'h eus gourc'hemennet din.

¹⁵ Sell eus da chomlec'h santel, eus an neñvoù, bennig da bobl Israel hag ar vro ac'h eus roet deomp, evel ma'z poa touet d'hon tadoù, ur vro a zever gant laezh ha mel.

¹⁶ Hiziv, an AOTROU da Zoue a c'hourc'hemenn dit ober diouzh ar reolennoù hag ar barnedigezhioù-mañ; mirout a ri anezho hag e ri diouto eus da holl galon hag eus da holl ene.

¹⁷ Lakaet ec'h eus an AOTROU da lavarout hiziv e vo da Zoue, hag e kerzhi en e hentoù, hag e viri e reolennoù, e c'hourc'hemennoù hag e varnedigezhioù, hag e senti ouzh e vouezh.

¹⁸ Hag an AOTROU en deus lakaet ac'hanout da lavarout hiziv e vi dezhañ ur bobl ispisial, evel m'en deus lavaret dit, hag e viri e holl c'hourc'hemennoù,

¹⁹ hag e lakaio ac'hanout dreist an holl bobloù en deus graet, e meuleudi, anv ha gloar, hag e vi ur bobl santelaet d'an AOTROU da Zoue, evel m'en deus lavaret.