Adlezenn 22 - Bibl Koad 21: Ar Bibl e Brezhoneg evit ar Vretoned

Pennad 22

¹ Pa weli e vo kollet ejen da vreur pe e zañvad, n'en em zistroi ket dioutañ, ne vanki ket d'e zegas da'z preur.

² Ma n'eo ket da vreur o chom ez kichen ha ma n'anavezez ket anezhañ, e repui al loen e-barzh da di, hag e chomo ganit betek ma teuio da vreur d'e gerc'hat, hag en roi en-dro dezhañ.

³ En hevelep doare e ri evit e azen, e ri evit e zilhad, hag evit pep tra all en devo kollet da vreur hag az po kavet, ne c'helli ket en em zistreiñ dioutañ.

⁴ Pa weli e vo kouezhet war an hent azen da vreur pe e ejen, n'en em zistroi ket dioutañ, e sevel a ri gantañ.

⁵ Ur wreg ne zougo ket ur gwiskamant gwaz, hag ur gwaz ne wisko ket ur gwiskamant gwreg, rak piv bennak a raio an traoù-se a vo un euzhusted d'an AOTROU da Zoue.

⁶ Pa gavi war an hent, war ur wezenn pe war an douar, un neizh labous gant reoù vihan pe vioù, hag ar vamm o c'holeiñ ar re vihan pe ar vioù, ne gemeri ket ar vamm gant he re vihan,

⁷ lezel a ri da vont ar vamm hag e kemeri ar re vihan evidout, evit ma vi eürus ha ma vo hiraet da zeizioù.

⁸ Pa savi un ti nevez, e ri un aspled en-dro d'e doenn, evit na lakai ket gwad war da di ma kouezhfe unan bennak ac'hane.

⁹ Ne hadi ket da winienn gant hadennoù disheñvel, gant aon na vefe saotret frouezh da hadoù az po hadet ha frouezh da winienn.

¹⁰ N'ari ket gant un ejen hag un azen a-gevret.

¹¹ Ne wiski ket un dilhad eus gwiad mesket, gloan ha lin asambles.

¹² Ober a ri pempilhoù ouzh pevar c'horn ar vantell m'en em c'holoi ganti.

¹³ P'en devo un den kemeret ur wreg, ha goude bezañ deuet d'he c'havout, e kasa anezhi,

¹⁴ hag e ro tro da gomz fals diwar he fenn, da zismegañsiñ hec'h anv, en ur lavarout: Kemeret em eus ar wreg-mañ, ha pa'z on tostaet outi, ne'm eus ket he c'havet gwerc'hez,

¹⁵ tad ha mamm ar plac'h yaouank a gemero hag a zegaso testeni gwerc'hded ar plac'h yaouank dirak henaourien kêr, ouzh an nor.

¹⁶ Tad ar plac'h yaouank a lavaro d'an henaourien: Roet em eus va merc'h d'an den-se evit gwreg, ha kasaet en deus anezhi,

¹⁷ hag e ro tro da gomz fals diwar he fenn en ur lavarout: Ne'm eus ket kavet da verc'h gwerc'hez. Setu amañ testeni gwerc'hded va merc'h. Hag ec'h astennint an dilhad dirak henaourien kêr.

¹⁸ Henaourien kêr a gemero ar gwaz-se da gastizañ anezhañ.

¹⁹ Paeañ a raio un dell a gant sikl arc'hant da dad ar plac'h yaouank, dre m'en devo dismegañset ur werc'hez eus Israel. Hag e vo e wreg, ha ne c'hello ket he c'has kuit e-keit ha ma vevo.

²⁰ Met mard eo gwir an dra, ma ne vefe ket bet kavet gwerc'hez ar plac'h yaouank,

²¹ e tegasint ar plac'h yaouank ouzh dor ti he zad, hag e veinataio anezhi tud kêr, hag e varvo, rak graet he deus un euzhusted en Israel, o c'hastaouiñ e ti he zad. Evel-se e vo lamet an droug diouzh Israel.

²² Pa vo kavet un den o kousket gant ur wreg dimezet d'ur gwaz, e varvint o-daou, an den en devo kousket gant ar wreg hag ar wreg. Evel-se e vo lamet an droug diouzh Israel.

²³ Pa vo ur plac'h yaouank gwerc'h prometet e dimeziñ da ur gwaz, m'en devo un den he c'havet e kêr ha kousket ganti,

²⁴ e tegasot o-daou ouzh dor kêr, hag e veinataiot anezho, hag e varvint, ar plac'h yaouank dre ma n'he deus ket kriet e kêr hag an den dre m'en deus dismegañset gwreg e nesañ. Evel-se e vo lamet an droug diouzh da greiz.

²⁵ Met mar kav an den er parkeier ar plac'h yaouank prometet, ha penaos e wall anezhi hag e kousk ganti, an den en devo kousket ganti a varvo e-unan.

²⁶ Ne ri netra d'ar plac'h yaouank, n'he devo ket graet ar plac'h yaouank a bec'hed din a varv, rak an afer-mañ a vo evel pa en em sav un den a-enep e nesañ hag e lam e vuhez digantañ;

²⁷ kavet en devo anezhi er parkeier, ha kriet he defe ar plac'h yaouank prometet, hep na vefe den evit saveteiñ anezhi.

²⁸ Mar kav un den ur plac'h yaouank gwerc'h ha n'eo ket prometet e dimeziñ, ha penaos e tap anezhi hag e kousk ganti, ha ma pakfed anezho,

²⁹ an den en devo kousket ganti a roio da dad ar plac'h yaouank hanter-kant sikl arc'hant, hag e vo e wreg, dre m'en devo he dismegañset, ha ne c'hello ket he c'has kuit e-keit ha ma vevo.

³⁰ Den ne gemero gwreg e dad ha ne zizoloio goloenn e dad.