Adlezenn 21 - Bibl Koad 21: Ar Bibl e Brezhoneg evit ar Vretoned

Pennad 21 Reolennoù a bep seurt

¹ Mard eo kavet, er vro en devo an AOTROU da Zoue roet dit da berc'hennañ, un den lazhet astennet en ur park, hep gouzout piv en devo e lazhet,

² da henaourien ha da varnerien a zeuio da vuzuliañ an hed adalek an den lazhet betek ar c'hêrioù a zo en-dro dezhañ.

³ Henaourien ar gêr a vo an hini dostañ ouzh an den lazhet a gemero un annoar na vo ket bet labouret ganti ha n'he devo ket sachet ar yev.

⁴ Henaourien ar gêr-se a lakaio an annoar da ziskenn etrezek ur froud padus, na vez na labouret na hadet en e gichen, hag eno e torrint gouzoug an annoar er froud.

⁵ Hag an aberzhourien mibien Levi a dostaio, rak an AOTROU da Zoue en deus o dibabet evit e servijañ hag evit bennigañ en anv an AOTROU, hag eus o genoù e vo barnet pep enebiezh ha pep taol.

⁶ Henaourien ar gêr a vo an hini dostañ ouzh an den lazhet a walc'ho o daouarn war an annoar bet torret he gouzoug er froud.

⁷ Hag e komzint o lavarout: Hon daouarn n'o deus ket skuilhet ar gwad-se hag hon daoulagad n'o deus ket henn gwelet.

⁸ Bez trugarezus e-keñver da bobl Israel ac'h eus dasprenet, o AOTROU! Na lez ket ar gwad didamall evel bec'h war da bobl Israel, hag ar gwad a vo pardonet dezho.

⁹ Evel-se e tilami ar gwad didamall eus da greiz, en ur ober ar pezh a zo reizh dirak daoulagad an AOTROU.

¹⁰ Pa'z i d'ar brezel a-enep da enebourien, hag e lakaio anezho an AOTROU da Zoue etre da zaouarn, hag e ri prizonidi,

¹¹ hag e weli e-touez ar brizonidi ur wreg kaer, hag ez po c'hoant anezhi, hag e fello dit he c'hemer evit gwreg,

¹² e kasi anezhi e-barzh da di. Houmañ a douzo he fenn hag a ficho hec'h ivinoù,

¹³ lemel a raio diwarni he dilhad prizoniadez, chom a raio ez ti hag e ouelo he zad hag he mamm e-pad ur miz. Goude-se ez i d'he c'havout, hag e vi he fried hag hi a vo da wreg.

¹⁴ Mar erru na blijfe ket dit ken, e kasi anezhi kuit el lec'h ma karo, met ne c'helli ket he gwerzhañ evit arc'hant nag ober ur sklavez anezhi dre ma ez po he dismegañset.

¹⁵ P'en devo un den div wreg, unan karet hag eben kasaet, hag o devo ganet bugale dezhañ kenkoulz an hini garet evel an hini gasaet, hag e vo ar mab kentañ-ganet d'an hini gasaet,

¹⁶ pa roio o hêrezh d'e vibien eus ar pezh en devo, ne c'hello ket ober kentañ-ganet mab an hini garet, en a-raok da vab an hini gasaet, hemañ eo ar c'hentañ-ganet.

¹⁷ Anavezout a raio mab an hini gasaet evit ar c'hentañ-ganet, hag e roio dezhañ ul lodenn doubl eus ar pezh en devo, rak hemañ eo frouezh kentañ e nerzh, an henañded a vo dezhañ.

¹⁸ P'en devo un den ur mab fall ha disent, na sento ket ouzh mouezh e dad nag ouzh mouezh e vamm, ha na fello ket dezhañ o selaou goude ma vo bet kastizet,

¹⁹ an tad hag ar vamm a gemero anezhañ hag en kaso da henaourien kêr, ouzh dor al lec'h,

²⁰ hag e lavarint da henaourien kêr: Setu hor mab a zo fall ha disent, ne sent ket ouzh hor mouezh, en em ro d'an diroll ha d'ar mezventi.

²¹ Holl dud kêr a veinataio anezhañ hag e varvo. Evel-se e vo lamet an droug diouzh da greiz, evit ma klevo ha ma toujo holl Israel.

²² P'en devo graet un den ur pec'hed din a varv, hag e vo lakaet d'ar marv, hag e vo krouget ouzh ar c'hoad,

²³ e gorf marv ne dremeno ket an nozvezh ouzh ar c'hoad, met sebeliañ a ri anezhañ an deiz-se, rak ur vallozh eus Doue eo kement hini a zo krouget, ha ne saotro ket ar vro en devo an AOTROU da Zoue roet dit evel hêrezh.