Adlezenn 12 - Bibl Koad 21: Ar Bibl e Brezhoneg evit ar Vretoned

Pennad 12 Ul lec'h hepken evit azeuliñ

¹ Setu ar reolennoù hag ar barnedigezhioù a virot, diouto e reot er vro a ro deoc'h an AOTROU, Doue da dadoù, evit he ferc'hennañ, e-pad an holl amzer a vevot war an douar.

² Distrujañ a reot an holl lec'hioù m'o devo servijet enno o doueoù ar broadoù emaoc'h o vont da gas kuit, war ar menezioù uhel, war ar c'hrec'hiennoù ha dindan kement gwezenn c'hlas.

³ Hag e tiskarot o aoterioù, e torrot o delwennoù, e tevot en tan o asheraoù, e troc'hot skeudennoù kizellet o doueoù, e tilamot o anvioù diwar al lec'hioù-se.

⁴ Ne reot ket evel-se e-keñver an AOTROU ho Toue,

⁵ met klask a reot anezhañ el lec'h en devo dibabet an AOTROU ho Toue a-douez hoc'h holl veuriadoù, evit lakaat e anv da chom ennañ; dont a ri eno.

⁶ Eno e tegasot ho loskaberzhoù, hoc'h aberzhoù, ho teogoù, ar profoù savet eus ho taouarn, hoc'h aberzhoù evit seveniñ ur gouestl, ho profoù a-youl-vat, re gentañ-ganet ho loened bras hag ho loened bihan.

⁷ Eno e tebrot dirak an AOTROU ho Toue hag e laouenaiot, c'hwi hag ho tiegezhioù, eus an holl draoù en devo resevet ho taouarn hag en devo ho penniget an AOTROU ho Toue drezo.

⁸ Ne reot ket evel ma reomp hiziv, pep hini evel ma kav reizh,

⁹ rak n'oc'h ket erruet c'hoazh d'an diskuizh ha d'an hêrezh a ro deoc'h an AOTROU ho Toue.

¹⁰ Tremen a reot ar Jordan hag e chomot er vro a ro an AOTROU ho Toue da hêrezh deoc'h. Hag ho po diskuizh diouzh hoc'h holl enebourien tro-war-dro, hag e chomot e surentez.

¹¹ Neuze e vo ul lec'h dibabet gant an AOTROU ho Toue evit lakaat e anv da chom ennañ. Eno e tegasot kement a c'hourc'hemennan deoc'h, ho loskaberzhoù, hoc'h aberzhoù, ho teogoù, ar profoù savet eus ho taouarn, pep prof ho po dibabet evit seveniñ ur gouestl ho po graet d'an AOTROU.

¹² Eno e laouenaiot dirak an AOTROU ho Toue, c'hwi, ho mibien, ho merc'hed, ho servijerien, ho mitizhien, hag al Leviad a vo e-barzh ho torojoù, rak n'en deus na lodenn na hêrezh ganeoc'h.

¹³ Diwall da ginnig da loskaberzhoù e pep lec'h a weli,

¹⁴ met da loskaberzhoù a ginnigi el lec'h dibabet gant an AOTROU en unan eus da veuriadoù, hag eno e ri kement a c'hourc'hemennan dit.

¹⁵ Koulskoude, hervez c'hoantoù da ene, e c'helli lazhañ ha debriñ kig e-barzh da zorojoù, hervez ar vennozh en devo roet dit an AOTROU da Zoue. An hini dic'hlan hag an hini glan a zebro, evel ma vez debret ar c'hazelenn pe ar c'harv.

¹⁶ Nemet ne zebrot ket ar gwad, en skuilhot war an douar evel dour.

¹⁷ Ne c'helli ket debriñ e-barzh da zorojoù deog da winizh, da win ha da eoul, na re gentañ-ganet da loened bras ha da loened bihan, na da aberzhoù evit seveniñ ur gouestl, na da brofoù a-youl-vat, nag ar profoù savet eus da zaouarn.

¹⁸ Debriñ a ri anezho dirak an AOTROU da Zoue, el lec'h dibabet gant an AOTROU da Zoue, te, da vab, da verc'h, da servijer, da vatezh, hag al Leviad a vo e-barzh da zorojoù, hag e laouenai dirak an AOTROU da Zoue eus an holl draoù en devo resevet da zaouarn.

¹⁹ Diwall da zilezel al Leviad keit ha ma vevi war an douar.

²⁰ P'en devo ledanaet an AOTROU da Zoue da harzoù, evel m'en deus prometet dit, e lavari: Fellout a ra din debriñ kig! Rak da ene a c'hoantaio debriñ kig. Hag e c'helli debriñ hervez c'hoantoù da ene.

²¹ Mard eo pell diouzhit al lec'h dibabet gant an AOTROU da Zoue evit lakaat e anv da chom ennañ, e c'helli lazhañ eus da loened bras hag eus da loened bihan evel ma em eus gourc'hemennet dit, hag e c'helli o debriñ e-barzh da zorojoù hervez c'hoantoù da ene.

²² O debriñ a ri evel ma vez debret ar c'hazelenn pe ar c'harv, an hini dic'hlan hag an hini glan o debro.

²³ Koulskoude e vi sur na zebri ket ar gwad, rak ar gwad eo an ene, ha ne zebri ket an ene gant ar c'hig.

²⁴ N'en debri ket, en skuilhi war an douar evel dour.

²⁵ N'en debri ket evit ma vi eürus, te ha da vibien war da lerc'h, en ur ober ar pezh a zo reizh dirak daoulagad an AOTROU.

²⁶ Met kemer a ri da draoù santel ha da aberzhoù evit seveniñ ur gouestl, hag e teui d'al lec'h dibabet gant an AOTROU.

²⁷ Kinnig a ri da loskaberzhoù, kig ha gwad, war aoter an AOTROU da Zoue; gwad da aberzhoù all a vo skuilhet war aoter an AOTROU da Zoue, hag e tebri ar c'hig.

²⁸ Mir ha selaou an holl draoù a c'hourc'hemennan dit evit ma vi eürus, te ha da vibien war da lerc'h, da viken, en ur ober ar pezh a zo mat ha reizh dirak daoulagad an AOTROU da Zoue.

²⁹ P'en devo distrujet an AOTROU da Zoue a-zirazout ar broadoù emaout o vont da gas kuit, pa berc'henni o bro hag e vi o chom enni,

³⁰ diwall da gouezhañ er pech en ur vont war o lerc'h, goude ma vint bet distrujet azirazout; diwall da glask titouroù diwar-benn o doueoù, o lavarout: Penaos e servije ar pobloù-se o doueoù? Me a raio evel-se, me ivez.

³¹ Ne ri ket evel-se e-keñver an AOTROU da Zoue, rak graet o deus d'o doueoù kement a zo un euzhusted d'an AOTROU, ar pezh a gasa, ha zoken o deus devet en tan o mibien hag o merc'hed d'o doueoù.

³² Mirout a reot an holl draoù a c'hourc'hemennan dit hag e reot diouto, ha ne lakaiot netra ouzhpenn enno ha ne lammot netra diouto.