2 Samuel 9 - Bibl Koad 21: Ar Bibl e Brezhoneg evit ar Vretoned

Pennad 9

¹ Neuze e lavaras David: Ha ne van eta den eus ti Saül, evit ma rin vad dezhañ abalamour da Jonatan?

² Bez' e oa eus ti Saül ur servijer anvet Ziba, a voe galvet da gavout David. Hag ar roue a lavaras dezhañ: Ha te eo Ziba? Hag e respontas: Da servijer!

³ Ar roue a lavaras: Ha n'eus den ken eus ti Saül, ma rin en e geñver trugarez hervez Doue? Ha Ziba a respontas d'ar roue: Bez' ez eus c'hoazh ur mab da Jonatan, mac'hagnet e dreid.

⁴ Ar roue a lavaras dezhañ: Pelec'h emañ? Ha Ziba a respontas d'ar roue: Emañ e ti Makir mab Amiel, e Lodebar.

⁵ Neuze ar roue David a gasas d'e gerc'hat eus ti Makir mab Amiel, e Lodebar.

⁶ Pa voe deuet Mefiboshed mab Jonatan, mab Saül, da gavout David, e kouezhas war e zremm, hag e stouas. David a lavaras: Mefiboshed! Hag e respontas: Da servijer!

⁷ David a lavaras dezhañ: Na'z pez ket aon, rak a-dra-sur e rin vad dit, abalamour da Jonatan da dad, hag e roin dit holl zouaroù Saül da dad, hag e tebri bara da viken ouzh va zaol.

⁸ Hag e stouas en ur lavarout: Petra eo da servijer, ma ec'h eus sellet ouzh ur c'hi marv eveldon?

⁹ Neuze ar roue a c'halvas Ziba servijer Saül hag a lavaras dezhañ: Roet em eus da vab da vestr kement tra a oa da Saül ha d'e holl di.

¹⁰ Labourat a ri evitañ an douaroù-se, te ha da vibien ha da servijerien, hag e tastumi ar frouezh anezho, evit m'en devo mab da vestr bara da zebriñ. Ha Mefiboshed mab da vestr a zebro da viken ouzh va zaol. Ziba en doa pemzek mab hag ugent servijer.

¹¹ Ziba a lavaras d'ar roue: Da servijer a raio kement en deus gourc'hemennet ar roue va aotrou d'e servijer. Ha Mefiboshed, eme ar roue, a zebro ouzh va zaol evel unan eus mibien ar roue.

¹² Mefiboshed en doa ur mab yaouank anvet Mika. An holl re a oa o chom e ti Ziba a oa servijerien Mefiboshed.

¹³ Mefiboshed a oa o chom e Jeruzalem, rak dalc'hmat e tebre ouzh taol ar roue. Hag e oa mac'hagnet eus e zaoudroad.