SEKARIA 3 - Bukuit Ne Tilil

Ng'ang'utyetap ang'wan: Joshua tisiindet ne oo ak Setani

¹ Ak ki iboorwo `ineendet tisiindet ne oo nooto Joshua kotonone taitap malaikaiyatap Kamuktaindet ne Toroor, ak kotonone agine Setani komostap eunnyi ne po tai koek ne kirindoi.

² Ak ki leenji Kamuktaindet ne Toroor Setani, Ingogeerin kong' Kamuktaindet ne Toroor, ee Setani; ee, ingogerin kong' Kamuktaindet ne Toroor ne ki lewen Jerusalem: tos ma mecheita niito ne kaginemune ma?

³ Ki ilaachi Joshua ngoroik che murwonen, ak ki tonon eng' taitap malaikaiyandanooto.

⁴ Ak ki wol ineendet koleenji icheek che kitonone tainnyi, Oreegune ineendet ngoroikyik che murwonen. Ak ki mwachi ineendet koleenji, Keero, kaistoenen tengektong'ung', ak alaagun ngoroik che korooron.

⁵ Ki ale anyun, Ingogerchine icheek ineendet metinnyi chepkulet ne tiliil. Ki ilaakyi anyun ineendet chepkulet ne tiliil, ak kolaakyi ngoroik; ak kitonone malaikaiyatap Kamuktaindet ne Toroor ole neegitee ineendet.

⁶ Ak kibaoryanji `malaikaiyatap Kamuktaindet ne Toroor Joshua eng' kimnateet, koleenji,

⁷ Mwaei Kamuktaindet ne Toroor ne po lugoosyek kole: Ngot iwendote ortinwekyuk, ak ngot iriip ng'atuutikyuk, irwooksechi anyun aginye koonnyu, ak iriip seremusyekyuk, ak ayaatun ole ibunoti eng' kwenutap chu tonondos eng' yuto.

⁸ Kas anyun nguno, ee Joshua tisiindet ne oo, inyee kobooto choronoguk che ibuuri eng' taing'ung'; amu kaboorunet pichooto: amu, keero, amutu otwogindennyu ne Temet.

⁹ Amu, ogeero, koita ne ki ande taitap Joshua; tinyei koita agenge koonyek tisap: ogeero, asirchini siruutik koyata eng' waet, mwaei Kamuktaindet ne Toroor ne po lugoosyek, ak aiste tengektap emonooto eng' peetuunak.

¹⁰ Mwaei Kamuktaindet ne Toroor ne po lugoosyek, kole tuun kuurei chii age tugul eng' okweek chiitap kokwennyi, eng' peetuunooto, konyo keel keetitap sabibuk, ak ne po mogoywet.