MIKAH 4 - BUKUIT NE TILIIL Sireet ne Dutero Kanon

Pou `Kamuktaindet piikyik eng' kaalyeet

¹ Ki kimiti eng' peetuusyek che po let tulweetap kootap Kamuktaindet ne Toroor eng' tuloonook parak, ak kitoroori kosiir tuloonook che mengeechen; ak kotendenji pororyosyek.

² Ak pendi pororyosyek che chaang' ak komwa kole: “Obwa, ketogoste tulweetap Kamuktaindet ne Toroor, ak keebe kootap Kiptaiyat Kamuktaindetap Jakobo; si koneetech ortinwekyik, ak kebendatee ortinwekyik.” Amu mang'une ng'atuutik Zion, ak komang'une ng'olyootap Kamuktaindet ne Toroor Jerusalem.

³ Ak korwooksechin pororyosyek che chaang', ak koger kong' pororyosyek che kiimeen che mi ole loo; ak kotany rotonikwak po chok koek mogomboik che po tuuga, ak kotany ng'otwekwak koek chepkesok si ma kobaregei pororyosyek, ama koneetegei lugeet kogeny.

⁴ Ago tebee chii tugul kelutap keetinnyi ne po sabibuk ak mogoywennyi, ama mi chii ne imui icheek, amu kagomwa Kamuktaindet ne Toroor ne po lugoosyek ng'olyoondoniito.

⁵ Amu wendoti pororyet age tugul eng' kainetap kamuktaindennyi, ak kibendotee acheek kainetap Kamuktaindet ne Toroor Kamuktaindennyo koigeny ak koigeny.

⁶ Mwaei Kamuktaindet ne Toroor kole, ayumunoti eng' peetuunooto ineendet ne ing'wali kobooto ineendet ne kigeon, ak ineendet ne ki anyaliil;

⁷ ak ayai ineendet ne ing'wali koek ne ng'etunot, ak ayai ineendet ne kigetimda kolooit koek pororyet ne kiim, ak koboi `Kamuktaindet ne Toroor icheek eng' tulweetap Zion kobooch yooto agoi koigeny.

⁸ Nyonjinin ng'olyoondoniito, ee inyee, teekseet ne kooi ne po akweetap keechiirek, tulweetap cheptap Zion; ee, nyoonei pounateng'ung' ni ki po tai, pounatetap cheptap Jerusalem.

⁹ Amu nee anyun si iwaach? Tos metinye laitoryat, tos ki kobet chiing'ung' ne po kapkirwook, kot konamin ng'waninwek che uu che po kwondo ne machei kosigiis?

¹⁰ Ingonamin ng'wanindo, ak igimu, ee cheptap Zion, ko uu kwondo ne machei kosigiis: amu imandoi anyun nguno eng' nganaseet ak imeny mbar, ak iwe agoi Babilon; kisaruun eng' olooto; ityaachin Kamuktaindet ne Toroor eng' olooto eng' eutap puuniguk.

¹¹ Kagoyumjingei anyun pororyosyek che chaang' che leen, Ingong'wanit, ak ongetang'aang'ji Zion.

¹² Ago ma naei kabwaatutigap Kamuktaindet ne Toroor, ama iguitos kirwoogennyi; amu ki koyum icheek ko uu ye kiyumjin ratuutigap peek rwanyut ne kiboorsee.

¹³ Ng'eet ak iboor, ee cheptap Zion, amu ayae kuineng'ung' koek karnet, ak ayae sioguk koek sugunwet; ak itonaton pororyosyek che chaang', ak itabaanji Kamuktaindet ne Toroor kelunoikwak, ak itabaanji tuguukwak Kiptaiyat ne po ng'wony komugul.