JEREMIA 18 - Hawa Naga Bible 2001

Tuik lauz jix Waz Yuimx nuex httax yaq Yeremia

¹ Yehowa rueq ngaz muex jungx phuex,

² “Tuik lauz jix waz yuimx nuex svt kaz kuiuz, ngaz rueq mnoz muex ngvy bomjungc kuq phaungx,” ngoz tueq.

³ Kvkhoc rvtueq ngaz kuex kvyuq kaz koq tueq tuik lauz juing tvroz thvt yaq tuik lauz jix waz kuex khiz kaz tauk.

⁴ Tuik lauz jix waz piq rueq vtvhungx tuik nuex vmac vtsac httax ruiux yuq, kvruex tuik gvmlawx kuex lvmz vtueq vganc phvnx tvhungx gay yaq.

⁵ Kvruex yimaq Yehowa rueq ngaz muex jungx phuex,

⁶ “Tuik lauz jix waz rueq gvmlawx ghaq maq lauz yaq ikhoc ngaz rueq mnoz Israel miqsaz htenc kuex ruez lot mauk haz? Gvmlawx ghaq kuex tuik lauz jix waz yauk nuex rvtueq ikhoc mnoz kuex ngvy yauk nuex rvtueq.

⁷ Mkhoc baunglaung nuex dvyx ngoz ruiux muinz, unuk phvnx, mruex mungtan kuex ngaz rueq baungc vtueq, tvbunx gay ruiux tvbac gay tvkoc ngaz rueq jungx ruiux muinz,

⁸ ngaz rueq ngoz vshaungx miqphvnx kuex piq layx vbac wawc kvroz wvnc yek ruiux yuq, murx tvgurc tvkoc ngaz rueq jungx tauk, yuq muinz kvruex ngaz rueq ruez shaungx rvmuq.

⁹ Lvmz vganc maq jungx ix ngoz ruiux yuq, unuk phvnx, mruex mungtan kuex khic yuingc vtueq guirc tvkoc ngaz rueq jungx ruiux muinz,

¹⁰ miqphvnx rueq ngvy kvjaz kuex tay muq maq layx bac shuimx kaz ruiux yuq, ngaz rueq shuimx shaungx ngoz tauk htenc kuex ngaz rueq shuimx shaungx rvmuq.

¹¹ Kvkhoc ningkhvnc nuex, ngaz rueq Yuda mungx miqsaz nuiyc Yerusalem ghaq jix htenc kuex khawc lvlc tvkoc kvmungx vshaungx nuiyc tsuingshiq muex murx tvgurc tvkoc tvyoalc yoalx kuex tsuingshiq muex jungx shuiuz. Mvrax lvmx phvnc nuex tvraungx yaq rullungx htenc kuex gay shec ruiux tsuingshiq honc vyaungc nuiyc tsuingshiq rueq shuimx yaq layx vbac yauk shuimc htenc kvwawc kvroz wvnc tvkoc tsuingshiq muex jungx shuiuz.

¹² Tsuinghez rueq, ‘Rvmuq, nuiyshiq kuex kvlayc lot miq, yvmx ngoz tueq kvlayc kay lac? Nuiyshiq lotlaz kuex khux tsanz jix nuiyc layx bac jix rvtiq nuiyshiq rueq ruez roc shix kuex ruez shix,’ ” ngoz tueq tvralc shuex.

Yehowa muex Tvdux jix Miqsaz

¹³ Yehowa rueq, “Kungkhux nuex kvkhoc phvnx khac kuex mkaq muinz yaungx tueq shex ngoz ruiux, miqphvnx ruip rawx muex wiz shuiuz. Israel miqsaz rueq kvhiz juing phvnx shuimx kaz tueq!

¹⁴ Lebanon lung rauk johvlc htenc nuex tv-nguirx dvy muq vkhing httax yaq haz? Kuz kuiyq wawc kaz yaq yuix saz ruilx kuex ruic yaq haz?

¹⁵ Yuq muinz ngvy miqsaz rueq ngaz kuex lauk gay phuex; tsuingshiq rueq phara yac yuimx htenc nuex vhomc vtumc phvnx jauk yaq. Tsuingshiq kuex tsuingshiq kay aungx yaq lvmx nuex kvhtuip rul wuez tueq; tsuingshiq rueq lvmx kez kuex phvnx muq shex; tsuingshiq kuex lvmx penc guez nuex khuemx wuez yaq.

¹⁶ Tsuingshiq rueq vruex mungtan kuex kawc yawc kvkhuirc juing nuiyc pattup yomnamc juing baung tvyaungc gay tueq. Kvruex maq lvy jix lotlaz kuex tsuingshiq rueq khiz shuex kvmac vhuingc rvtuex; tsuingshiq kuex wangc wuez vtueq tsuingshiq khux htenc kuex buirc wuez shuex.

¹⁷ Ngaz rueq tsuingshiq kuex shaldungc raungguil rueq pvnc gay yaq bokkhuyx ikhoc, ngvy miqsaz kuex tsuingshiq muex ralx hez khaungkac nuex tvpanc gay shaungx. Ngaz rueq tsuingshiq muex yix nungx shung gay shaungx; thuimkux kaz ruiux yuq ngaz rueq tsuingshiq muex romc kuq mauk,” ngoz tueq jungx tueq.

Yeremia muex Vbac Kvmungx lvmz

¹⁸ Kvruex yimaq miq htenc rueq, “Yeremia muex phvnx shishiz ruez thalx ix! Naungshiq muex tvhonc tvtharc tvkoc shomc waz bix, naungshiq muex tharc jungc kuy jix wvtharc miqsaz htenc nuiyc Tishox bomjungc kuy jix shvmmax bix kuex mkaq muinz vhttax rvtuex. Piq rueq jungx yaq kvjaz kuex tay miq maq, piq mvrax dvyx thuiyx wuez ix,” ngoz tueq jungx wuez tueq.

¹⁹ Kvkhoc rvtueq ngaz rueq, “Yehowa lex, ngaz rueq yvmx lac jungx vshaungx tay kuq koq, ngaz muex ralx yaungx yaq hez rueq ngvy lvmz nuex seng vtueq yvmx lac jungx yaq nguinx kuex tay shuiuz.

²⁰ Vhvlx kuex vbac maq tvyez mvy yaq haz? Tsuingshiq rueq ngvy tvdvy gay muex ghaqkhurx htuz wuez yaq. Tsuingshiq kuex mthuinz khvy maq ruez gay muq juing, tsuingshiq pumz phuix laung ngaz kuex mnoz kox nuex yvmx khoc tvtay jungc kay juing lac kuex rvwvl kuq koq.

²¹ Yuq muinz majuiuc, Yehowa lex, tsuingshiq sahez kuex rvmc muex tvthueyc gay shuiuz; tsuingshiq kuex ralx rvlungc nuex mthvt gay shueq. Tsuingshiq muex nox tvlvp muq maq mvntix nyuiuz muex tvyaungc shuiuz; miqwaz rulx vthuiuz rueq thueyc vtueq yalxrox bix kuex ralx lungc nuex mthueyc kueq.

²² Honc tvsvmz kuy vguez maq, tsuingshiq yuimx kuex httak gay tvkoc tvrac vguez miq phungc shiz kuex tvkaz shuiuz, tsuingshiq kuex tvkawc yawc vtueq tsuingshiq kuex tvkhoar sez shuiuz. Tsuingshiq rueq ngvy lvp tvkoc bix nuiyc ngvy tvhtuip tvkoc ghaqkhurx kuex htuz taq tueq.

²³ Yuq muinz, Yehowa lex, ngvy thvy tvkoc tsuingshiq rueq kvmungx yaq lvmz lotlaz kuex mnoz rueq tuiuz yaq. Tsuingshiq layx bac yauk shuimc, rvmuq ngoz ruiux tsuingshiq mvrax kuex nauk dawc kuq kaz. Tsuingshiq kuex tvsumx tvdvy gay shuiuz; mthuinz khaq yaq baunglaung tsuingshiq kuex tvhonc tvtharc shuiuz.”