Eleetalayi yan Fool akiicumuu Tit 3 - Jola-Kasa

Buloŋ bata an áyinene li Yéesu

¹ Uwayil̥en bukanabuku feh ooniil koote kuwalenoolo hákil kunahaanaku kaakumuu etaamayi, li kaakumuu kuhaanaaku, ban li kunaak kútuuliil, ban li kunaak foof kukaan majake manooman.

² Jakum kulob majakut kuya li an. Kootut kunaak kúmuyiten bukan, ban koote kukaan bukan kásuume. Koote kulako bukan kájoobiye uyinum nanoonan hákil bukanabuku feh.

³ Li mal̥egenamu, alolaal foof lulakowaalako no bukan kahaasut wahoowah, kátuulut Ateemit, li bukan kájime. Lulakowaalako no emiikeel yata kásiibo li kásuum kanookan, ban li uloŋaal no buloŋ bata búl̥afut li kásiibo, min ukaanoolowaal no bukan kajakut majak, ban li uhoyoolaal.

⁴ Bale nan Ateemit ammuu Afakenaawu oololaal, áhiisumuu másuumamu li húbooliyahu han abajumuu boot li bukanabuku,

⁵ li afakenolaal, ban inti bakaanelolaal bacole bújiye, bale káyiyenaku kan áyiyenolaamuu kújiye. Láfakenumolaafaken li kábatiisaaku kata li malamu, li búkaanum bata Buyinumabu Banabaabu bakaanemuu an alaañ an awunkul, min abaj buloŋ buwunkul.

⁶ Ateemit lájowunjowum li Yéesu Kilisita ammuu Afakenaawu oololaal, min ayiis ŋáa’ Buyinumabu umbu Banabaabu li alolaal.

⁷ Ateemit lakankaan mo, bájum li ujokaali bukan kacole humum hata kájiyaku koola, min buloŋabu bábaneliitumuu ban úkangumaamuu li bo bulako boololaal.

⁸ Laalu hulim hata mal̥egen. Lifañe min ulob unooten mata kulimaku unku, mantee bukanabuku káyinenumuu li Ateemit li kujooŋoo to li mal̥egen min kukaan wah wajake. Wahawu unwu ujakumuu ban li ubaj jáliŋ li bukanabuku feh.

⁹ Bale awu utey búwonnoolabu basoŋetaabu li elob mata uland, búceeŋoo li búwonnoo mata eluwaayi: wahawu unwu ubajut jáliŋ, ban bul̥uuhoo.

¹⁰ An agiiloole bukan, fan ujand ulobool ñano, akatutumuu li ulobool búl̥ubut, fúlum tómuu jakum ubaj wahoowah li anawu ummu.

¹¹ Uhaas oon an loon muñowu, láfuffu’ li bútinabu bacolaabu, ban uhoofoolawu woola úhihhiis kaanaku okila humumool ábetoolo ló.

Kasaab kúbanum

¹² Nan emmuu íboñuli Alitemaas mantee foof Ticik, li ukaan wahoowah min ubil újowubenulom li ésukayi yata Níkofoliis, mata bo lifañe min ikaan taŋayi yata kutontaku.

¹³ Ukaan manooman min ulamben Senaas ammuu akooŋena buko li Afolos li kañaahoolaku kooliil, ban li ujuke to jakum bil kúbajaati wah wan jokiil li wo.

¹⁴ Bukanabuku koololaal koote kuhanken min kuliiken kakaan wah wajake, boot bil kalambenoo li wah wan jokolaal li wo ŋáa’, jakum bil kubaj buloŋ babajut jáliŋ.

¹⁵ Bukanabuku feh kammee lí ínje, kusaafuli. Usaaf kufaalolaal káyinenumuu li Yéesu loon alolaal. Kájiyaku kata Ateemit kujow kulako li bukuluul foofuul feh.