Máciya 8 - Jola-Kasa

Yéesu li afaken an ata háhaayee

¹ Nan Yéesu áwalowulumuu li huyuuyahu, búsuk báamak li bunab li akila.

² Muñeˈe ánayine an háhaayee ejoke li abil boot tan Yéesu alakomuu, áŋejul li ákuntuŋ hákilool min aanool: — Anahaan, ufañumuu, luyilo ufakenom.

³ Yéesu li atooken kaŋenool agolool, aban li aanool: — Lifañe. Ufak. Anáyinaawu ata háhaayeeyayi li ayaan afak.

⁴ Fúlum tó, Yéesu li aanool: — Ukáanum, jakum ulob mo an. Bale ujow boot bata álambaawu min ánandi. Banumuu li usen busuuhenabu bata kágiilenaku ban Móyiis alobumuu kasen, min úhiis ésukayi kaanaku lufaafak.

Yéesu li afaken aloka ata anahaan ata kusollaali

⁵ Nan Yéesu anokenumuu li ésukayi yata Káfeenawum, anahaan ata kusollaali kata Lom li abil atookool min ayaakoolool aanool:

⁶ — Anahaan alokaawu úmbaam ummu búmba mahintowe. Labobobobo, ban ummu li sílaam sáamak.

⁷ Yéesu li aanool: — Fan ibil min ifakenool.

⁸ Anahaanawu ata kusollaaliyaku kata Lom li aanool: — Injé itookut min únokenul búmbaam. Ulob hulim hano bale, alokaawu úmbaam fan afak.

⁹ Injé humumom libaje kunahaanom, ban libaje kusollaali kan ihine éemi anahaaniil. Eenumuu umme: «Ujow!», li ajow. Li een umma: «Ubil», li abil. Eenumuu foof alokaawu úmbaam: «Ukaan wahawu unwe,» li akaan wo.

¹⁰ Nan Yéesu ajamumuu kulimaku unku, li asego ŋáa’. Li aan kanabumuu li akila: — Li mal̥egenamu, boot min ilobuul, ijukolut híndo Isilayeel an abaje káyinen lí ínje loon ánayinaawu ummu.

¹¹ Mó mújimuu, fan ilobuul kaanaku, bukan kameeŋe fan kubilumul Akiw li Jalaŋ, min kubah li buyinjaay bano li Abulaham, Isaak li Sakob li Jáyiiyaju jata Ateemit.

¹² Bale kaateenumuu kunoken li Jáyiiyaju jata Ateemit, fan kubeteni tíyaŋ li élimayi, ban jíl̥okaju jommuu, li sílaam sáamak.

¹³ Fúlum tó, Yéesu li alob anahaanawu ata kusollaaliyaku kata Lom aanool: — Ujow úbalo! Jow kaan loon lúyinenumuu. No foof alokaawu ayaane afakumuu.

Yéesu li afaken bukan kameeŋe kásomute

¹⁴ Muñeˈe Yéesu li ajow bata Fiyeel áliiŋ, li atook al̥olool aale mahintowe. Bújuusa babetelool.

¹⁵ Yéesu li ago’ kaŋenaku kata anaalaawu, bújuusaabu li búfu’ li akila. Li ayito min atoofotoo Yéesu.

¹⁶ Li líiŋ kátiimaku, li kúŋalulool bukan kameeŋe kan uyinum wajakut újufowe. Yéesu li alob hulim hano, uyinumawu wajakutumuu li úfu’ li buko, ban li afaken foof bukanabuku feh kásomuteenumuu.

¹⁷ Muñowu Yéesu ájimuu kulimaku unke kan afulofetawu alobumuu, li kubaj: «Laŋaŋŋa’ búgootowabu boololaal; ban li afaken úsomutawu woololaal».

Buu lommuu unab li Yéesu eeno

¹⁸ Nan Yéesu ajukumuu búsukabu li búguutool, li alob kúgoomaku min kulimb li akila ló boot kageb kaaka húwajahu.

¹⁹ Muñeˈe aliikena bukan eluwaayi yata Móyiis li álohul Yéesu min aanool: — Anahaan, fan inab li awu tanootan tan ujowe.

²⁰ Yéesu li aanool: — Kugeewuwaku kubaje uwokaay. Basuuwabu bata haatiya bubaje useeh. Bale Añool-An abajut tan aate ahinto min ayool̥o.

²¹ Akee li kúgoomaku li aan Yéesu: — Amaaŋen, ukatom min ijand ijow ihok atuubawom.

²² Bale Yéesu li aanool: — Unábul lí ínje, min ukat bukanabuku kaketumuu min buko humumiil kuhok bukaniil kaketumuu.

Yéesu li akaan búlus min buyeelen

²³ Muñeˈe Yéesu li ájufo li busaana li Kúgoomaku koola ló.

²⁴ Nan kújufomuu li busaanaabu, búlus báamak li buyaan bútekul li húwajahu, min kulambajaku kunaak kubil kulo li busaanaabu. Yéesu akila li kámooli.

²⁵ Kúgoomaku koola li kujow kúliwool, ban li koonool: — Amaaŋen, ukaan min ufakaal! Ummu li újimaal.

²⁶ Bale Yéesu li aaniil: — Mó káyinenuul lí ínje kukite kutiti! Wáa újiye li jíkoli? Muñeˈe nan Yéesu ayitomuu, li anuuloo búlusabu li malamu mata húwajahu. Li lulenoo lul.

²⁷ Bukanabuku kalako tomuu li kusego ŋáa’, min kunaak koon: — Kama laalu an buu, an emmuu maayeet búlusabu li bútuulool, malamu mata húwajahu li mútuulool?

Yéesu li afaken kánayine kúl̥uba kan uyinum wajakut újufowe

²⁸ Muñeˈe Yéesu li ajow boot kageb kaaka kata húwajahu, li etaamayi yata kata Gadala. Nan áliiŋumuu, kánayine kúl̥uba kan uyinum wajakut újufowe, ban li kúfulumul li kuyaak kawoki li hugisa, li kubil kufam li akila. Kánayinaabuku umbuku kúl̥uba li kúkoyileni bil gay, an ayilaat ájowum li bútinabu umbu.

²⁹ Nan kánayinaabuku kúl̥uba kufamumuu li Yéesu, li kukaaw butiya koon: — Añiil ata Ateemit, waa lufañe li óloli? Waa, lubiibil boot jálaatenoli tówum hunakahu hata batiibabu húliiŋ?

³⁰ Muñeˈe li baj bumat báamak bata sifulugun balakowe kahoof, tin hine lóyiyiil.

³¹ Uyinumawu wajakutumuu li uyaakoo Yéesu woonool: — Oótimuu úfulenoli, kama li úkaanoli jijow jíjufo bumatabu bata sifulugunasu.

³² Yéesu li aan uyinumawu wajakutumuu: — Jijow! Mal̥egen uyinumawu wajakutaawu li úfu’ ujow újufo sifulugunasu. Bumatabu foof bo feh li búwubbenoolumul haatiya hulijahu buliiŋowul bujow bulo li húwajahu, min sifulugunasu síjim dó li malamu.

³³ Bukanabuku kalakomuu humatahu hata sifulugunasu li kutey boot li ésukayi, kujow kukitten wahawu wabajumuu feh, háŋum buu Yéesu afakenumuu eeno bukanabuku kan uyinumawu wajakutumuu újufomuu.

³⁴ Muñeˈe bukanabuku feh kata ésukayi, li kúfulul kubil kufam li Yéesu. Nan kujukoolumuu, li kuyaakoolool koonool áfu’ li etaamayi yooliil.