Tito 1 - Kaxinawá Bíblia (BR)

Paulõ Titokiri xinãnikiaki, na hãtxarã

¹ Titoõ, ẽ mia kene bumai uĩrawe. Ea ẽ Paulorã, Deusũ hawẽ tsuma ea wakĩ Jesus Cristõ kuxipaya ea waniki. Habiatũri ea yunukĩ tsuabura hakiri txanima hãtxa nũ hatu ikũwãmashanai habu Deusũ katuni habũ hau tapĩkĩ hau unãti wakubaĩwashanũbũ haska besti txibãtikiri ẽ mia yuiaii.

² Deus txani txakaismatũ mai damiwariama hawẽ hãtxawẽ hiweakiri yubakani hatũ hiwea ikibi ika tsumatũ hawa betsa wama ishanai nũ manaii.

³ Natiã hanu ma menekĩ hanu ati wani anu hawẽ bakekiri kakape nũ unãshanũbũ nukũ Epa Deus mekenãtũ nuku unãmani haska wanishũ eki txiti ikaya hawẽ yunuawẽ hawẽ hãtxa ẽ hatu tapĩmakubainaii.

⁴ Titoõ, txanima ebetã ikũwaĩ mĩ ẽ bake kayabi keskaki. Nukũ Shanẽ Ibu Jesus Cristo hawẽ Epa Deusbe miwẽ nuikĩ mia unãnuma hiwemakĩ hau mia duawakubainũbũwẽ.

Haska wakĩ mekenikabu katutikiri Tito yusĩnikiaki, na hãtxarã

⁵ Natukã Creta anua nũ dayai taeima anushũ hatu merabewakĩ pewakĩ mae tibi anushũ ikũwaĩbu mekenikabu wakĩ mĩ hatu katunũ haska xinãkĩ mia yunutã ẽ mia henebiranimaki.

⁶ Mekenika katukinã, eska hiweabu hatu unãkĩ uĩtã akubaĩwẽ. Tsuã hatukiri txakabu yuisma inũ, aĩyãkatsi ikĩ aĩbu bitã heneisma betsawẽ kemuisma inũ, hawẽ bakebu habetã Jesus Cristo ikũwaĩbu hawẽ bakebu hawa metimakĩ hatu uĩmai hatuki ha imaisbuma ha hawẽ bakebu huĩti kuxi sinatapaisbumakẽ mĩ hatu katushũtiruki.

⁷ Ha daya pepa ikatsi ikĩ hatu bebushunũbũ mĩ hatu katutirurã, bebukĩ Deusũ enabu hatu mekemakatsi ikĩ haska tibi Deusũ abuai akatsi ikaibu hatu katukĩ yunukinã, hatũ hiwea hawa txakabu hayama pe besti ikubainaibu hatu akubaĩwẽ. Hatũ xinã betsa maewatirubuma akama inũ, sina besu akama inũ, paẽkatsis imisbu inũ, hãtxawẽ hatu bekũyã amisbu inũ, hatu beparãtã hatũ pei inũ hatũ mabu ibubis binumatã pei itxawamis haskabu uĩtã katutimaki.

⁸ Eskabu mĩ hatu atiruki. Nĩkawe, bai mapuabu inũ ikũwaĩbu beaibu hatu itã duawamisbu inũ, hawara pepa besti ikaibu abumisbu inũ, hawara ariama pe xinãmisbu inũ, hawara hãtxatã kanekatsi isbuma inũ, duapai Deuski datemisbu inũ, hatũ hiwea pe mekekubaĩmisburã.

⁹ Haskamisbuwẽ taeshũ ikũwaĩ betsaburi merabewakĩ hatu benimawakĩ yusĩa pepawẽ hatu ikũwãmakĩ habũ hamakiri xinã txakaibu hatu merabewatirubuki. Hatu haska wakĩ Jesus Cristokiri txanima hãtxa nũ hatu yusĩmis ikũwãkĩ betsa tibi xinãma nukũ yusĩa hau txibãriakubainũbũwẽ.

Yusĩnanaĩ beparamemisbukiri Tito xinãmanikiaki, na hãtxarã

¹⁰ Creta anuabu huĩti kuxi hãtxa nĩkaisbuma mirimabuki. Habũ judeubũ beya txibaĩ yusĩnã pepanikapaikĩ hatu parãkĩ hãtxa kayabiwẽ ikama hawẽ haskatima kaya hatu yusĩkĩ yurabu parãkanikiki.

¹¹ Hatu yusĩ pewabumabia hatũ mabu biã xaranũ ika peiwẽ kemukĩ hiwe anua yura betsa hawenabuya hatu xinã betsa wamakĩ hatu parãbiabu hatu nĩkakanikiki. Haskawẽ taeshũ mekenikabũ mibetã yusĩkĩ hau hatu nemakubainũbũwẽ.

¹² Hatunabu betsa unãnepatũ hatukiri kenekĩ yuikĩ: “Creta anua enaburã, habunã, hawara akamabia hamẽ kemutapai txani txakamisbu inũ, pubẽ bestibu inũ, pikebu inũ, hawa dayama txikixmisbuki”, anirã,

¹³ txanima hatukiri yuikĩ aniki. Haskawẽ taeshũ hãtxa kuxipawẽ Creta anuabu nemakĩ hatu shabakabi unãmakĩ hatu kũyã akubaĩkãwẽ. Mã hatu haska waya ana hamapai tibikiri nĩkakĩ xinãma Jesus Cristokiri ikũwãkĩ pe besti xinãtirubuki,

¹⁴ judeubũ beya miyui abubiamisbu natiã ana haska xinãma danaĩ ana yusĩa kayabiki petxitirubumakirã.

¹⁵ Eskakiri mĩ hatukiri xinãkubainũ mia yuinũ nĩkawe. Hawara uke merã xinã pepa tsuabura haya ha meranua xinã pepas kaĩmakĩ pepakiri xinãmisbuki. Hamẽ habũ Jesus Cristo ikũwãbumarã, uke merã pepa besti hayama xinã txakaburi haya uĩtxakatirubuki, hatũ huĩti meranua txakabu haya kaĩmaiburã.

¹⁶ Haskawẽ taeshũ habũ yuikĩ: “Deus ẽ ikũwaiĩ”, ibiakĩ hamapai txakabu betsa betsapa akĩ Deusũ haska abumis akama danãmisbuki. Habunã, eska tibi wakinã, hatuki sinatakĩ tsua abuama inũ, huĩti kuxi sinarãwã hawa hatũ xinã pepamawẽ taeshũ hawara pepa wakĩ Deus ashũtirubumaki.