Provérbios 22 - Kaxinawá Bíblia (BR)

¹ Ouro mane inũ prata mane mirima hayabiabũ pepai mĩ hiwekũkainai inũ dasibibũ kaka pepa mikiri yuibaunaiburã, ha mane karu sharabu mĩ hatu binuhairaki.

² Mabuyabu inũ mabuumabu ha dabe Senhor Deusũ matu dami wanirã, betsama mã habiaska dabes hawenabuki.

³ Tsuara bebũkiri shinã pewanikabũ hawara mese uĩkĩ dũkekubaĩmisbuki. Hakia tsuara bebũkiri hawa shinaĩsbumã mese uĩbiai nĩkamas nakubaini hamapai sharabu bika tenekubaĩmisbuki.

⁴ Senhor Deuski mesekĩ hawẽ hãtxa nĩkai hawa keĩsbuma pe hiweaibuwẽ taeshunã, Senhor Deusũ hatu manakukĩ mabuya wakĩ hawenabu hatu kẽwãmakĩ hatu pe hiwemakubaĩmiski.

⁵ Huni txakabubu hiwekubaini mapukinã, hawẽ hatu itxakawakĩ beparanaibu itxapa uĩkubaĩmisbuki. Hakia tsuãra ibubis hawẽ hiwea pe mekekubaĩkinã, hawara txakabu tibi dũkebaĩmisbuki.

⁶ Na habiatiã matũ bakebu tapĩmakinã, yusiã pepawẽ hatu akãwẽ. Txipu ewatã haska mĩ hatu yusini hawa hene taskama mestebuyabis hawẽ hiwekubaĩshãkanikiki.

⁷ Mabuyabu shanẽ ibukĩ habu nuitapaibu hatu yunukubaĩmisbuki. Tsuãra hatu pei biãyumisbũ habũ diriabu hatu dayamamisbuki, hawẽ tsuma keska watanã.

⁸ Tsuãra txakabuwakubaĩkĩ txakaburi tenekĩ mekubainaibũ hanushũ Senhor Deus hatuki sinatakĩ hatu yamawashanikiki, hawẽ mestẽti kushipawẽ hatu kushakinã.

⁹ Tsuãra nuitapaibu uĩkĩ hatuwẽ nuikĩ hawẽ piti hatu pashkashũkĩ hatu inãkubaĩmiswẽ taeshũ Deusũ haburi uĩkĩ hatu duawashanikiki.

¹⁰ Ẽhẽ iki yura betsabuki kashemisbu mae anua tsuãra mã hatu nitxĩshuna ha habe ha iki yupukunãmisbu maĩshãkanikiki, ana hãtxawẽ tsua detenameabumarã.

¹¹ Tsuãra hawẽ shinã txanima uĩmakĩ duapa hãtxawẽ shanẽ ibu hãtxakĩ benimawaibu shanẽ ibu pepatũ hatu betxipaihairakĩ hatu haibuwamisbuki.

¹² Senhor Deusũ unanepabu hatu mekekĩ hatu uĩkubainaya txanitxakamisbũ hatu yuikĩ: “Txanima nũ matu yuiaii”, ibiai txanitxakaibu Senhor Deusũ hatu shabakabi kayati wamakĩ hatu unãti wamamiski.

¹³ Txikishi hawaki beparametima dayakatsi ikamawẽ taeshũ hawenabu parãkĩ yuikĩ: “Bai namaki inu betsa leão manakanãmiski. Eki nukutã ea pitiruki. Ẽ hawa kamaki”, ikĩ yuimisbuki.

¹⁴ Aĩbu hininipatũ hawẽ hãtxawẽ mia kemumairã, mai kini keyatapahaira keskaki. Haskawẽ taea hanu Senhor Deusũ tsuara ma yupua tĩ imisbu anu hatũri hanu mia iyutiruki.

¹⁵ Berunãbũ shinã pepa unãmarã, unaĩsmapatũ shinã txibaĩ patapakubainaibu hanushũ hatu pewakĩ hatu kusha kusha akĩ nĩkamakĩ hatũ patapa henematirubuki.

¹⁶ Huni mabuyabiakaĩkĩ mabu inũ pei ana binũ, iwanã, nuitapaibu hatu itxakawakĩ mabuhairayabu besti hawẽ mabu hatu inãkubaĩmisburã, txipu hari nuitapashanikiki, ana mabu inũ pei hayamairã.