Números 23 - Kaxinawá Bíblia (BR)

¹ haska uĩtã Balaãonẽ Balaque yuikĩ: —Mishki txi tapu wakĩ 7 nenu ea washũwẽ. Haska washũ 7 ina awa bake inũ 7 txashuwã tesẽshũ ea pewashũriawe, nũ menukĩ keyununã— aka

² haska Balaãonẽ Balaque yunua akĩ keyushuna txi tapu bestibu tibiki ina awa bake inũ txashuwã bestitxai ha dabetũ kuakĩ menu keyukĩ

³ hanushũ Balaãonẽ Balaque ana yuikĩ: —Na habia yuinaka menuai dapishũ ea manayuwe. Senhor Deus hui eki nukushũ harakiri ea hãtxa waimẽkaĩ, ẽ uĩyui kairã. Hawara ea unãma nĩkabirã ẽ miki txaniyuaii— aka mawa tenãma hawa hayama anu Balaão ka

Israelĩ enabu Balaãonẽ hãtxa pe besti hatukiri yuinikiaki, na hãtxarã

⁴ hanu Deus haki nukutã Balaãonẽ yuikĩ: —7 mishki txi tapu ẽ mia pewashũshuki. Ha bestibu tibiki ina awa bake inũ txashuwã bestitxai ẽ mia menukĩ keyushũshuki, mia kẽwãkinã— aka

⁵ hau haska hatu yuitanũ hawẽ hãtxa Senhor Deusũ Balaão unãmatã yuikĩ: —Balaque anu txĩtũkaĩ na habias hãtxa ẽ mia yuishu ea yuishũtãwẽ— aka

⁶ haska wa nĩkatã txĩtũkirani txi tapu dapi Moabe nawabu shanẽ ibu dasibibube Balaque niaki nukutã

⁷ hau haska ishanũ Balaão hatukiri yuikĩ: “ ‘Ẽ mae mati matipa bari huaikiria Arã anushũ hau hunũwẽ’, iwanã, Balaquẽ ea hatu iwemashinaki. Moabe nawabu shanẽ ibuhairatũ ea kenashĩshũ ea yuikĩ: ‘Israelĩ enabu ea hatu yupushũwẽ. Jacó enabu ẽ hatu betxipaiama txakabuwashũkĩ ea hatu yupushũwẽ’, ea washuki.

⁸ Hakia habu Senhor Deusũ hatu yupuama tsuã hatu yuputirumaki. Habu Deusũ hatu txakabuwama tsuã hatu txakabuwatirumaki.

⁹ Na mishki mati keyatapa anushũ shabakabi ẽ hatu uĩ keyutiruki, na mati matipa anushunã. Yurabu meribi hiweabu ha yura betsabu keskamaki. Na mati matipa anushũ ẽ hatu uiaiĩ.

¹⁰ Ha Israel yurabu mai mishpu keska tsuã tanatirumẽ? Hatiburã, tsuã unãtirumẽ? Pepabu unanuma mawamisbu keska eari ẽ mawakatsis ikaii. Habu debumisbu keska eari ẽ debukatsis ikaii, hawa dateamarã”— akĩ hari Senhor Deusũ yuishu Balaão hatu yuia

¹¹ ha ikĩ Balaquẽ yuikĩ: —Mĩ hawai? Mĩ ea hatu yupushũyunũ ẽ mia kenakĩ iweshinaki. Hakia eki sinataibu mĩ hatu pepa washuki— aka

¹² Balaãonẽ kemakĩ yuikĩ: —Haska ea yuimai besti ẽ mia yuitiru Senhor Deusũ ea yunua nũ atiruki— aka

¹³ Balaquẽ Balaão bika wakĩ yuikĩ: —Ua mati betsa anu ebe kawe. Harishũ hatũ tari hiwe pũtebaunabu uĩ keyuama hatiri besti uĩkĩ dateama harishũ mĩ ea hatu yupushũtirumẽkaĩ— atã

¹⁴ Mati Pisga mamaki Zofim mae anu Balaão iyushũ 7 mishki txi tapu hatu wamatã Deus daewakatsi ikĩ txi tapu bestibu tibi anushũ ina awa bake inũ txashuwã bestitxai teseãbu Balaquẽ txiwẽ menua menui keyuaya

¹⁵ hanushũ Balaãonẽ Balaque yuikĩ: —Nenu txi tapu dapishũ ea manayuwe, Deuski nukui ẽ benãta kayuairã— abaini ka

¹⁶ Deus haki nukushũ hau yuinũ hawẽ hãtxa Senhor Deusũ Balaão unãmatã hanushũ yuikĩ: —Hanu Balaque anu txĩtũkaĩ na habias hãtxa ẽ mia yuishu ana yuiritãwẽ— aka

¹⁷ haska wa nĩkatã txĩtũkirani txi tapu dapi Moabe nawabu shanẽ ibu dasibibube Balaque niaki nukutushia Balaquẽ Balaão yukakĩ: —Hawa Senhor Deusũ mia yuishumẽ?— aka

¹⁸ ha nawabu haskashanaibu Balaãonẽ Balaque hãtxashũkĩ: “Ziporĩ bake Balaqueẽ, pes shũ ea nĩkawe.

¹⁹ Yurabu hiwebia mawamisbu keskama Deus txanitxakaismaki. Ha inũ, hawẽ shinã betsa waismaki. Hawara yuishũ amiski. Hawara yubakashũ akĩ keyumiski.

²⁰ Hakia ẽ hatukiri pe yuikubainũ ea yunushuki. Deusũ hatukiri pe yuiaya hãtxa betsawẽ ẽ nematirumaki.

²¹ Jacó enabu anua tsua parã hãtxa hayamaki. Israelĩ enabu anushũ txakabuaibu tsuã uĩsbumaki. Hatũ mekenika Senhor Deus hatube ikũkaĩmiski. Hatũ mae anushũ Senhor Deus kẽwãkĩ: ‘Nukũ Shanẽ Ibuhairaki’, akĩ ha yurabũ kẽwãmisbuki.

²² Egito anua Senhor Deusũ hatu iwenishũ cavalo bene unicórnio mashũ txaipaya kushipa mesehaira keska hatu wamiski.

²³ Israelĩ enabuũ, natiã ẽ matukiri pepa shinãkĩ yuiairã, Deusũ matuwẽ taeshũ hawẽ dami kushipa matu ashũkĩ uĩmai yura betsabu matu uĩ e ikanikiki. Jacó enabu tsuã hatu yupukãtirumaki. Israelĩ enabu tsuã hatu mukayatũ daũtirumariki.

²⁴ Inu betsa leãonẽ hawẽ piti yuinaka atxishũ debu washũ hawẽ nami pikĩ hawẽ himi akĩ keyuriama yaushi tekerẽ tekerẽ imis keska ha yurabu pubẽ meseburiki”, ikaya

²⁵ Shanẽ ibu Balaquẽ Balaão ana yuikĩ: —Mĩ ea hatu yupushunamabia ana hatukiri pe hãtxayamawe— aka

²⁶ Balaãonẽ kemakĩ yuikĩ: —Haska Senhor Deusũ ea yunua ha besti ẽ atiruki. Habiaska bebũkiri ẽ mia yuia mĩ nĩkashuki— aka

²⁷ haska Balaãonẽ yuibia shanẽ ibu Balaquẽ ana yuikĩ: —Mae betsa anu ẽ mia iyuai unuri kashũ harishũ Israelĩ enabu mĩ ea hatu yupushunai mĩ mekenika Deusũ mia nemamamẽkaĩ, miki sinatamarã— akĩ

²⁸ Balaão iyukĩ Mati Peor mapekema hanushũ hanu tsua hiweabuma dasibi uĩbaũti anu mapushũ

²⁹ Balaãonẽ ana Balaque yunukĩ: —7 mishki txi tapu ea washũwẽ. 7 ina awa bake inũ txashuwã tesẽshũ ea hatu pewamashũwẽ— aka

³⁰ haska ma yunua akĩ keyutã txi tapu bestibu tibi anushũ ina awa bake inũ txashuwã bestitxai tibi Balaquẽ txiwẽ menukĩ keyushuna