Números 22 - Kaxinawá Bíblia (BR)

Hau Balaão itanũbũ shanẽ ibu Balaquẽ hatu yununikiaki, na hãtxarã

¹ Hanua Israelĩ enabu bukubaini atimas Moabe mai pãpa anu hikishũ Hene Jordão bari huaikiria maewã Jericó besusi kesha betsauri uĩtirubu anu shabakabi hatũ tari hiwe pũtebaunaibũ

² Israelĩ enabũ Amorreu nawabu detekĩ maemakĩ yamawakĩ hatu keyuhairashinabukiri Ziporĩ bake Balaquẽ Moabe nawabu shanẽ ibuhairatũ ma hatu nĩkashina datehairaya

³ habiaskariai hawenabu Moabe nawabu Israelĩ enabu mirimahairabuki datehairariaibũ

⁴ Midiã nawabu hatu dapi hiwebaunabũ hatũ shanẽ ibubube Moabe nawabu hatu hãtxa wakĩ yuikĩ: —Ha yura mirimahairabũ nukũ mae tibi nuku mebĩ keyui bekanikiki, ina awã basi pikĩ keyumis keska wakinã— hatu akabu habiatiãri Moabe anu Ziporĩ bake Balaque shanẽ ibukĩ

^5-6 hawẽ hãtxa bushunikabu betsabu katushũ shanẽ ibuhaira Balaquẽ hatu yuikĩ: —Haska Beorĩ bake Balaão mã ea yuishũtanũ eska matu yuinũ ea nĩkakãwẽ: “Nukũ shanẽ ibuhaira Balaquẽ hãtxa mia yuinũ nuku nĩkawe. Egito anua nawa betsabu beimashũ ẽ mai hirabi atxikĩ ea bebũ hatũ tari hiwe mirima ma pũtebaũshinabuki. Mikiri ẽ nĩkamis: ‘Mĩ shũ ika kushipayakiaki. Tsuabura duawakĩ mĩ hãtxa pe yuia pemisbukiaki. Ha inũ, tsuabura shũ akĩ mĩ hatu yupuaya mia dabãmisbukiaki.’ Hawairakirã ea hatu yupukĩ shũ ashũriyuwe. Mĩ hatu haska waya hatu detekĩ ẽ mae anua ẽ hatu nitxĩshanimẽkaĩ. Ẽ mia kenai ea merabewai huwe”— hatu akĩ henewã Eufrates dapi nawabu mae betsa Petor anu Beorĩ bake Balaão anu Balaquẽ hatu yunua

⁷ Moabe nawabu shanẽ ibu beshmasbu inũ Midiã nawabu shanẽ ibu beshmasburi hawẽ hatu yupushunai hawẽ pakati peiya bui mae Petor anu hikishũ hatũ shanẽ ibuhaira Balaquẽ hãtxa dasibi Balaão yuiabu

⁸ Balaãonẽ hatu yuikĩ: —Peki. Na habia meshu merã ẽ uĩyuai habianu iyukãwẽ, Senhor Deusũ haskarara ea yunua nĩkatã ẽ matu yuishanairã— akĩ hatu yuia niti itã ha Moabe shanẽ ibu beshmasbu hawẽ hiwetã ushaibũ

⁹ meshu merã Balaãoki Deus nukutã yukakĩ: —Ha hunibu mĩ hiwe anu beaburã, tsuabumẽ?— aka

¹⁰ Balaãonẽ Deus kemakĩ yuikĩ: —Ziporĩ bake Balaque Moabe nawabu shanẽ ibũ hatu yunua ea hawẽ hãtxa yui bea ikanikiki.

¹¹ “Egito anua nawa betsabu tashnibiranimashũ mae tibi ibuwaibũ hawaira hushũ ea hatu yupushuniyuwe. Mĩ ea hatu haska washunaya hatube detenamekĩ ẽ mai pakea anua ẽ hatu nitxĩshanimẽkaĩ”, akĩ ea yuikãshuki— aka

¹² haska Balaãonẽ yuia Deusũ nĩkatã yuikĩ: —Haskamaki. Hatube kayamashãwẽ. Ha dikabi ha nawabu hatu yupuyamawe. Ha nawa betsaburã, enabuki. Eã ẽ hatu duawakubainaii— aka ishĩ

¹³ hanua penamahaira Balaão bestẽkauã butukaĩ Balaquẽ ha shanẽ ibubu yunushina hatu yuikĩ: —Ẽ matube kanũ Senhor Deusũ ea haska yunuamaki. Matũ mai pakea anu txĩtũribaĩtãkãwẽ— hatu wa

¹⁴ Moabe nawabu shanẽ ibu beshmasbu txĩtũbaini Balaque anu bushũ yuikĩ: —Balaão nukube hukatsi ikama nuku besti nitxiã nũ hushuki— akabu

¹⁵ hanushũ hawẽ shinã betsa wakatsi ikama habu dukũ hatu yunushina kushipa beshmasbuwẽ taeshũ natiã shanẽ ibu betsaburi itxapa kushipahairabu Balaquẽ ana hatu katushũ bikakĩ Balaão anu haburi yunua

¹⁶ txaihaira bukubaini Balaãoki nukushũ yuikĩ: —Nukũ shanẽ ibuhaira Ziporĩ bake Balaquẽ hãtxa mia yuinũ nuku nĩkawe. Eanu mĩ huyunũ ẽ mia ea akĩ bikahairawaii. Ana huama ikama huwe.

¹⁷ Mĩ huaya mia duawakĩ mĩ ẽ shanẽ ibu keska ẽ mia kẽhairawashanaii. Ha dikabi hawara mĩ ea yukai dasibi ẽ mia ashũshanaiwẽ taeshũ hushũ ha nawa betsabu ea hatu yupushuniyuwe— akĩ hatũ shanẽ ibuhaira Balaque yuishunabu

¹⁸ Balaãonẽ hatu kemakĩ yuikĩ: —Eskaki, ea nĩkakãwẽ. Dasibi ouro inũ prata mane pepahaira hawẽ hiwe mata haya matũ shanẽ ibu Balaquẽ ea inãbia ẽ mekenika Senhor Deusũ ea yunuama ẽ hawa washũtirumaki, ẽ Senhor Deusũ yunua binukinã.

¹⁹ Habiaskabiakẽ na meshu merã bashikua habianu ushayukãwẽ. Natiã haskara Senhor Deusũ ea yuimẽkaĩ, ẽ ana matu nĩkashũyuairã— hatu wa

²⁰ ha meshu merã Deus Balaãoki ana nukushũ yuikĩ: —Mĩwẽ taea ha hunibu bekãshurã, benitã hatube katãshãwẽ. Hakia harishũ ẽ mia yunuai besti akubaĩtãwẽ— abaini kakẽ

Senhor Deusũ nai tsuma kushipaki Balaão nukunikiaki, na hãtxarã

^21-22 penamahaira bututã hawẽ jumenta kabekãtã haki tsaukaĩti nesha akeaketã haki katsaumekaĩkĩ hawẽ dayaru tsuma daberi hatu iyui Moabe nawabu shanẽ ibubube Balaão kaiwẽ taea Senhor Deus haki sinatakĩ hawẽ nai tsuma kushipa yunua bai namaki nishũ kebẽkĩ harakiri katimawakẽ

²³ jumento kakĩ betxitã nai tsumã hawẽ matxatu kenu dabeya txaipa sanã mesea nikẽ jumenta bestitũ uĩ haki datei hamauri teshki baimauri hikikainaya ha nai tsuma uiãma hau baiwẽ ana txĩtũkainũ hiwẽ Balaãonẽ hawẽ jumento tekush tekush aka

²⁴ hanua Senhor Deusũ nai tsuma bebukaĩ hanu uva bimi bai dabe mishki kenekauana yusiuri inũ yusmauri ha namakis bai hashu anu kebeã ana nikẽ

²⁵ hawẽ jumenta bestitũ ana uĩ daĩbaini mishki keneki teshke ikaĩkĩ Balaãonẽ tae teshke abaĩkĩ isĩwã haki sinatakĩ ana hawẽ jumenta tekush tekush aka

²⁶ hakia ana bebukaĩ Senhor Deusũ nai tsuma kushipa kai yusiuri inũ yusmauri hani daĩbaĩtima bai hashuhaira anu ana harakiri katima wakĩ kebeã nikẽ

²⁷ ana uĩ datei hawẽ jumenta di ikĩ Balaão tĩ aka benitã haki sinatakĩ hawẽ jumenta hiwẽ makush makush akaya

²⁸ Senhor Deusũ hawẽ jumento hunĩ hãtxawẽ hãtxamaya jumentã Balaão yuikĩ: —Ẽ mia haska wa mĩ ea ma dabe inũ bestiki kusha kusha aki ikai?— aka

²⁹ Balaãonẽ kemakĩ yuikĩ: —Mĩ ea itxakawakĩ iyu pewama ẽ mia aki ikaii. Ẽ mekẽ anu nupe tsumashunã, ẽ ma mia tenãshu ikeanaii, ikisrã— aka

³⁰ hakia hawẽ jumenta ana hãtxakĩ yuikĩ: —Earã, ẽ mĩ jumentaki. Mĩ berunã eki katsaumetiani ẽ mia nimakubaĩmiski. Haska ẽ mia washurã, uatiã mia nimashũ ẽ mia haska waisma mĩ unãhairaii— aka Balaãonẽ kemakĩ yuikĩ: —Txanimaki. Mĩ ea haska waismaki— akaya

³¹ hanushũ Senhor Deusũ Balaão beru betsa watã uĩmaya hawẽ matxatu kenu dabeya txaipa sanã bai namaki Senhor Deusũ nai tsuma kushipa nia Balaãonẽri uĩ datehairai dãti iki maĩ beti ikẽ

³² hawẽ nai tsumã yuikĩ: —Haskakĩ dabe inũ bestiki mĩ jumenta mĩ kusha kusha ashumẽ? Ha mĩ nawabube kaya haska betxipaiama mia nemanũ ishũ ẽ mia ashuki.

³³ Mĩ jumentã ea uĩ dabe inũ bestiki ea daĩ teshkikũkirãshuki. Hakia eki kemaya ẽ mia besti detekeãshuki, hau mĩ jumenta besti hiwenunã— aka

³⁴ Balaãonẽ kemakĩ yuikĩ: —Ea nemanũ ika bai mĩ kebeã nibiakẽ hawa unãma ẽ kanehairashuki. Ha nawabube ẽ kaya mĩ haska betxipaiamakenã, haskakenã, ma ẽ hiwe anu ẽ txĩtũrikainaii— aka

³⁵ hakia Senhor Deusũ nai tsuma kushipatũ ana kemakĩ yuikĩ: —Ha nawabube hatube kayutãwẽ. Harishunã, haska ẽ mia yuiai besti yuikubaĩshãwẽ— abaini kakẽ Balaquẽ hatu yunushina shanẽ ibu beshmas sharabube Balaão hatube huaya

Balaão huai shanẽ ibu Balaquẽ itanikiaki, na hãtxarã

³⁶ hawẽ mai pakea anu Balaão hui kemai Balaquẽ nĩkatã haki nukutanũ ika hui pashku hawẽ kena Arnom anu hawẽ mai pakea kesua txaima Moabe nawabũ mae betsa anu Balaãoki nukutã

³⁷ Balaquẽ yuikĩ: —Hau mia itanũbũ ẽ hatu yunuhairashinaki. Haskai uatiã ẽ mia kenakĩ bikawabia mĩ huama ishiãmẽ? Ẽ mia duahairawatiruma mĩ shinaĩ ishiãraka. Ẽ mia atiruki. Dateyamawe— aka

³⁸ Balaãonẽ kemakĩ yuikĩ: —Mia uinũ ika ẽ hushurã, ma ẽ nenuki. Eska besti ẽ mia yuitiruki. Ẽ shinanẽ eiskauã emebi ẽ kushipawẽ ẽ yuismaki. Hakia haska Deusũ besti ea yunua ẽ atiruki— aka

³⁹ hanushũ Balaquẽ Balaão iyui mae betsa hawẽ kena Quiriate-Huzote anu hikiabu

⁴⁰ hanushũ ina awa inũ txashuwã hau tesenũbũ hawẽ dayaru Balaquẽ yunua deteshunabu Balaão inũ hawenabu shanẽ ibubu beshmasbu habe beabu hatu pimabu

⁴¹ penamahaira Balaquẽ Balaão benabauni haki nukutã mati pishta hawẽ kena Baal mapekemabaĩ iyushũ uĩmakĩ Israelĩ enabũ hatũ tari hiwe pũtebaunimabu shabakabi dasibi uĩmakĩ keyua