Mateus 4 - Kaxinawá Bíblia (BR)Diabo Satanásã parãpaia Jesusũ nĩkama inikiaki, na hãtxarã ( Mc 1.12-13 ; Lc 4.1-13 ) 1 Habiatiãri hau diabo Satanásã unãti wanũ, iwanã, hanu tsua hiweabumanu Deusũ Yushĩ Pepatũ Jesus nimakĩ iyua 2 haria 40 shaba inũ 40 mexu Jesusũ hawa piama bunihairaya 3 diabo Satanás haki nukutã unãti wanũ ishũ yuikĩ: —Haska mĩ Deusũ bakemẽkaĩ? Mĩ buniairã, na mixki mania damiwakĩ misi watã piwe— aka 4 Jesusũ kemakĩ: —Haska Deusũ hãtxa keneniburã, nĩkawe. “Piti besti pirã, yurabu pei hiwetirubumaki. Hakia Deusũ hãtxa yuini nĩkatã txibaĩ yurabu pei hiwetirubuki”, aniwẽ taeshũ ha haska mĩ ea yunuairã, ẽ akamaki— aka 5 hanushũ Jerusalém anuri iyushũ Templo hiwe keyatapa mamaki mapematã habe nishũ 6 Satanásã ana yuikĩ: —Haska Deusũ hãtxa keneniburã, miãri nĩkawe: ‘Hau mia mekenũbũ hawẽ nai tsumabu Deusũ yunushanikiki. Mixkiki mĩ hutekepanã mĩ kawanai mia mekesushãkanikiki’, aniwẽ taea haska mĩ Deusũ bake kayamẽkaĩ mia uĩnũ nenua ea uĩmai maĩ ixtxuwe— aka 7 ana Satanás nemakĩ Jesusũ yuikĩ: —Haska kenenibu mĩ dama ea yuiai ikũbiakẽ ana betsa ẽtseri mia yuinũ nĩkawe: “Matũ mekenika yushĩ Deus unãti wayamakãwẽ”, iwanã, kenekĩ yusĩrianiwẽ taeshũ mĩ ea ana yunuairã, ẽ ikamaki, ixtxuirã— aka 8 hawẽ henekĩ mati keyatapahaira anuri Jesus iyushũ mai hirabi anu mae ewapa hawẽrua tibi inũ hawẽ shanẽ ibubu diabo Satanásã hawaira uĩmakĩ hawẽ damiwati kuxipawẽ uĩmakĩ keyutã 9 Jesus yuikĩ: —Eki mesei dãti ishũ kẽwãkĩ mĩ ea shanẽ ibu waya na dasibi ẽ mia uĩmashurã, ẽ mia hatu shanẽ ibu wamakubaĩshanaii— akaya 10 ana nemakĩ Jesusũ yuikĩ: —Haska Deusũ hãtxa kenenibu ana nĩkawe: “Matũ mekenika yushĩ Deus besti duawakĩ kẽwãkubaĩshãkãwẽ, yushĩ betsaki meseamarã”, aniwẽ taeshũ ha mĩ haska yuiairã, ẽ mia akamaki. Satanásaã, kariwe— aka 11 hanushũ Satanásã heneyubainaya Deusũ nai tsumabu beshũ Jesus merabewakĩ duawanibukiaki. Galiléia anushũ Jesusũ hatu yusĩ taewanikiaki, na hãtxarã ( Mc 1.14-15 ; Lc 4.14-15 ) 12 Hanua shanẽ ibu Herodesĩ Naximanika João hatu bitximaxina banabimabu Jesusũ nĩkatã Galiléia mai pakea anu txĩtũkaini 13 Nazaré anu kai baxikuama hanua mai pakea dabe anu Jacõ bake Zebulom inũ Naftali hatũ bababu shukuabu namakis iã kesha mae betsa Cafarnaum anu ka hanus hiwekirãkirãpauniki. 14-16 Hanushũ hawẽ hãtxa yuishunika Isaías Deusũ yuikĩ: “Zebulom mae pakeanu inũ Naftali mae pakeanu iãnẽwã kesha anu Jordão hene kesha betsauri Galiléia anu hanu nawabu nukunabuma hiwebaunabu anushũ bĩ ewapa txashahaira keska ea hawa unãbumã uĩshãkanikiki. Ha inũ, mexu merã punu nuka mawa keska hiweabu hatu merabewai bĩ dekua txashahaira keska ishanikiki”, aka nĩkatã keneniki. Haska yuini keskai Jesus mae Cafarnaum anu hiwekirãkirãpauniki. 17 Hanushũ Jesusũ yusĩkĩ taewakĩ hatu yuikĩ: —Nukũ Shanẽ Ibu nai anua matuki bayui ma kemaikiki. Mã Deuskiri txakabumis henetã xinã betsa watã hanũ bekãwẽ— hatu wakubainiki. Baka neshenikabu dabe inũ dabe Jesusũ hatu katunikiaki, na hãtxarã ( Mc 1.16-20 ; Lc 5.1-11 ) 18 Hanua Galiléia iãnẽwã kesha Jesusũ ketãkubaĩkĩ baka neshenika dabe Simão, hawẽ kena betsa Pedro, inũ hawẽ betsa Andrẽ hatũ shashũshũ hisĩ pũteaibu hatu betxitã 19 kenatã hatu yuikĩ: —Ea txibãkubaĩkãwẽ. Ana baka nesheama hakia mã baka neshemis keska wakĩ yurabu ẽ matu itxawamashanaii, hau ea ikũwãshanũbunã— hatu wa 20 hanushũ hatũ shashu inũ hatũ hisĩ hatũ haibu betsa yunu keyutã hawaira henebaini Jesusbe buaibũ 21 hanua hatube ana ketãbaini kakĩ Tiago inũ hawẽ betsa João hatũ epa Zebedeubetã shashu namaki tsaushũ hatũ hisĩ keshekĩ hunuaibu betxitã Tiago inũ Joãoki nukushũ hatu yuiriakĩ: “Ea txibãkubaĩkãwẽ”, hatu wa 22 hawaira hatũ shashu hatũ epaki henebaĩkĩ Simão inũ Andrébetã Jesus txibãbainibukiaki. Yura itxapabu Jesusũ hatu yusĩnikiaki, na hãtxarã ( Lc 6.17-19 ) 23 Hanua Galiléia anushũ yusĩkubaũkĩ mae tibi hatũ itxati hiwe anushũ kakape Deus shanẽ ibui ma kemaikiri hatu yusĩkĩ isĩ betsa betsapa teneaibu hatu shushawakĩ kayawakubainaya 24 hanua Síria mai pakea hirabi anushũ Jesusũ hatu shushawai kakaibu nĩkatã isĩ betsa betsapa teneaibu inũ, yushĩ txakabuyabu inũ, yura txakabu saki saki ikaibu inũ, yura babubu nuitapaibu hatu iwebirãbiranaibu Jesusũ hatu shushawakĩ kayawapakeaya 25 Galiléia anuabu inũ, Decápolis anuabu inũ, Jerusalém anuabu inũ, Judéia anuabu inũ, Jordão hene kesha betsauri leste bari huaikiria bei hatuki dasitã yurã kaiã itxapabũ Jesus txibãkĩ uĩkubainibukiaki. |
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
Wycliffe Bible Translators, Inc.