Mateus 21 - Kaxinawá Bíblia (BR)

Jerusalém mae ewapa anu Jesus hikinikiaki, na hãtxarã

¹ Hanua Jesus Jerusalém anu kai Betfagé anu kemai Oliveiras Mati tetãbaini Jesus niti itã hawẽ tsuma dabe

² hatu yunukĩ: —Ha mae besuuri kayãbis bushũ burro yushã tsua haki katsaumeriama hawẽ bakebe neshea betxitã tepetã ha dabe beyutãkãwẽ.

³ Ha inũ, tsuãra matu yukakĩ: “Hawakatsi mã tepebainai?” matu wa yuikĩ: “Nukũ Shanẽ Ibũ nuku yunua nũ bishũyuaii, samama habianuri nuku bemaikikirã”, hatu watãkãwẽ— hatu wa buaibũ

^4-5 hanushũ bebũkiri hawẽ hãtxa yuishunika Zacarias Deusũ yuikĩ: “Jerusalém anu hiweabu yuikĩ: ‘Uĩkãwẽ. Matũ Shanẽ Ibu pepa keĩsma burro bake kamaki tsauwa hikishanikiki’, hatu yuiwe”, aka nĩkatã Zacariasĩ yuitã keneniki. Haska yuini menei inũ ika hawẽ tsuma dabe Jesusũ yunua

⁶ ha dabe kashũ haska Jesusũ hatu yuia habiaskari wakĩ

⁷ burro bakeya beshuãbu nukũ bemakia tari pekatã nũ kabekãshuna Jesus haki inatã katsaumekainaya

⁸ hanua yura itxapabia hatiribũ hatũ bemakia tari bai namaki nabekãbainũbũ betsabũri shẽpã meshteshũ habiaskari wabainaibũ

⁹ habu bebuaibu inũ hatxũ beaibũ benimatxakayamabaĩkĩ hui kuxipawẽ hawẽtxaĩs yuibaĩkĩ: —Aitxu! Aitxu! Deusũ kuxipaya huairã, benimawakĩ duawanãkãwẽ. Yavé Deus dasibi binuatũ kuxipaya nuku mekei huikiki, nukũ shenipabu Davi ipauni keska hawẽ baba shanẽ ibuhairairã. Kẽwanãkãwẽ— akubaini bui

¹⁰ hanu Jerusalém anu Jesus hikiaya haskakubainaibu nĩkatã uĩnũ ika bei: —Narã, tsuamẽ?— ibirã ibiranaibũ

¹¹ Jesusbe bukĩ hatu yuikĩ: —Deusũ hãtxa yuishunika Jesuski. Galiléia mai pakeanua hawẽ mae Nazaréki— hatu akubainaibũ,

Templo hemaĩtĩ Jesusũ pewakĩ shũpi wanikiaki, na hãtxarã

¹² hanua Templo hemaĩtĩ kenekawananu Jesus hikikaĩkĩ hawẽ Deus daewati inabu kuamisbu txashuwã inũ, ina awa inũ, deiwã inãnãnaĩbu inũ biaibu hatu nitxĩkĩ pei hanua biananãmisbũ tapu narabekĩ deiwã inãmisbũ haki aduti hiwe naraberiakĩ

¹³ hatu ha akĩ yuikĩ: —Hawẽ Templokiri hawẽ hãtxa yuishunika Isaías Deusũ kenemani matu yuinũ nĩkakãwẽ. “Ẽ hiwerã, hanua ebe hãtxakĩ ea kẽwãshãkanikiki”, ibianikẽ na hiwe hemaĩtĩ shabaturu anua mã yumetsubũ hiwe wamisbuki— hatu wakĩ hatu nitxĩkĩ tashnimakĩ keyuaya

¹⁴ hanua ha Templo hemaĩtĩ anu bekũbu inũ kistseresnibu Jesus anu iweabu hatu kaya waya

¹⁵ Deusbe nukunabu hãtxashunika shanẽ ibubu inũ Deusũ hãtxa kenenibu yusĩnanãmisbũ haska hawẽ unãmati damiwai uĩkĩ inũ habianushũri bake mixtĩbũ kẽwãkĩ: “Davĩ baba pepahairaki”, iki xã xãki ikaibũ nĩkariai haki sinatakĩ

¹⁶ Jesus yukakĩ: —Mia haska waiburã, mĩ nĩkai?— akabu Jesusũ hatu yuikĩ: —Haa. Habia ẽ nĩkaii. Deusũ hãtxa yuishunikabũ haska ekiri keneniburã, mã uĩriamamẽ? Salmoskiri matu yuinũ nĩkakãwẽ: ‘Mĩ pepahairawẽ taeshũ bake mixtĩbu inũ txutxu akaibũ mia kẽwãshãkanikiki’, aka matu keneshuniki— hatu watã

¹⁷ hanushũ hatu henebaini Jerusalém anua kaĩkaini Betânia anu ushatanũ ika nũ kaniki.

Jesusũ hi bimiuma betxitã yupunikiaki, na hãtxarã

¹⁸ Ushaxini bestẽkaini Betânia anua ana Jerusalémkiri Jesus kai bunikaĩkĩ

¹⁹ hi betsa figueira benãta tupã bai kesha nia betxitã hawẽ bimi hayamẽkaĩ uĩtanũ ika kashũ hawa bimi hayama hawẽ peis besti uĩkĩ Jesusũ hi bimiuma yupukĩ yuikĩ: —Hau tsuã mĩ bimi ana piyamashanũbũ ana bimitaskayamashãwẽ— akaya haskabiama e iskaũ hawẽ pei niri iki shanaya

²⁰ nũ hawẽ tsumabũ uĩ: “Habaa”! iwanã, Jesus yukakĩ: —Haskai ha hi hawaira shanaimẽkaĩ?— nũ wa

²¹ Jesusũ nuku yuikĩ: —Ikũkĩ ẽ matu yuiaii. Mã haratutũra ea ikũwaĩ xinã dabeyama na hi ẽ ashu keska wakĩ na mati yuikĩ: “Matipaã, mimebi tsekekaĩ iãnẽwã merã pukutãwẽ”, mã waya Deusũ haska yunushanikiki.

²² Ha inũ, Deusũ kuxipa unaĩ xinã dabeyama habe hãtxakĩ yukakubaĩkãwẽ. Mã haska wai matu merabewashanikiki— nuku abaini

Jesus haskai kuxipaikiri yukanibukiaki, na hãtxarã

²³ hanua Templo hemaĩtĩ anu hikishũ Jesusũ yura itxapabu kakape yuikĩ hatu yusĩayã Deusbe nukunabu hãtxashunika shanẽ ibubu inũ shanẽ ibu betsabũ Jesus nemanũ ika beshũ yukakĩ: —Na mĩ eska wairã, tsuã hawẽ kuxipa mia yunuimawẽ mĩ aki ikai? Tsuã hawẽ kuxipa mia inaĩmamẽ, mĩ haska wanunã?— akabu

²⁴ Jesusũ hatu kemakĩ: —Ẽtseri ẽ matu yukai matũ dukũ ea yui taewakãwẽ, mã ea yuiaya hawara mã ea yukai ẽ matu yuiriai nĩkakãshunã— itã

²⁵ —Naximanika João hau hatu naximanũ yunukinã, tsuã kaya yunuyama mã xinaĩ, Deusũraka, hunibũraka? Ea dukũ yuikãwẽ— hatu wa hanua haburi hune yuinamekĩ: —“Deusũ yunuyamaki”, nũ warã, “Haskakĩ Joãonẽ hãtxa mã ikũwãma ikimamẽ?” iwanã, nuku kũyã atiruki.

²⁶ Hamẽ Deusũ João yunuyama yura mirimabũ ikũwaĩbuwẽ taea habuki datekĩ yuikĩ: “Hunibũ yunuyamaki”, nũ wapanã nũ haska yuitirumaki— iwanã,

²⁷ habũ Jesus yuikĩ: —Nũ unãmaki— akabu Jesusũ hatu yuiriakĩ: —Haskakenã tsuãra hawẽ kuxipawẽ ea yunuimarã, eãri ẽ matu yuiamaki— iwanã,

Huni betsa huni bake dabeyakiri miyuiwẽ Jesusũ hatu yusĩnikiaki, na hãtxarã

²⁸ habias shanẽ ibubu dake wanũ, iwanã, Jesusũ miyuiwẽ ana hatu yuikĩ: —Huni betsa huni bake dabeyakiri yusĩtã matu yukanũ nĩkakãwẽ— ishũ, hatu yuikĩ: —Hawẽ bake betsa yunukĩ: “Epaã, ikis ẽ bai anu dayakĩ ẽ uva bimi ea tsekashũtãwẽ”, aka

²⁹ hawẽ bakẽ yuikĩ: “Ẽ dayakatsi ikamaki”, ibia hanua xinã betsatã bai anu ka dayahairaimaki.

³⁰ Hanushũ hawẽ bake betsa hawẽ epã betxitã hari yunukĩ yuikĩ: “Miãri ẽ bai anu dayakĩ ẽ bimi ea tsekashũtãwẽ”, aka hawẽ bakẽ yuikĩ: “Peki. Ia, ẽ kaii”, ibia kama ikimaki.

^31-32 Haskakenã, matu yukapa? Haratutũ hawẽ epã yunua nĩkatã ashuĩmamẽ?— hatu wa —Ha ha dukũ yunuimatũ nĩkakĩ ashũtanimaki— akabu Jesusũ hatu yuikĩ: —Eskatiã ikũ ẽ matu yuiaii. Naximanika João tashnimashũ haskai hiwei peti matu yusĩbia hawa matũ xinã betsa watã mã ikũwãma ikimabuki. Hakia ha governo pei bishunika txakabubu inũ aĩbu hininipabũ Joãonẽ hãtxa nĩkakĩ ikũwaĩbu uĩbiakĩ matũ mã xinã betsa wama ikubaĩxinabuki. Habiaskariai natiã nawa pei bishunikabu inũ aĩbu hininipabu Deusũ hãtxa ẽ yusĩaĩ habũ nĩkaibu Deusũ hawenabu hatu waikiki, matu binukinã— iwanã,

Dayakapabu mekenika besumakiri Jesusũ hatu yusĩnikiaki, na hãtxarã

³³ ana hatu yuikĩ: —Miyui betsawẽ matu ana yusĩnũ nĩkakãwẽ. Shanẽ ibu betsã bai washũ uva bimi batapa banatã mixkiwẽ dakẽbaũkĩ keyutã hanua haki uva tsiniti watã hanushũ dasibi uĩbaũti hiwe pixta keyatapa watã hanushũ hau bimi dabukũ ea inãshanũbũ, iwanã, huni betsa dayakapabube habube yubakatã ibu keska wakĩ inãyubaini txai kaimakẽ

³⁴ hanu ma kani tsekatitiã ikaya bai ibuã hawena dabukũ hau yukatã bishũtanũ, iwanã, hawẽ tsuma betsabu yunua buabu

³⁵ habũ hawena inãkatsi ikama uva bimi mekeabũ hawẽ tsumabu betsa atxishũ kuxa kuxa atã betsa debu watã betsa mixkiwẽ tsaka tsaka atã hawa inãma nitxiãbu

³⁶ hanushũ bai ibuã ana hawẽ tsuma betsabu yunuria buabũ habũ uva mekeshunabũ hawẽ tsuma tibi buabu habiaskas hatu wabu mais bebirã bebiranaibũ

³⁷ hanushũ tsua ana yunutima hawẽ bake abuhairabiakĩ atimas yunukĩ xinãkĩ: “Ẽ bake ẽ yunua ka haki mesekĩ ẽ bimi ea inãtirubuki”, iwanã, yunua ka

³⁸ hawẽ bake hatuki kemai kai betxitã yuinamei: “Bai ibu mawaxĩkẽ na hawẽ bakẽ hawẽ bai tibi inũ hawẽ hiwe tibi dasibi hawenawayuikiki. Na bai nukunas nũ wanũ tenãnãkãwẽ”, ishũ

³⁹ huai atxishũ bai kene anua kaĩmashũ tenãxinabuki— iwanã,

⁴⁰ Jesusũ hatu yukakĩ: —Hawenabu haskawãxinabunã, ha bai ibu hushũ haskara hatu washanimẽkaĩ?— hatu wa

⁴¹ habũri Jesus yuikĩ: —Bai ibu hushũ ha dayakapa txakabubu hawa hatuwẽ nuiama hawenabubetã hatu tenãtã hanushũ dayakapa betsabu yunukĩ hau habũ ẽ bimi dabukũ ea inãshanũbũ, iwanã, yunutiruki— akabu

⁴² Jesusũ ana hatu yuikĩ: —Deusũ hãtxa kenenibu yuikĩ mã uĩsmamẽ? Matu ana yusĩnũ nĩkakãwẽ: ‘Hiwe wanikabũ mixki danãbiaibũ habias mixki Deusũ bishũ deshũ makeresh wakĩ hawẽ kene mestẽwã keska wakĩ nuku uĩmakĩ: Habaa! imakĩ nuku harakiri xinãtima washanikiki’, ashũ keneniki.

⁴³ Haska keneni keska wakĩ matũ shenipabu Deusũ katubianishũ mã hawenabubiatũ xinãma mã danãnãyã hanushũ yura betsabũri nĩkakatsi ikaibu Deusũ katutã hatu habe shanẽ ibumashanikiki.

⁴⁴ Ha inũ, betsarã, tsuara ha mixkiki sinatakĩ ea maemanũ ika mixki mamaki kawana teke teke ika keska itiruki. Hakia ha mixki haratukira kawani haki tĩ ikĩ txuxakĩ mixpu washanikiki— hatu waya

⁴⁵ Deusbe nukunabu hãtxashunika shanẽ ibubu inũ fariseubũ na miyuiwẽ habukiri yusĩaĩ nĩkatã

⁴⁶ Jesus atxikatsis ibiai yurã kaiãnẽ: “Jesus Deusũ hãtxa yuishunikaki”, ikaibuki datekĩ hawa atxiyuabumakẽ