Mateus 20 - Kaxinawá Bíblia (BR)

Dayakapabu tibikiri miyuiwẽ Jesusũ hatu yusĩnikiaki, na hãtxarã

¹ ana nuku yuikĩ: —Deus shanẽ ibui haskamiskiri ana matu yusĩnũ nĩkakãwẽ. Deus shanẽ ibuirã, bai ibuã dayakapabu katutã hatu yunupakemis keskaki. Penai taeaya hawẽ bai anu hau uva tsekashũtanũbũ dayakapabu katushũ

² yuikĩ: “Mã ea dayashuni ka bari kai hikiaya shaba hirabi daya pei ẽ matu inaiĩ”, iwanã, dayakapabu hawẽ bai anu hatu yunua buabũ

³ hanua ma 9:00 horaya hawẽ mae namakis hemaĩtĩ anu huni betsabũ hawawama uĩkĩ

⁴ hatu yunukĩ: “Matũri ẽ bai anu ẽ bimi ea tsekashũtãkãwẽ, bari kai hikiaya ẽ matu paka pewairã”, hatu wa buabũ

⁵ hanua bai ibu ana bari mananãbi tashnikaũ huni betsabu hatu yunua buabũ ana bari nai putxinĩ dakakẽ huni betsaburi hatu yunua buabũ

⁶ hanua ma bari hiki kemaya ana hawẽ mae namakis hemaĩtĩ anu kashũ huni betsabũ hawawama uĩkĩ hatu yukakĩ: “Hawai bari txaitanai mã dayama ibaiai?” hatu wa

⁷ habũri yuikĩ: “Tsuã nuku hawa yunuama nũ ikaii”, akabu bai ibuã hatu yunukĩ: “Maturi ẽ bai anu kashũ ẽ bimi ea tsekashũtãkãwẽ, ma bari hikiaya ẽ matu paka pewairã”, hatu wa buabũ

⁸ hanua ma mexu beaya bai ibũ hatũ hawẽ daya tsumashũna yunukĩ: “Ea dayashũtãkãshu hatu kenashũ habianus kesua pei ea hatu meniakeakeshũtãwẽ. Ha dama bukãshu ha dukũ hatu paka taewabaĩkĩ ha habu dukũ buabu hawẽ henekĩ hatu pakakĩ keyutãwẽ”, aka kashũ

⁹ ha dama bukãshu habu dukũ kenashũ shaba hirabi daya pei hatu inãkĩ keyutã

¹⁰ hanua ha bari nai putxinĩ dakakẽ dayai buabu hatu kenashũ habianus kesua pei hatu pakatã hanua ha bari mananãbi dayai buabu hatu kenashũ habianus kesua pei hatu pakatã hanua ha 9:00 hora dayai buabu hatu kenashũ habianus kesua pei hatu pakatã hanua habu dukũ buabu bekĩ xinaĩ: “Ha hatu pakai binumakĩ nuku inaĩmẽkaĩtsa”, ibiaibũ habianus kesua pei binuama habias hatu inãriaya

¹¹ habũ pei bitã bai ibuki sinatakĩ ha akĩ

¹² yuikĩ: “Barĩ nuku kua niskaĩ shaba hirabi nuku besti dayai nũ nuitapabaishukẽ haskakĩ ha dama bubiakãshu daya eskarabesbiakãshukẽ nuku itsawakĩ shaba hirabi daya pei mĩ hatu pakashumẽ?” akabu

¹³ bai ibuã hatu bestitxai yuikĩ: “Hatishũ kesua ma bebũkiri ẽ mia yuba ẽ mia pakashuki, mia parãmarã.

^14-15 Ana eki sinatama ẽ mia pakashuya kariwe. Hakia na dama bukãshu matu itsai shaba hirabi daya pei ẽ hatu inãshurã, hawa txakabumaki. Ha pei mã hawẽ nuiairã, matunamaki. Enaki. Hameẽ ẽ hatu duawaya mĩ daka ẽ peiwẽ nui ikai?” aniki.

¹⁶ Haskawẽ taeshũ yurabu babuaibũ xinã pepakĩ ea danãma ẽ hãtxa txibãkĩ taewaibu pepawẽ ẽ hatu mekeshanaii. Hakia bari itxapa ẽ hãtxa txibaĩ ikũwãmisbu ha katxukea habu keskari ẽ hatu mekekubaĩshanaii— nuku waniki.

Mawashanaikiri dabe inũ bestiki Jesusũ hatu yuinikiaki, na hãtxarã

¹⁷ Hanua Jerusalém baikiri nũ kaya yurã kaiã nukuberi buaibũ hanushũ Jesusũ nũ hawẽ 12 tsumabu besti kenashũ tari pashkabaĩ nuku yuikĩ:

¹⁸ —Jerusalém anu na habiatiã nũ kairã, mã unaiĩ. Hanushũ ẽ matũ Hutxi Kayabi Iuwa Deusbe nukunabu hãtxashunika shanẽ ibubu inũ Deusũ hãtxa kenenibu yusĩnanãmisbu tsuãra ea hatu atxima

¹⁹ habũ ea tenãkatsis ikĩ nawa betsabu ea hatu yunuabu habũ ea kashe wakĩ ea kuxa kuxa akĩ cruzki mastashũ ea tenãshãkanikiki. Ea tenãbu hanua mawa shaba dabe inũ besti kaya ẽ ana bestẽshanaii— nuku wakẽ

Tiago inũ Joãonẽ ewã Jesus hatu yukashunikiaki, na hãtxarã

²⁰ txipu Zebedeũ bake Tiago inũ João hatũ ewabe kai Jesus besti niaki nukutã hatu hãtxa washunũ ika ha bebũ dãti ituxiaya

²¹ Jesusũ yukakĩ: —Mia hawa merabewapa?— aka hatũ ewã hatu yuishũkĩ: —Mĩ nukũ shanẽ ibuaitianã, na ẽ bake dabe hau mibe shanẽ ibushanũ mĩ inaitiã betsa mĩ yusiuri inũ betsa mĩ yusmauri ea hatu katubaĩ tsaumashũshãwẽ— akaya

²² hawẽ bake dabe uĩkĩ Jesusũ hatu yuikĩ: —Mã haska ea yukairã, mã unãriamaki. Hawara ẽ teneshanairã, mã iriatirumẽ?— hatu wa —Nũ iriatiruki— akabu

²³ Jesusũ ana hatu yuikĩ: —Txanima ea itxakawaibu ẽ isĩ teneshanai keska mã iriashanaii. Hakia ẽ yusiuri inũ ẽ yusmauri tsaũtã tsua ebe shanẽ ibushanairã, ibubis ẽ yunutirumaki. Ẽ Epa Deusũ hatu katunirã, haburã, ebe ishãkanikiki, shanẽ ibuirã— hatu waya

²⁴ hanua Tiago inũ João haska yuka ikaibu nũ hawẽ dez tsuma betsabũ nĩkai nũ hatuki sinataya

²⁵ hanushũ nũ hawẽ tsumabu betsabu ana nuku shuku watã yuikĩ: —Haska nawa shanẽ ibubũ hawenabu ha akĩ hatu mese wabetanã kuxipawẽ hatu yunumisbu mã unaiĩ.

²⁶ Hakia matubunã, haska xinãyamakubaĩkãwẽ. Matu anua tsuara shanẽ ibukatsis ikinã, hau dasibi matu merabewakĩ duawakubainũbũwẽ.

²⁷ Habiaskariai tsuara shanẽ ibukatsis ikirã, dasibibũ tsuma hau iriakubainũbũwẽ.

²⁸ Hamẽ ea iki huirã, ẽ matũ Hutxi Kayabi Iuwabiarã, hau ea duawanũbũ ika ẽ huamaki. Hakia matu debushũkĩ yura itxapabu benuabu meshpamatã matu hiwemanũ ika ẽ huniki— nuku waniki.

Huni bekũ dabe Jesusũ bepeshkĩ kayawanikiaki, na hãtxarã

²⁹ Hanua Jericó mae ewapa anu nũ hawẽ tsumabube Jesus hikia ibai nũ habe kaĩkainaya yurã kainẽ nuku txibaĩbũ

³⁰ hanu bai kaya kesha huni bekũ dabe tsauwabu Jesus huai huni betsa txaniaibu nĩkatã hanushũ habũ unãshubima yuikĩ: —Davĩ baba Shanẽ Ibuũ, nukuwẽ nuiwe— akubainaibũ

³¹ itxapabũ nemapaibiabu ana unãshubimahaira yuikĩ: —Davĩ baba Shanẽ Ibuũ, mĩ miamẽkaĩ, nukuwẽ nuiwe— akabu

³² hanua Jesus niti itã huni bekũ dabe kena beaibu hatu yukakĩ: —Hawa matu merabewapa?— hatu wa

³³ ha dabetũ yuikĩ: —Shanẽ Ibuũ, ana nũ uĩnũ nuku bepeshwe ika nũ ikaii— akabu

³⁴ Jesus hatuwẽ nuikĩ hatũ beru mekĩ hatu bepesha hawaira uĩkĩ pewatã Jesus txibãbaini nukube bunibuki.