Mateus 10 - Kaxinawá Bíblia (BR)

Jesusũ hawẽ 12 tsumabu itxawashũ hatu kuxipa wanikiaki, na hãtxarã

¹ Hanushũ nũ hawẽ 12 tsumabu Jesusũ nuku itxawashũ hawẽ yushĩ txakabu kaĩmati kuxipa inũ hawẽ isĩ betsa betsapa teneaibu shushawati kuxipa nuku yununiki.

² Nũ hawẽ 12 kuxipayabũ nukũ kenarã: Simão hawẽ kena betsa Pedro inũ, hawẽ betsa André inũ, Zebedeũ bake dabe Tiago inũ, hawẽ betsa João inũ,

³ Filipe inũ, Bartolomeu inũ, Tomé inũ, nawã pei bishunika Mateu ea inũ, Alfeũ bake Tiago inũ, Tadeu inũ,

⁴ Simão betsã nawabu abuisma inũ, Judas Iscariotes hatũ Jesus hatu txipu atximashanai nũ hati inibuki, Jesusũ tsuma kuxipayaburã.

Kakape hau hatu yusĩtanũbũ dabe tibi hawẽ tsuma kuxipayabu Jesusũ nitxĩnikiaki, na hãtxarã

⁵ Nuku haska watã hanushũ nũ hawẽ 12 tsuma kuxipayabu Jesusũ nitxĩkĩ nuku yuikĩ: —Nawabũ mae anu buama inũ Samaria mai pakea hanu hiweabu anuri buyuama

⁶ hakia Israelbu txashuwã benua keskabu anu besti bushũ

⁷ hatu yuikĩ: “Deusũ Katua shanẽ ibui ma kemaikiki”, akĩ hatu yusĩkubaũtãkãwẽ.

⁸ Haska wakĩ isĩ teneaibu shushawakĩ mawabu bestẽwãkĩ yuraki txaminibu kayawakĩ yushĩ txakabu hayabu kaĩmakĩ akubaũtãkãwẽ. Na kuxipa hawa pakama mã bishuwẽ taea habiaskari wakĩ habias kuxipawẽ hatu merabewakĩ hawẽ hatũ hamapai hatu yukayamakubaũtãkãwẽ.

⁹ Kairã, mã eskabaĩtanũbũ matu yuinũ nĩkakãwẽ. Mais butãkãwẽ, hawa buamarã. Ouro pei heshe inũ, prata pei heshe inũ, cobre pei heshe buama,

¹⁰ kapãkã buama tima tari betsa buama, matũ bitxi tae betsa buama, hawẽ mestẽti betsa buyamatãkãwẽ. Hakia mã haskakainaya dayakapabu pimamisbu keska wakĩ matu pimariashãkanikiki.

¹¹ Hanua mae betsa anu hikitã huni duapa yuka ikaĩ haki nukutã hawẽ hiwe anu matu iyua hanu kashũ hawẽ mae anua kariama ha huni duapatũ hiwe anu hiweyushũ hawẽ mae anushũ yusĩyushãkãwẽ.

¹² Hanua hiwetã hikikaĩkĩ eska yuishãkãwẽ: “Unanuma hiwekãwẽ, Deusũ hãtxa nũ matu beshuainã”, hatu washãkãwẽ.

¹³ Hanushũ matu beyawaibunã, matũ hãtxa pepa hatu yusĩshãkãwẽ. Hanushũ matu beyawakĩ Deusũ hãtxa nĩkaibu hau Deusũ hatu unãnuma hiwemakĩ duawakubaĩshanũ yunushãkãwẽ. Hakia hanushũ matu beyawabumakenã, matũ hãtxa pepa hatu anu hamẽ benuyamashãkãwẽ.

¹⁴ Ha inũ, hanishũra matu danãkĩ nĩkakatsi ikabumakẽ hatu unãti wakĩ hanua kaĩbaĩkĩ matũ tae anua mai kuru hatuki tabaĩshãkãwẽ, hau habiaskasi hiwenũbunã, hawa unãmarã.

¹⁵ Ikũ ẽ matu yuiaii. Hanu Deusũ yurabu dasibi hatu kupiaitiã haska Sodoma inũ Gomorra ha mae ewapa dabe txiwẽ Deusũ hatu kupikĩ haska wani binumakĩ habũ matu danãnibu Deusũ hatu kupihairashanikiki— iwanã,

Hawẽ tsuma kuxipayabu hatu itxakawashanaibukiri Jesusũ hatu yusĩnikiaki, na hãtxarã

¹⁶ ana nuku yuikĩ: —Eskawẽ taeshũ ẽ matu yuiai nĩkairakãwẽ. Kamã inu pubẽbu anu mã ẽ 12 tsumabu txashuwã pepa nitxiã keska wakĩ ẽ matu yunuaii, mã ẽ tsumabu ewẽ taea matuki sinataibu anurã. Haskawẽ taea dunu tsuã parãtiruma unãnepai inũ deiwã pepa keskakĩ tsua sinatamayamashãkãwẽ.

¹⁷ Mã ẽ kakapekiri hatu yusĩawẽ taeshũ ikũwãbumã matu kupinũ, iwanã, hatũ mae shanẽ ibu anu matu iyushãkanikiki. Ha inũ, hatũ itxati hiwe anushũ ekiri mã hatu yusĩaĩbu betsabũ matu kuxa kuxa ashãkanikiki. Uĩrashãkãwẽ.

¹⁸ Hakia ẽ kakape ikũwãkĩ mã ea txibaĩbuwẽ taeshũ tsuabũra matu atxishũ shanẽ ibu kuxipabu anu matu iyuabu ẽ yusĩakiri shanẽ ibu betsa betsapaki inũ judeubuma nawa betsabuki ekiri mã txaniriashanaii.

¹⁹ Hakia atxishũ shanẽ ibu kuxipabu anu matu iyuabu hawara mã yuitirukiri Deusũ Yushĩ Pepatũ matu unãmashanikiki. Haskakẽ hawa dateama harakiri yuishãpa? ikĩ bebũkiri xinãyamakubaĩshãkãwẽ,

²⁰ matũmebi mã hãtxamakẽ matũ Epa Deusũ Yushĩ Pepatũ merabewakĩ matu hãtxamashanikikirã.

²¹ Ha inũ, yura betsã hanubi hawẽ betsabũ ea ikũwaĩbu hatu atximakeakeriashãkanikiki, hau hatu tenãnũbunã. Habiaskari wakĩ hatũ ibubũ hanubi hawẽ bakebu hatu atximariashãkanikiki. Ha inũ, habiaskari wakĩ bakebu hatũ ibubuki sinatakĩ hatũ ibubũ ea ikũwaĩbu hatu atximashũ hatu tenãmariashãkanikiki.

²² Ekiri haska yuibaũkĩ mã ea txibaĩbuwẽ taeshũ yurabũ matu danaĩ mirima matuki sinatashãkanikiki. Tsuabura matu keskakĩ ea txibaĩ heneisbumari ẽ hatu mekeriakubaĩshanaii.

²³ Hakia mae betsa anushũ matu itxakawaibũ hanua kaĩbaini mae betsa anuri kashũ hatu yusĩkubaũshãkãwẽ. Israelbũ mae tibi anu nati ikĩ mã hatu yusĩ keyuriamakẽ ikũ matũ Hutxi Kayabi Iuwa ẽ shanẽ ibui taeshanaii.

²⁴ Ha inũ, hatũ tsumabũ hawẽ yusĩnã binũtirubumaki. Ha inũ, hawẽ dayarũ hawẽ shanẽ ibu binũtirumariki.

²⁵ Haskawẽ taea hawẽ tsumaburã, hatũ yusĩnã hãtxa txibaĩ hau habiaskari keska ikubainũbũwẽ. Habiaskariai dayarubu hatũ shanẽ ibũ yunua nĩkai hau hatũ shanẽ ibu keska iriakubainũbũwẽ. Haskakẽ ẽ matũ yusĩnã ea kenakĩ: “Yushĩ txakabu shanẽ ibu Belzebuki”, ea wamisbuwẽ taeshũ ẽ yusĩa mã txibãkubaĩmisbuwẽ taeshũ maturi kenakĩ: “Belzebũ enabuki”, akĩ matukiri yuikĩ txiteriashãkanikiki— iwanã,

Tsuki datetimakiri Jesusũ hatu yusĩnikiaki, na hãtxarã

²⁶ ana nuku yuikĩ: —Habũ matu itxakawaiburã, hawara habu beparametã hune akubaĩmisburã, Deusũ dasibi shabakabi hatu uĩmashanaiwẽ taea hatuki dateyamashãkãwẽ.

²⁷ Hakia hawara ẽ matu besti yuiai huneama shabakãshũ hatu yuibaũshãkãwẽ. Ha inũ, dĩtu merã hikitã hawẽ beputi bepua keska watã hamapai hune ẽ matu yuimis hemaĩtĩ anushũ hãtxa kuxipawẽ shabakabi hatu yuishãkãwẽ.

²⁸ Ha inũ, tsuabũra matũ yura besti tenãtirubuwẽ dateyamashãkãwẽ, tenãshũ matu ana itxakawapaketirubumakirã. Haki besti mesei mã datekubainũbũ matu yuinũ nĩkakãwẽ. Tsuãra matũ yushĩ tenãtã txi nukaismanu hawẽ kuxipawẽ matu yunutiru bestiki mesei datekubaĩkãwẽ, Deuskirã. Ikũkĩ ẽ matu yuiai ha bestiki datei mesekubaĩshãkãwẽ.

²⁹ Haska inũ, isa mixtĩ dabe pei heshe bestitxaiwẽ bitirubuki, hatiramarã. Haska wabiamisbũ isa tibi tanai Deus hakimaismaki.

^30-31 Hamẽ matũ bu dasibi mirimabiakẽ Deusũ ma tana keyumistũ isa mixtĩ itxapa abubiakĩ Deusũ isa mixtĩ binumakĩ matu abuhairamiski. Haskakẽ hawaki dateyamakubaĩshãkãwẽ— iwanã,

Habũ Jesus ikũ kayabi wai haki dakeisbuma unãti washanaibukiri hatu yusĩnikiaki, na hãtxarã

³² ana nuku yuikĩ: —Tsuabũra ea ikũwaĩ dakeama ea datã akĩ yurabu hatu yuikĩ: “Ẽ Jesusunaki”, iki eki hãtxakubaĩmisbu ẽ Epa Deus nai anuabe hãtxakĩ: “Harã, enabuki”, akĩ ẽ hatu yuishũshanaii.

³³ Hakia tsuabũra ea txibãma ẽ hãtxaki dakei: “Ẽ Jesus ikũwãmaki”, iki eki hãtxakubaĩmisburã, eari ẽ Epa nai anuabe hãtxai: “Narã, enabumaki”, akĩ ẽ hatu hãtxashunamari ishanaii— iwanã,

Hawenabũ ikũwaĩbu inũ ikũwãbuma bika tenemashanaikiri Jesusũ hatu yusĩnikiaki, na hãtxarã

³⁴ ana nuku yusĩkĩ: —Mai anushũ yurabu unãnuma hiwemanũ ika ẽ huni dabanẽ mã xinaĩmẽkaĩ? Haskamaki. Hatu pashkatã hatu bika tenemanũ ika ẽ huniki.

³⁵ Ẽ hatu haska waya huni bake hawẽ epabe sinatarabeshãkanikiki. Ha inũ, aĩbu bake hawẽ ewabe sinataraberiashãkanikiki. Ha inũ, hawẽ babawã hawẽ yayabe habiaskariashãkanikiki.

³⁶ Ewẽ taea hawenabube danãnanaĩ sinatanameshãkanikiki.

^37-38 Hawẽ ibubu inũ hawẽ bakebu abuhairakĩ ea abu beshmas wamisrã, enabumaki. Ha inũ, tsuabũra ea txibãkatsi iki bika tenei eki hawa dakeama: “Ẽ habe mawakatsi ikaii”, ikĩ yuiabumarã, habu enabumariki.

³⁹ Hamẽ tsuabũra hatũmebi mekei: “Ẽ mawakatsi ikamaki”, ikĩ xinãmisburã, eauma mawashãkanikiki. Hakia ea ikũwãkĩ ẽ kakape yuikĩ ea txibaĩwẽ taeshũ tenãbu ebe hiwekuĩshãkanikiki— iwanã,

Manakuti pepa ha dukũtũ bitikiri Jesusũ hatu yusĩnikiaki, na hãtxarã

⁴⁰ ana nuku yuikĩ: —Haska inũ, ẽ matu nitxiã mã kakẽ tsuãra matũ hãtxa nĩkakĩ matu beya wakĩ eari beya wakĩ haibu washãkanikiki. Tsuabũra ea haibu wakĩ hatũ ea yununiri haibu wariashãkanikiki, hawẽ hãtxa nĩkakinã.

⁴¹ Deusũ hãtxa yuishunikatũ yuiai hawẽ hãtxa nĩkakĩ beya wanishũ habũ Deusũ hãtxa akaibũ manakuti pepa bishãkanikiki. Deusũ hãtxa ikũwãkĩ huni pepa beya wanishũ huni pepã manakuti pepari bishãkanikiki.

⁴² Ha inũ, eki txiti iki beshmasbiabũ hatu ũpash matsipa yukabu ea txibãmisbuwẽ taeshũ hatuwẽ nuikĩ ũpash hatu amakubaĩmisbu ikũ hawẽ kupiti pepa bishãkanikiki— nuku aniki.