Lucas 19 - Kaxinawá Bíblia (BR)

Jesus Zaqueuki nukunikiaki, na hãtxarã

¹ hanua Jericó baiwẽ Jesus hikikaini mae kapukekainaya

² habianuri huni betsa mabuhairayatũ Roma pei bishunikabu hatũ shanẽ ibu hawẽ kena Zaqueũ

³ Jesus uĩkatsis ibiaya huni itxapabube Jesus kaya Zaqueu huni txãpaixtatũ haska washũ uĩtima

⁴ Jesus uĩnũ ika bebui kuxikaĩ hiwẽ ina tsaukẽ

⁵ Jesus hukĩ manaũri uĩkĩ Zaqueu betxitã yuikĩ: —Zaqueuũ, mĩ hiwe anu ẽ ushai kakatsis ikaii. Menã buturiwe— aka

⁶ hanua hawaira butukirã benimakĩ hawẽ hiwe anu Jesus inũ hawẽ tsumabu itã iyuaya

⁷ haska wabainai dasibibũ uĩtã Jesus yuãkĩ: “Huni txakabu anu ushai kashuki”, ikaibũ

⁸ hanushũ Jesusũ hãtxa nĩkakĩ hawẽ xinã betsa watã Zaqueu benitã Jesus yuikĩ: —Shanẽ Ibuũ, ẽ hatu haska washanai nĩkawe. Ẽ mabu inũ ẽ pei tanatã dabukũ ha nuitapaibu ẽ hatu inãbaũtiru ẽ xinaiĩ. Ha inũ, tsuabura hatu parãshũ hatũ hamapai ẽ biãmis dabe inũ dabeki ẽ ana hawẽri ẽ hatu inãshanaii— akaya

^9-10 Jesusũ yuikĩ: —Earã, matũ Hutxi Kayabi Iuwatũ huni txakabu benua keska benabaũkĩ merabewanũ ika ẽ huniki. Na habiatiã na hiwe anu matũ mekenã ma matu anu hikishuki. Haskawẽ taea mĩ xinã betsa waya Deusũ minabube mia mekekubaĩshanikiki. Haska Abraãonẽ ikũwãpauni keskakĩ ikũwaĩ mĩ ma Abraãonẽ baba kayabiki— akaya

Pei heshekiri miyuiwẽ Jesusũ hatu yusĩnikiaki, na hãtxarã

¹¹ yura itxapabũ Jesusũ yusĩaĩ nĩkakubaĩkĩ xinãkĩ: “Jerusalém anu kematã nawabu nitxĩtã Deus samama shanẽ ibuhairai kaimẽkaĩ”, iwanã, yuiaibuwẽ taeshũ

¹² habũ xinã Jesusũ unãtã hatu pewanũ, ishũ miyuiwẽ hatu yusĩkĩ: —Shanẽ ibu beshmasbiakẽ hau mae itxapa shanẽ ibuhairashanũ, iwanã, shanẽ ibu kuxipa binuatũ kena ka ha shanẽ ibu beshmas katanima matu yuinũ nĩkakãwẽ.

¹³ Txai mae betsa anu kariama hawẽ dez dayashunikabu kenashũ pei heshe itxapahaira ha tibi hatu inãkeaketã hatu yunubaĩkĩ: “Ẽ huriama na ẽ peiwenã, hamapai tibi bitã hawẽ inãnanãkĩ ana binumashãkãwẽ”, hatu watã txai kaimakẽ

¹⁴ hanushũ hawẽ mae pakea anushũ hawenabũ ha shanẽ ibu beshmas danãkĩ abuabumawẽ taeshũ hawenabu betsabu yunukĩ yuikĩ: “Shanẽ ibuhaira binuatũ hiwe anu kashũ ha huni hau nukũ shanẽ ibu iyamashanũ yuitãkãwẽ”, hatu wa buimashũ haki nukutã yuiabu

¹⁵ habũ danãkĩ haska hakiri yuibiaibũ ha shanẽ ibuhaira binuatũ ha huni hawenabũ abuabumabiakẽ hau habũ shanẽ ibu inũ hatu katushũxĩkẽ txĩtũkirã hikishũ ha hawẽ dez dayanikabu kenashũ ha pei hatu inãbainimakiri hatu yukakĩ: “Hati mã ana ea itxawashũxinamẽ?”, iwanã, bestibu tibi hatubetã pewanũ, iwanã, hatu kena

¹⁶ ha dukũ hushũ yuikĩ: “Shanẽ ibuũ, mĩ pei heshe itxapa inãnanãkĩ ana mirimahaira deztiki binumakĩ ẽ mia itxawashũxinaki”, aka

¹⁷ hawẽ shanẽ ibũ yuikĩ: “Pehairaki. Mĩ ẽ dayanika pepaki. Eskarabes mĩ pe mekexinawẽ taea mia manakukĩ dez mae hati mekei ea shanẽ ibushũyuwe”, akaya

¹⁸ ha katxu hawẽ dayashunika betsa hushũ yuikĩ: “Shanẽ ibuũ, mĩ pei heshe itxapa inãnanãkĩ ana cincotiki binumakĩ itxapa ẽ mia itxawashũxinaki”, akaya

¹⁹ hari yuikĩ: “Haskakenã, miãri cinco mae hati mekei ea shanẽ ibushũyuwe”, ariaya

²⁰ hanua hawẽ dayanika betsari eskarabes pixta inãbainima hushũ yuikĩ: “Shanẽ ibuũ, naki, mĩ peirã. Benukatsi ikama dakutã ẽ mia arushunimaki.

²¹ Mĩ huni mesekẽ miwẽ datekĩ mĩ pei benukatsi ikama tari tuashwẽ yabutã ẽ mia arushunimaki. Dayakĩ hawa mibã banamabia mĩ itxawamiski. Hanua heshe sa akamabia mĩ itxawariamiski”, akaya

²² hanushũ shanẽ ibũ yuikĩ: “Mĩ ẽ dayaru txakabu txikix txakamaki. Txanima dayakĩ hawa mibã banaumabia ẽ itxawamiski. Ha inũ, heshe sa akamabia ẽ itxawariamiski. Ha unãtã

²³ haskakĩ banco anu conta watã inãnanãkĩ ẽ pei mĩ ea arushunama ikimamẽ, hanua ibubis hushũ ẽ pei shekei ana haki itxaxina ẽ biyushanunã?” atã

²⁴ hawẽ dayaru betsabu mapuabu hatu yuikĩ: “Ha txikixĩ pei mebĩtã ha deztiki binumaxina ana itxawamakãwẽ”, iwanã,

²⁵ habũ hatũ shanẽ ibu yuikĩ: “Ma dez binuhaira hayaki. Haskakĩ mĩ ana pei inaĩ?” aka

²⁶ shanẽ ibũ hatu yuikĩ: “Tsuara na ẽ dayaru pepa keskatũ hawara haya pe mekea unãtã itxapa hayabiakẽ manakukĩ ana itxapahaira ẽ inãshanaii, binumakinã. Hakia tsuara na ẽ dayaru txikix keskatũ hawara haya pe mekeama ha eskarabes haya unãtã ẽ mebĩshanaii.

²⁷ Ha inũ, habu eki sinatakĩ hau hatũ shanẽ ibu ẽ iyamashanũ, habũ ea abuama danaĩmaburã, itãshũ ẽ besuubi hatu tenãkãwẽ”, hatu akimakiaki— Jesusũ hatu wabaini

Jerusalém anu Jesus hikinikiaki, na hãtxarã

²⁸ hanushũ hatu haska yusĩbaini kaya yura itxapabũ Jesus txibãbainaibũ Jesus Jerusalémkiri ana kai

²⁹ Betfagé inũ Betânia ha mae dabe anu kemai Oliveiras Mati tetãbaĩkĩ hawẽ tsuma dabe yunukĩ

³⁰ yuikĩ: —Ha mae besuuri kayãbis bushũ burro neshea tsua haki katsaumeriama betxitã tepetã beyutãkãwẽ.

³¹ Ha inũ, tsuãra matu yukakĩ yuikĩ: “Hawakatsi mã tepeai?” matu wa yuikĩ: “Nukũ Shanẽ Ibũ biyukatsis ikikiki”, atãkãwẽ— hatu wa

³² ha dabe bushũ burro neshea bai namaki nia betxitã tepeaibũ

³³ habianuri burro ibubu manishũ hatu yukakĩ: —Haskakĩ mã burro tepeai?— hatu wa

³⁴ habũ yuikĩ: —Nukũ Shanẽ Ibũ biyukatsis ikikiki— akabu —Peki. Bushũritãkãwẽ— hatu wa

³⁵ tepetã hanushũ hatũ bemakia tari burro kamaki kabekãbaĩ Jesus anu butã Jesus haki tsauãbu

³⁶ katsaumekainaya hatũ bemakia tari bai namaki nabekãbainaibũ

³⁷ Oliveiras Mati butebirani haki txiti ika itxapabũ Jesus txibãkĩ Jesusũ atimaska betsa betsapa wai uĩkubirãxinabuwẽ taea benimakĩ hui kuxipawẽ Deus kẽwaĩ nawakĩ

³⁸ yuibaĩkĩ: —Aitxu! Aitxu! Ha Shanẽ Ibu Deusũ kena kuxipaya huairã, benimakĩ kẽwanãkãwẽ. Naiuria unãnuma hiwea inũ kuxipa binu keyua unãkĩ hau kẽwãnũbũwẽ— ikubainaibũ

³⁹ habianuri fariseubu hatube bui sinataibũ betsã Jesus hatu yuishũkĩ: —Yusĩnaã, miki txiti ikabu haskaiburã, hatu nemawe— aka

⁴⁰ Jesusũ hatu yuikĩ: —Txanima eki txiti ikabu neseaibũ na mixkipã ea kẽwaĩ sai itirubuki— hatu wabaini

⁴¹ Jerusalémki kemakĩ uĩkubaini ha mae ewapa Jerusalém anu hiweabuwẽ nui kashakĩ

⁴² yuikĩ: —Hawẽ Deus daewati mã ea unãyã matu kupiama ikeãshãkanikiki. Hakia natiã ikũwãbumawẽ taeshũ hunea keskakẽ xinãkĩ mã ana uĩtirubumaki. Mã peirawa!

^43-44 Haskakẽ Deus matu anu bai huai mã hawa ikũwãmawẽ taea matuki sinatamisbũ matu itxakawakĩ matu nuitapawakĩ matũ mae dapi mai kene keyatapa wabaũkĩ matu kebẽ keyutã mã ana kaĩtiruma watã matuki sinataibũ matũ mae ewapa mixki kene niri akĩ keyukĩ matu inũ matũ bakebu detekĩ matũ mae yamawashãkanikiki, hawa teshe wamarã— ikũkaini Jerusalém anu hikitã

Templo hemaĩtĩ anua inãnanãmisbu Jesusũ nitxĩnikiaki, na hãtxarã

⁴⁵ hanua hanu Deus kẽwãti Templo hemaĩtĩ kenekauna anu hikikaĩkĩ hanushũ hawẽ Deus daewati ina hanubia inãnãnaĩbu hatu nitxĩkĩ

⁴⁶ yuikĩ: —Hawẽ Templokiri hawẽ hãtxa yuishunika Isaías kenemani matu yuinũ nĩkakãwẽ: “Ẽ hiwerã, hanua ebe hãtxakĩ ea kẽwãshãkanikiki”, Deus ibianikẽ na hiwe shabatururã, hanua matu parananãkĩ yumetsubũ hiwe mã wamisbuki— iaketãkĩ hatu nitxĩ keyutã

⁴⁷ hanushũ shaba tibi Templo hemaĩtĩ anushũ Jesusũ hatu yusĩkubainaya Deusbe nukunabu hãtxashunikabu shanẽ ibubu inũ, Deusũ hãtxa kenenibu yusĩnanãmisbu inũ, judeubu shanẽ ibu betsa betsapabũ Jesus haska datanai detenũ ika yuinamebiakubainaibũ

⁴⁸ yura itxapabũ Jesusũ yusĩaĩ abukĩ nĩkahairaibuwẽ taeshũ haska washũ tenãtima bika tenenibukiaki.