Lucas 15 - Kaxinawá Bíblia (BR)

Txashuwã bestitxai benua hawẽ ibuã betxitirukiri miyuiwẽ yusĩnikiaki, na hãtxarã

¹ governo pei bishunika itxapabu inũ yura betsabu kaka txakamisbu itxapabũri Jesusũ hãtxa nĩkanũ ika haki shukuabu

² uĩkĩ Moisés keneni txibãhairamis fariseubu inũ Deusũ hãtxa kenenibu yusĩnanãmisbũ Jesus yuaĩ yuinamekĩ yuikĩ: —Ha huninã, yura txakabũ Moisés keneni txibaĩsbuma beya wakĩ hatubetã pikiki— ikaibu

³ haska yuaĩbu hatũ xinã unãtã miyuiwẽ Jesusũ hatu yusĩkĩ:

⁴ —Tsuara mã 100 txashuwã hayatũ bestitxai benua ha 99 bai anu mapukẽ bestitxai benua mã benamiski. Haskamamẽ?

⁵ Atimas ha benua betxituxitã benimakĩ iabirani

⁶ mĩ hiwe anu hikitã mĩ haibuaibu inũ mia dapi hiweabu kenakĩ itxawashũ hatu yuikĩ: “Ẽ txashuwã benuarã, ma ẽ betxitanaii. Haskawẽ taea ebe benimahairakãwẽ”, akĩ mã hatu yuimiski.

⁷ Txanima habiaskari imisbu ẽ matu yuiaii. 99 yura itxapabũ ea ikũwaĩ pepakubaĩmisbuwẽ taea nai anu habu Deusbe hiweabu benimabiamisbũ hakia bestitxai benua keska txakabui hiwekũkaĩmistũ hawẽ txakabu henetã hawẽ xinã betsa wakẽ hawẽ benimatxakayamai xinã txãkãhairamisbuki— iwanã,

Pei heshe bestitxai benua hawẽ ibuã betxitikiri miyuiwẽ Jesusũ hatu yusĩnikiaki, na hãtxarã

⁸ Jesusũ ana hatu yusĩkĩ —Aĩbu dez pei heshe karuhaira haya bestitxai pakea benanũ, iwanã, bĩ dekushũ hawẽ hiwe merã unãshubira matsukĩ betxiriama matsu heneismaki.

⁹ Hanua atimas betxitã hawẽ haibuaibu inũ ha dapi hiweabu hatu kenakĩ itxawashũ yuikĩ: “Ẽ pei heshe ẽ benuxina ẽ betxishuwẽ taea ebe benimahairarikãwẽ”, akĩ mã hatu yuimiski.

¹⁰ Ikũkĩ habiaskari ẽ matu yuaii. Yura bestitxaitũ hawẽ txakabu atimas henetã hawẽ xinã betsa watã ikũwãyã Deusũ nai tsumabu benimamisbuki— iwanã,

Hawẽ bake mashku benua keska hawẽ epa anu txĩtũkiranikiri miyuiwẽ Jesusũ hatu yusĩnikiaki, na hãtxarã

¹¹ Jesusũ ana hatu yusĩkubaĩkĩ yuikĩ: —Huni betsa huni bake dabeyakiri ẽ matu yuiai nĩkakãwẽ.

¹² Hawẽ bake mashkũ yuikĩ: “Epaã, mĩ mawariamabia hatiara mĩ mawakẽ hawara enashanairã, pashkashũ menã ea inãriwe”, aka xinãtã yuikĩ: “Peki. Ẽ mia ashũtiruki”, iwanã, hawẽ hamapai dasibi hawẽ bake dabe pashkashũ hawẽ bake mashku hawena inãxina

¹³ usha eskarabes ka txipu hawẽ bake mashkũ pei binũ, iwanã, hawẽ mabu hatu inãkĩ keyubaini ha pei bixiãyã txai kai mai pakea betsa anu kashũ hawẽ pei mekeama hawara betsa betsapawẽ kemukaũkĩ hawaira puta keyutã

¹⁴ hawẽ pei yamakẽ ha mai pakeanuabu buni taeaibũ hawẽ bake mashku buniriakĩ

¹⁵ hanushũ daya benabaũkĩ nawa shanẽ ibu tsuma wanũ, iwanã, daya yuka hawẽ bai anu ina yawa mapua hau mekẽnũ yunua

¹⁶ ha ina yawa pimakĩ hawẽ piti yani wapanã tsuã hawa inãma

¹⁷ hanushũ shabakabi xinã pewakĩ yuikĩ: “Ẽ epã hiwe anushũ hawẽ dayarubũ piti piabu teshe hayabiakẽ nenua buni ẽ mawatiruki.

¹⁸ Haskakẽ nenua txĩtũkaĩ hikishũ yuikĩ: ‘Epaã, Deusũ yunua nĩkama itxai miari itxakawai ẽ txakabukaĩtanaii.

¹⁹ Kanekĩ ẽ mia shunũbainima haskawẽ taeshũ ana mĩ bakewakĩ ea kenama mĩ dayaru betsa ea wawe’, akĩ ẽ yuishanaii”, iwanã,

²⁰ nawa henebaini hawenabu anu txĩtũkaini hawẽ epã hiweki kemariamabiakẽ txaike hawẽ epã betxibaini hawẽ nui kuxikaini haki nukutã benimahairakĩ ikushũ tãtsu tãtsu akaya

²¹ hawẽ bake mashkũ yuikĩ: “Epaã, Deusũ yunua nĩkama itxai miari itxakawabaini ẽ txakabu kaĩtanaii. Kanekĩ ẽ mia shunũbainima haskawẽ taeshũ ana mĩ bakewakĩ ea kenayamawe”, abia

²² nĩkama hawẽ epã hawẽ dayarubu yunukĩ yuikĩ: “Tari pepa hawaira bitãshũ sawemakãwẽ. Ha inũ, meitxikiti sawematã bitxi tae sawemariakãwẽ”, iwanã,

^23-24 “Na ẽ bake mawaima keska ma ana besteã keskaki. Benuima nũ ma haki nukuawẽ taeshũ ina awa bake shuahaira bitãshũ teshteshũ ha naiti piti itxapari bawakãwẽ, pi nũ habe benimanũbunã”, hatu wa hawẽ hãtxa nĩkai habe benimahairai nawai taeaibũ

²⁵ haskaibũ hawẽ bake iuwa bai anu dayatani hui hawẽ hiwe dapi kemakĩ nawaibu nĩkakubirãkĩ

²⁶ hawẽ dayaru betsa kenashũ: “Haskai e iskaũ beyusi nawai ikanimẽkaĩ?” ikaya

²⁷ hawẽ dayarũ yuikĩ: “Mĩ betsa mashku txĩtũkirani hawa isĩ teneama hikishuwẽ taea benimakĩ ina awa bake shua hau bawashunũbũ mĩ epã hatu yunua detetã bawashũ pi mĩ epabe ma benimai beyusi nawakanikiki”, aka

²⁸ hanua sinatai hiwetã hikikatsi ikamakẽ hawẽ epã daewanũ ika tashnishũ hãtxa wa

²⁹ hakia hawẽ epa nemakĩ yuikĩ: “Eskai ẽ sinatai mia yuinũ nĩkawe. Bari itxapa mia dayashũkĩ mĩ hãtxa ẽ nĩkakubaĩmiski, hawa kaneamarã. Ẽ haskabiakẽ ẽ haibuaibube haya beyusi ẽ nawai benimanũ cabra bake babupa mĩ ea deteshuĩsmaki.

³⁰ Hakia ha mĩ bake mashkũ aĩbu hininipabubetã mĩ pei puta keyutani mais hubiakẽ nukũ ina awa bake shua mĩ hamẽ bawashũshuki. Haska watimaki”, aka

³¹ daewanũ, iwanã, hawẽ epã yuikĩ: “Epaã, mĩ ẽ bake iuwarã, mĩ ebe hiwekũkaĩmiski. Dasibi ẽ haya minaski.

³² Haskabiakẽ mĩ betsa mashku mawa keska ixiã ma ana hiwea keskaki. Uatiã benuxina ikis nũ ma betxiawẽ taea benimai nũ beyusi nawai pehairaii”— hatu watã