Lucas 13 - Kaxinawá Bíblia (BR)

Hawẽ xinã betsa watikiri yusĩnikiaki, na hãtxarã

¹ hanushũ habiatiãri huni betsã Jesus yuikĩ: —Uatiã mĩ mai pakea hatiuma Galiléia anuabu Templo hemaĩtĩ anushũ kẽwãkĩ hatũ txashuwã tesẽshũ kuakĩ menupanãbũ shanẽ ibu Pilatõs hawẽ soldadobu yunua matxatuwẽ hatu detekĩ hatũ himi txashuwã himi yabi husixinabukiaki. Haskakĩ Pilatõs hatu haska waxinamẽ?— akabu

² Jesusũ hatũ xinã pewakĩ hatu yuikĩ: —Mã xinãnã, ha hunibu tenãxinaburã, hatunabu Galiléia anu hiweabu habũ txakabuhaira wakĩ hawenabu binũawẽ taeshũ hatu kupixina dabanẽ mã xinaĩmẽ ikaitsa.

³ Haskamaki. Hamẽ matũri matũ xinã mã betsa wama mã habiaskariai mawashanaii, Deusũ matu kupiaitianã.

⁴ Ha inũ, ana betsa matu yukapa? Jerusalém anu mixki hiwe keyatapa hawẽ kena Siloé hanushũ uĩbaũti hiwe purekekirã 18 hunibu ha namã mapuabu tenãnirã, txakabuwakĩ huni betsabu Jerusalém anu hiweabu hatũ txakabuwẽ hatu binuawẽ taeshũ kupini mã haska xinãriamismẽkaĩ?

⁵ Haskamariki. Hamẽ matũri matũ xinã mã betsa wama mã habiaskariashanaii, niti ikama nuitapakũkainirã— iwanã,

Mibã bimiumakiri Jesusũ hatu yusĩnikiaki, na hãtxarã

⁶ hanushũ habias yusĩa Jesusũ miyuiwẽ ana hatu yusĩkĩ: —Huni betsã hawẽ bai nemaki figueira hi banayamakiri matu yuinũ nĩkakãwẽ. Bimi hayamẽkaĩ? ishũ uĩ ka hawa hayama uĩtãtãmis

⁷ hawẽ dayanikaki nukushũ yunukĩ: “Uĩa. Dabe inũ besti bari ka na figueira hi anu bimi ẽ hamẽ benabirãbirãmiski. Bimiumaskẽ ea derashũwẽ, hamẽ uĩbaĩ niakirã”, aka

⁸ hawẽ tsumapã nemakĩ yuikĩ: “Ana bari bestitxai manayuwe. Mai pukĩkĩ mixpu bitã ina awa pui husitã ẽ mia tamãtxĩshũyushanaii.

⁹ Ẽ haska wa bimiyashanimẽkaĩ. Bimiyamaskẽ ẽ mia derashũshanairã”— akĩ yuinikiaki.

Huĩrukũtitiã aĩbu kakuni Jesusũ kayawa kawenikinikiaki, na hãtxarã

¹⁰ Mae betsa anushũ huĩrukũtitiã hatũ itxati hiwe anushũ Jesusũ hatu yusĩayã

¹¹ habianuri aĩbu betsa yushĩ txakabũ itxakawakĩ kaku wani 18 bari kabia kawenikitirumahaira hatube tsauwa

^12-13 Jesusũ uĩkĩ kenashũ aĩbu yuikĩ: —Aĩbuũ, mĩ ma shushaki, mĩ isĩ tenenirã— akĩ kamepiaya hawaira kawenikitã hanushũ Deus kẽwãkĩ taewaya

¹⁴ hanua huĩrukũtitiã Jesusũ haska wai uĩkĩ xinaĩ hatũ itxati hiwe shanẽ ibu sinashũ hawenabu itxabu yuikĩ: —Semana tibi seis shaba nũ dayamiski. Hau matu shushawanũ dayatiã besti bekãwẽ, huĩrukũtitiã shushai huamarã— ikaya

¹⁵ hanushũ Jesusũ hatu txitekĩ yuikĩ: —Mĩ haska xinaĩ keska minabubetã xinaĩ mã beparamemisbuki. Huĩrukũtitiãbiakẽ matubũ matũ ina awa inũ matũ burro hawẽ nuikĩ tepebaĩ mã hatu ũpash amamiski.

¹⁶ Habiaskari wakĩ na aĩbu matu keska Abraãonẽ babari 18 bari ka Satanásã kaneshkĩ isĩ tenemani hawẽ nuikĩ huĩrukũtitiã ẽ kaya wakĩ burro tepea keska washurã, txakabumẽ?— akaya

¹⁷ habu haki sinataibu hatu txitea daketxakayamai hawa yuiama maniabũ yura itxapabũ Jesusũ betsa betsapa pepa dasibi waiwẽ taea benimai keyuaibũ

Deus shanẽ ibuirã, heshe peshemixtĩ yumei ewapamis keskakiri hatu yusĩnikiaki, na hãtxarã

¹⁸ Jesusũ hatu ana yusĩkĩ yuikĩ: —Deus shanẽ ibui haskamiskiri

¹⁹ miyuiwẽ matu yusĩnũ nĩkakãwẽ. Hunĩ hawẽ bai anu mostarda heshe pesheixtabia banaima yumei ewai ewapaxina hawẽ mebiki peiyabu haki huĩrukuĩ utamisbuki. Deus shanẽ ibuirã, haska keskaki. Ha dukũ huni betsã Deusũ hãtxa ikũwãkĩ hawenabu yusĩakeakeaya hawẽ yusĩa nĩkakĩ abukĩ txibãmisbuki, itxapabunã— iwanã,

Deus shanẽ ibuirã, misi hawẽ shasha wati keskakiri Jesusũ hatu yusĩnikiaki, na hãtxarã

²⁰ miyui betsawẽ ana hatu yuikĩ: —Deus shanẽ ibui haska keskamiskiri ana matu yusĩnũ nĩkakãwẽ.

²¹ Misi wakatsi aĩbũ shekiwã duru mirimabiakẽ kẽtxa ewapaki putxinĩ kesũshũ hawẽ shasha wati eskarabes ũpashwẽ nemuskĩ kapã dasibi buspukirãkĩ shasha wamiski. Deus shanẽ ibuirã, haska keskaki. Ha dukũ huni betsã Deusũ hãtxa ikũwaĩ pepakũkaĩkĩ hawenabu yusĩakeakeaya unãshubira mirimabũ ikũwãtirubuki— hatu wabaini

Hanu hikiti shui haxuwẽ hikitikiaki, na hãtxarã

²² Jerusalém baiwẽ kakĩ mae tibi anushũ Jesusũ hatu yusĩkubainaya

²³ huni betsã Jesus yukakĩ: —Shanẽ Ibuũ, hanu mĩ shanẽ ibuayarã, eskarabes besti mĩ hatu mekeshanai?— aka

²⁴ —Haa. Txanimaki. Ea txibãkatsis iki menã xinã mestẽwãtã hanu hikiti shui haxu anu hikikãwẽ, txipu itxapa hikikatsis ibiai hikitubuma ishãkanikiki. Haska ẽ matu yuiaii.

²⁵ Eskaki, matu yuinũ nĩkairakãwẽ. Ikis ẽ hãtxa ikũwãkĩ mã ea txibãtiruki. Hakia ẽ Epã mae hikiti shui ma ẽ bepukẽ tsuabura hikinũ, iwanã, kene petxiuri nishũ kenakĩ yuikĩ: “Shanẽ Ibuũ, nuku bepẽshũwẽ”, mã wa matu nemakĩ yuikĩ: “Mã hania ikimẽkaĩ? Ẽ matu unãmabĩ!” matu wa

²⁶ tsuãra yuikĩ: “Mibetã nũ piniki. Nukũ mae anushũ mĩ yusĩniki”, mã wa

²⁷ hanushũ matu yuikĩ: “Mã enabumaki. Mã hania ikimẽkaĩ? Ẽ ma matu yuishuki. Txakabuwakĩ matũ xinã mã betsa waismaki. Nenua burikãwẽ”, ẽ matu washanaii.

²⁸ Hanushũ matũ shenipabu Abraão inũ hawẽ bake Isaque inũ hawẽ baba Jacó inũ Deusũ hãtxa yuishunika dasibi Deusũ mae anu dasiabu uĩ txai matu urenibuwẽ taea hatu uĩ haska mã mapeketirubumawẽ taea sheta yẽsh yẽsh iki mã kashakũkaĩshanaii.

²⁹ Ha inũ, Deus shanẽ ibukĩ mai hirabi anua nortekiria inũ, sulkiria inũ, estekiria inũ, oestekiria ikũwaĩbu dasibi dasia tsaushũ pishãkanikiki.

³⁰ Haskawẽ taea na habiatiã tsuabura habu shanẽ ibuisbumarã, habu dukũ shanẽ ibu ishãkanikiki. Ha inũ, na habiatiã tsuabura shanẽ ibumisburã, mawaira ana shanẽ ibuama ishãkanikiki— hatu waya

Jesus Jerusalém anuabuwẽ taea punu nukanikiaki, na hãtxarã

³¹ habiatiãri fariseubũ Jesus datekĩ mese wanũ ika beshũ yuikĩ: —Shanẽ ibu Herodesĩ mia detekatsis ikikiaki. Nenua hanira pashariwe— akabu

³² Jesusũ hatu yuikĩ: —Uĩa. Ikis inũ mexukiri yushĩ betsa betsapa kaĩmakĩ isĩ teneaibu shushawakĩ ẽ yusĩkubainaii. Haska watã ua betsatiã ẽ daya ẽ keyushanairã, ẽ haskayukũkainaii. Kashũ ha kamã inu keska paranã yuiritãkãwẽ— iwanã,

³³ ana hatu yuikĩ: —Deusũ hãtxa yuishunikabu Jerusalém anua debumisbuwẽ taea eari habiariri ẽ kaii. Ikis inũ, mexukiri inũ, mexukiri betsatiã ẽ daya ẽ menei kaiwẽ taea matũ xinãwẽ hanu ẽ niti itirumaki— ikĩ,

³⁴ —Jerusalém anu hiweabuũ, Jerusalém anu hiweabuũ, Deusũ hãtxa yuishunikabu inũ hawẽ hãtxa hatu bana beshũpakeaibu Deusũ hatu yunubiaya danãkĩ hatu tenãkĩ matũ shenipabũ ani keska wakĩ mixkiwẽ mã hatu tsaka tsaka amisbuki. Takarã hawẽ bake nushamis keska wakĩ eãri matu merabewakĩ matu mekẽnũ ika ẽ hubianikẽ haska xinãma ea danãkĩ mã ea hawa nĩkamaki.

³⁵ Uĩkãwẽ. Matũ mae matũ mesti mã mekẽnũ Deusũ matu heneshanikiki, ana Jerusalém mekeamarã. Hakia hanu ẽ ana huaitiã: “Yavé Deusũ kuxipaya huairã”, ikĩ mã yuiriamarã, mã ana ea uĩyuama ishãkanaii— hatu wabaini