Josué 4 - Kaxinawá Bíblia (BR)

Jordão Hene netsua meranua 12 mishki mapemanibukiaki, na hãtxarã

¹ Israelĩ enabũ Hene Jordão ma puketã mapekei keyuabũ Senhor Deusũ Josué ana yuikĩ:

² “12 huni kushipabu Israelĩ enabu shukua tibi anua bestitxai tibi mĩ hatu katubirana kenashũ

³ hatu yunukĩ: ‘Ana txĩtũbaĩ hanu Deusbe hãtxanikabũ hawẽ yubakani hãtxa aruni bau ia niabu anu Hene Jordão namakis anua 12 mishki tũke ewapabu iatãkãwẽ, hanu mã ushaibu anu bushũ hau mãtxinũbunã’, akĩ hatu yunuwe”, aka

⁴ nĩkatã ha 12 huni katubirana hatu kenashũ

⁵ Josué hatu yunukĩ: “Ana txĩtũbaĩ Hene Jordão namakis Deusũ hãtxa aruni bau ia mapuabu anu bushũ Israelĩ 12 huni bake matũ shenipabu tibitũ enabu shukua tibibũ mishki bestitxai iatãkãwẽ.

⁶ Ha mishki mã bitãshu hawẽ unãmati inũbarikiki.

⁷ Txipu matũ bakebũ matu yukakĩ: ‘Na mishki kekua bestitxai tibirã, hawamẽ?’ ikubainaibu hawẽ hatu yusĩkĩ: ‘Nũ hene pukebiranaitiã Senhor Deusũ yubati hãtxa aruni bau habu bebũkiri buaibũ bai matahairabiakẽ ha hene hamebi pashkaniwẽ taeshũ na mishki tibi bitã nũ nitxiniki’, akĩ mã hatu yuikubaĩshanaii. Hanushũ nukunabũ uĩkĩ hau shinãpakeshanũbũ habũri hatu yuinũbarikanikiki”, hatu wa

⁸ hawẽ hãtxa nĩkashũ haska Senhor Deusũ Josué yunushu keska wakĩ 12 mishki Hene Jordão namakisa Israelĩ enabu shukuabu tibibũ hatu bishuã hanu ushaibu anu bushũ mãtxĩtã

⁹ hanushũ ana hene namakis anuri Senhor Deus hatube yubakani hãtxa aruni bau ia mapukãshu anuri 12 mishki ewapa Josué hatu mãtxĩmarianikiaki. Hene merã hikibaĩ ha mishki mãtxinibu mania tsuabũra uĩriatirubuki.

^10-11 Haska Moisĩ Josué yunuima ikis hau anũ Senhor Deusũ Josué yunua hawenabu imakĩ Josué keyuriama Hene Jordão namakis anu Deusbe hatu hãtxashunikabũ hawẽ hatube yubakani hãtxa aruni bau ia manayuaibũ Israelĩ enabu hawaira habu dukũ pukebainaibũ

¹² ha dikabi haska Moisĩ hatu yunuima keskai Rúben enabu shukua hunibus inũ Gade enabu shukua hunibus inũ Manassésĩ enabu shukua hunibũs hatũ detenametiya bui hatunabu shukua betsabu hatu merabewai bebũkiri haburi pukebaini

¹³ 40.000 detenamenikabu mapeketãs nawabube Senhor Deus detenameshuni bui Jericó besusi mai pãpa anu hikiaibũ

¹⁴ Moisés hiweshũ hatu yunua nĩkai haki mesekubiranimabu keska wamakĩ na habiatiã Senhor Deusũ Josué amai uĩkãshu hawenabũri hawẽ hãtxa nĩkakĩ hau hakiri pe shinãkubainũbũ haska Senhor Deusũ amanikiaki.

¹⁵ Senhor Deusũ Josué ana yuikĩ:

¹⁶ “Hene Jordão namakis anua hau mapekebiranũbũ ẽ hatube yubakani hãtxa aruni bau iabu hatu kenawe”, aka

¹⁷ Deusbe hãtxashunikabu Josué yuikĩ: “Hene Jordão namakis anua mapekeri bekãwẽ”, hatu wa

¹⁸ pukebirani hene anua hawaira mapekei metuanu maputanaibũs manãkiria hene ana tuebirani matahairanikiaki, pukeriabuma ishu keskairã.

¹⁹ Bari bena hawẽ ushe ha dukũ hawẽ dia 10tiã Hene Jordão pukei mapekebaini mai pãpa anu Jericó bari huaikiri Gilgal anu kai hikishũ hatũ tari hiwe ana pũtebaunabũ

²⁰ Gilgal anu Hene Jordão namakis anua 12 mishki tũku ewapa iabainabu Josué mãtxĩkĩ serẽtã

²¹ hawenabu yuikĩ: “Txipu matũ bakebũ mã hawẽ ibu tibi matu yukakĩ: ‘Na mishki ewapa nitxĩkĩ serenibu hawamẽ?’ ika yuka inũbarikanikiki.

^22-23 Haska yuka ikaibũ hatu yuikĩ: ‘Narã, nukunabu Hene Jordão namakis netsua anua beshũ mãtxinibuki. Haska nukuburi Ianẽwã Tashipa bai washũ Deusũ netsukĩ tashka wa nũ pukeni unãtiki’, akĩ hatu yusĩkubainũbarikãwẽ.

²⁴ Deusũ matu haska washuniwẽ taeshũ mai hirabi anu hiwebaunabũ matũ mekenika Senhor Deusũ kushipa unãshãkanikiki. Haskawẽ taeshũ matũ mekenika Senhor Deus duawakubaĩshãkãwẽ, heneamarã”, hatu wanikiaki.