Josué 2 - Kaxinawá Bíblia (BR)

Jericó mae anu hau unãti watanũbũ Josué huni dabe yununikiaki, na hãtxarã

¹ Sitim anua kashũ hau hune uĩbaũtanũbũ huni dabe Josué hatu yunukĩ yuikĩ: “Ukeri Jericó inũ hatũ mae kesuakea hune nuku uĩshũbaũtãkãwẽ”, hatu wa bui Hene Jordão pukebaini huĩti kushikaĩ Jericó anu hikitã hanu ushanũ ika Raabe aĩbu hininipa dasibibũ memis hiwe anu hikia maniabũ

² tsuãra Jericó shanẽ ibu yuikĩ: —Ikis meshu merã Israelĩ enabu dabe nuku hune uinũ ika Raabẽ hiwe anu ma hikiabukiaki— aka

³ Jericó shanẽ ibũ hatu yunua hawẽ detenamenikabu bushũ hatũ shanẽ ibu hãtxashũkĩ Raabe yuikĩ: —Nawa dabe mianu hushukiaki. Neri nuku kaĩmashũwẽ. Nuku hune uĩbaunũ ika beabuwẽ taeshũ mĩ hiwe anu hikikãshu neri hatu iwewe— aka

^4-6 detenamenikabu beriabuma hawaira hatu mistutã Deusũ Israelĩ enabu duawamis Raabẽ nĩkaimashũ hawẽ hiwe sapa sheni mamaki hatu iyushũ hawẽ yumẽ wati basiwã barĩwãkĩ mãtxĩshina namã hatu hunekĩ arubiashũ detenamenikabu parãkĩ Raabẽ hatu yuikĩ: —Txanima huni dabetũ ea uĩwãshuki. Hakia harakiriara beabu ẽ unãma ishuki. Bari hikiaya nukũ mae hikiti shui tibi mã bepumis ma kemaya nenua tashnibaĩkãshuki. Harakiri buaibu ẽ unãmaki. Mã hatuki nukukatsis ikairã, hawairabaĩ hatu txibãtãkãwẽ— hatu wa

⁷ hawẽ hãtxa ikũwaĩ Hene Jordão pukea baikiri hatu atxinũ ika benai detenamenikabu kushibaĩ uĩtãkĩ hatu betxiama hushũ hatũ mae mishki kenebaunibu anu hikiti shui tibi ma hawaira bepuabu

⁸ Israelĩ enabu dabe ushariabuma hawẽ hiwe sapa sheni mamaki Raabe ana inashũ hatu yuikĩ:

⁹ —Na mai pakea Senhor Deusũ matu ibu wamaikiki, ẽ unanã. Dasibi nenu hiweabu nũ datei keyuaii, matuwẽ taearã.

¹⁰ Haska Egito anua mã pashaibu Senhor Deusũ Ianẽwã Tashipa matu pashkashuna mã pukebirani inũ Hene Jordão ukeri kesha betsauria Amorreu nawa shanẽ ibu dabe Seom inũ Ogue hatunabube mã hatu yamawaimairã, nũ unaiĩ.

^11-12 Mã haskakubiranai nĩkai nukũ huĩti nishma matu tsuã binutirumawẽ taea tsua nũ ana shinã txãkãbumaki. Matũ mekenika Senhor Deusũ hamapai nai anu inũ hamapai mai anu mekenika menã datã akĩ na habiatiã ea yubarikãwẽ. Ẽ matuki txanitxakama arukĩ duawashũwẽ taeshũ ẽ epã enabu mã duawashanũ Senhor Deusũ kenawẽ ea yubakãwẽ.

¹³ Ẽ epa inũ, ẽ ewa inũ, ẽ puibu inũ, ẽ betsabu inũ, hatũ enabus hau mawayamashanũbũ mã hatu deteama ishanai txanima hãtxawẽ ea yuikãwẽ— hatu wa

¹⁴ hawẽ hãtxa betxipaikĩ betsã yuikĩ: —Mĩ nukukiri hawa hatu yuiama nuku tenãbumawẽ taea mia inũ minaburi mã mawama ishanaii, nukũ hiwea inananaĩ keskairã. Na mai pakea inũ mĩ mae Senhor Deusũ nuku ibu wamaya miwẽ nuikĩ nũ mia duawashanaii, mia parãmarã— aka

¹⁵ ha mae mishkiwẽ kenekĩ kebẽbaunibu mamaki ha aĩbu ibuã hanu hiwe waniwẽ taeshũ hanu uĩti shui manaũri anushũ shabakã meshu merã tsuã uiãma dispiwẽ hatu butumakatsi

¹⁶ Raabẽ ana hatu yuikĩ: —Hau matuki nukuyamanũbũ mananã pashai buyutãkãwẽ. Hanua shaba dabe inũ besti hari huneyushãkãwẽ. Matu benabaũkĩ keyutã txĩtũbiranaibũ ukeri ana mã pukebaĩtirubuki— hatu wa

^17-18 hatu buteriama habũ kemakĩ: —Nukũ detenamenikabube na mae ewapa anu nũ hikiaya na uĩti shui anu mĩ nuku butuai anu habianuri dispi tashipa panĩwãshũ mĩ epa inũ, mĩ ewa inũ, mĩ puibu inũ, mĩ betsabu inũ, minabũ enabus mĩ hiweanu hatu itxawashãwẽ, ha dispi tashipa paniã uĩkĩ hau tsuã matu meyamashanunã. Haska nũ mia yunuai mĩ akamakẽ mĩ nukube yubakashu nũ mia ashũtirumaki.

¹⁹ Habiatiãri tsuabura mĩ hiwe anua tashnibainabu nukunabũ hatu deteabu minabu mawa ibubis hatuna ishãkanikiki. Hakia mĩ hiwe merãshũ nukunabũ minabu deteabu mawaibũ txakaburã, nukuna ishanikiki.

²⁰ Hakia ha dikabi nukukiri mĩ shanẽ ibu mĩ yuiairã, haska nũ mibe yubakashu nũ mia apanã haska mĩ txanitxakai unãtã nũ mia merabewama itiruki— aka

²¹ —Peki. Haska mã yuiai hau haskashanũwẽ— hatu watã nitxĩkĩ hawẽ hiwe manaũri uĩti shui anua dispiwẽ hatu butea buaibũ hawẽ uĩti shui anu Raabẽ dispi tashipa paniwã

²² mananã ha dabe mapekeshina haria shaba dabe inũ besti huneyuabu henekiri bai yusiuri inũ yusmauri hatu benahairabiabu hawa hatu betxiabuma hatu bena keyubirani atimas hatũ mae Jericó anu txĩtũbiranaibũ

²³ hanua mananã bushiãbu bututã ha unãtinanikabu hene pukebaini hatũ shanẽ ibu Numnẽ bake Josué anu hikishũ hatu haska washinabu habũ banabimakĩ

²⁴ bestitxaitũ yuikĩ: —Txanimaki. Ha mai hirabi Senhor Deusũ nuku ibu wamaikiki. Ha dikabi dasibi hanu hiwebaunabu nukuwẽ taea datei hatũ huĩti nishmai ana kushipa hayama punu nukai keyuabukiaki— aka